1 I 'atai, Samuela Saulo taiadi i nunago 'edeye, Samuela bunama ma ba'alina i silakai Saulo 'unu'ununa i iwagi wata i avalamaigi i yaogi bega i voneni i vo, A iwagimuga 'wainega 'u na 'asetai 'Auvea i venua'ivinemu 'u na vetoveimea me Isileli 'waidie, kumanidiavo yana kukuafou. 2 Tutuyanina 'u na tauya, 'u na nunago tomotoga 'adi 'ailuga taiadi 'wa na veluaga Litieli 'adi taumata lilivaneye, taumatanina 'atamana Silasai, wauma Beniamina yadi 'edabaleye. Bei i na vonemu doniki 'u lulualediga 'akonadi i veluagadi begaidi tamamu kebu faifaidi i da nuanuaga, we'e mogitana 'omi faifaimi i nuanua wata i vevelutolitoli i vo, Aitoi natuku i na veluagai?”

3 Tutuyanina 'wa na nagoi tamu welavi bwaikina 'waineye 'wa na 'iseni tomotoga 'adi 'aitonu i nunagoi Bedani, Yaubada 'waineye i na 'odu. Tamu i na nunago 'aisaya siaidi 'adi 'aitonu i na naweni, tamu 'ani'ani 'aitonu i na 'ani, we'e tamu oine ma 'aivia oine i na 'ewai. 4 I na vekaiwa 'waimie mulieta 'ani'ani 'ailuga i na velemi, 'wa na 'ewai ma yami sosoana 'wa na 'ani.

5 Wata Samuela Saulo i voneni i vo, I na 'a'avana 'u na nago Kibia-eloimu, me Filisitia tolugavia bei i vebae'wa i miamia. 'U na lukuluku 'atamananina 'waineye, Yaubada yana tolu'ivonavo ma 'aila'adi 'u na veluagadi i na obuobuma 'eba 'odu'odu 'ana 'oya 'wainega. Matatabudi 'eba subia 'adi kukuavo 'waidiega 'Auvea i na subisubiai, bani'odi gita, aliali wata 'umo*'Ana mogitana vona Ibeliu 'waineye, we'e vona Dimudimu 'ana saivila, harp, tamborine, flute, and lyre. 'waidiega i na tavotavola wata bonadi bwaikinega yana vona i na lulu'ivoneyeni. 6 Tutuyanina 'waineye 'Auvea 'Anu'anununa ma yana toketokena i na agemu bega ma fuemie bonami bwaikinega yana vona 'wa na lulu'ivoneyeni. 'Auvea yamu nuanua i na 'ive'ivauya 'wa da vo 'omu tamu tomogo tulina. 7 Tutuyanina tugusanidi i na souyedi 'waimuye i na 'a'avana Yaubada yana nuanua 'u na 'idewadi fai i na labilabinimu.

8 'U na kumeta 'u na nago Giligali, bei yau taiadi ta na veluaga, 'aisaya ta na velomuyedi ta na kabunidi Yaubada 'waineye wata ta na 'anivelena-maimaiga veiana faifaina. Siwe 'u na lulukamata, 'ana tugusa 'aiata 'ana ve-7 'waineye, yau a na le'wa 'waimuye, mulieta a na vonemu ava'ai 'u na 'idewai.”

9 Saulo i sivilai sai'afoga Samuela i da 'iaweni, nika Yaubada Saulo yana nuanua i 'ive'ivauya 'wa da vo taunina tamu tomogo tulina. Naninidi basenadi Samuela i vona-samulediga, matatabuna 'adi mogitana i souyedi 'aiatanina 'waineye. 10 Side bani'odi. Tutuyanina Saulo wata yana tofolova i le'wa Kibia-eloimu, Yaubada yana tolu'ivonavo ma 'aila'adi i yogo'ede'edeni taiadi i veluaga. Tutuyanina 'waineye Yaubada 'Anu'anununa ma yana toketokena i agei bega i velamu bonana bwaikinega Yaubada yana vona i lu'ivoneyeni tolu'ivonanidi taiadi. 11 Tomotoganidi basenadi Saulo i 'aseta-'atumaia i 'iseni wata i nogai Yaubada yana vona i lulu'ivoneyeni, bega 'aise'avadi i velutolitoli i vo, Ava'ai de'e i sousouyeni Kisa natuna 'waineye? 'Alo Saulo kumanina tamu Yaubada yana tolu'ivonavo 'adi 'aila'a?”

12 1 Sam 19:23,24Nika tamu tomogo 'atamananina 'ana tomia yadi velutoli i tutuli i vo, 'Ana fata tamu tomogo-'avo'avovo i na vetolu'ivona Yaubada faifaina 'ai'edi tamana kebu tolu'ivona 'adi wauma 'wainega†'Ana mogitana vona Ibeliu 'waineye, Tamadi aitoi? ?”

'Eba nuavogananina i souyeni Saulo 'waineye nika tamu vona-awatabai i velamu. I vo, 'Alo Saulo tamu Yaubada yana tolu'ivona?” 13 Saulo yana lu'ivona Yaubada faifaina i 'a'avana, i tauya i laka 'oyeye, 'eba 'odu'odu 'waineye.

14 Tutuya 'ifwaidi i 'a'avana Saulo tamana taina i nunago 'edeye nika Saulo wata yana tofolova i veluagadi i velutoliedi i vo, 'Omi ava'aiega 'wa maia?”

I tutula i vo, 'Ima 'aisaya doniki 'a lulualedi, siwe yama lauala 'waineye 'a luala-wayogedi, begaidi 'a nago Samuela 'waineye 'a velutolieni 'aisayanidi faifaidi.”

15 Saulo tamana taina i vo, 'Wa na veifufu 'waikuye, tamu ava'aina Samuela i veifufuyeni 'waimie.”

16 Saulo i tutula i vo, Samuela i vonema tomotoga 'ifwaidi doniki 'akonadi i veluagadi.” Siwe kebu i da voneniga ava'ai Samuela i 'idewai 'waineye yana vekini faifaina.

17 Samuela i veimea me Isileli matatabudi i na nagoi Misifa, nika bei i na tovoi 'Auvea mataneye. 18 Tutuyanina matatabudi i le'wai, Samuela i vonedi i vo, 'Auvea, me Isileli yada Yaubada side bani'odi i voneyedi i vo, Basenadi tubumiavo a 'etoyavudi me Itifita yadi veimea 'wainega a vagavaidi a miedi side fwayafwayanina 'waineye, we'e tomotoga 'adi 'aila'a tulina tulina yadi toketokena 'waidiega a 'ita'ita'iemi. 19 Siwe tutuya de'e 'waineye yau yami Yaubada 'wa vedumwe'ai'aieku, kumaniku 'ami vita wata yami veviga fuedi 'waidiega a 'i'ita'ita'iemi. We'e 'asiau ma'itufa 'wa velu'uieku nuanuami yami kini a na velemi. 'Atumaina, 'wa na maia 'ami wauma wata yami 'aila'avo 'aitamogana 'aitamogana 'wa na sivemagesedi matakuye.”

20 Samuela me Isileli i vonedi wauma 'aitamogana 'aitamogana i maia, 'waidiega 'Auvea wauma Beniamina i venua'ivineni. 21 I 'a'avana Samuela Beniamina 'ana wauma i vonedi 'aila'a 'aitamogana 'aitamogana i maia. Nika 'Auvea Matili yana 'aila'a i venua'ivineni, mulieta 'aila'anina 'wainega 'Auvea Kisa natuna Saulo i venua'ivineni. Siwe tomotoga matatabudi Saulo i luala-wayogeni. 22 Bega tomotoga 'Auvea i velutolieni i vo, Tomogonina ava'aibe bei?”

'Auvea i tutula i vo, I giva kukua awasasadie.”

23 Nika i lilide i nagoi kukua 'awasasadiega i vagavaia i mieni. Saulo i tovoi kamwadie i 'iseni tomogonina manamanawena, we'e 'ifwaidi tomotoga i laka i 'usa 'avalaneye. 24 Samuela tomotoga matatabudi i vonedi i vo, Side tomogonina 'Auvea i venua'ivineni 'asiau bega i nunagoga kumanina yami kini. De'e tomogonina, Isileli yana 'eba veimea nageneye kebu tamu aitoi taiadi i da vesala.”

Nika tomotoga matatabudi bonadi bwaikinega i 'oluga i vo, Yada kini, i da veveimeyeda tutuya manamanawena.”

25 Mulieta Samuela tomotoga 'waidie i kiavemageta kini 'ana veimea wata yana sauluva matatabuna, mulieta i kilumidi lubulubu 'waineye i yatoi 'Auvea mataneye. I 'a'avana Samuela tomotoga matatabudi i vonedi i nagoi yadi vanuge.

26 Tutuyanina Saulo i vilai i nago yana vanuge 'atamana Givea 'waineye, 'ifwaidi tomotoga 'akonadi Yaubada nuadi i 'abitonovidi wata taiadi i nagoi. 27 We'e 'ifwaidi tomotoga sakoidi i tovoi i vonavona i vo, Bani'odi tomogonina i na munega i na 'ita'ita'ieda?” Begaidi i sidibidibieni wata kebu nuanuadi nuakalikali i na mieni Saulo 'waineye, siwe Saulo i baila kebu nuanuana i na 'aniveleneni.

Basenadiotoga me Isileli i miamiani Ufa Iolidani vi'ainega, me Gada wata me Lubeni i vedumwe'ai'aiedi. Basenadi me Isileli i miamiani Itifita 'waineye, me Isileli matatabudi matana 'ana 'atagiega i tutuwealidi bega kebu tamu aitoi i da lukuga i da 'ita'ita'iedi. Me Isileli matatabudi i miamiani Iolidaniega, kebu tamu