15
Mosese wata Yaubada yana Sifi Siaina yadi lei
1 Dayaga a 'iseni i 'a'avana, mulieta 'awaie ava'ai i na souyeniga 'ana 'isa'isa i veku, 'ana 'isa'isanina 'eba nuavogana wata nani bwaikina. Anelose 7 nimadie nani vitadi sakoidi 7 a 'isedi 'waidiega tomia fwayafwaya vematavuloga i na veluagai. Tutuyanina vitanidi sakoidi i na obu fwayefwayeye tomotoga i na nikedina bei Yaubada yana nuasako 'ana 'eba ve'a'ava, kebu wata tamu nani vitana sakoina i na sousouyeni.
2 Wata a 'isanago eyaga niwalova 'atumaiotogina a 'iseni, mata-'ani'anina bani'odi kilifou, nageneye 'ai-'ala'alata. Eyaganina lilivaneye tomotoga fuedi a 'isedi i tovotovoi, kumanidiavo i vetoketoke 'adi gaviavo 'waidie. 'Adi gaviavonidi 'aisaya malavetayega, yana kumaea wata 'aisayanina yana naba, 'asa'aiana 'ana wagava. Tomotoganidi nimadie yadi 'eba lauinava gita Yaubada basenadi i veledi. 3 Sou 15:1Matatabudi i leilei, leinina Yaubada yana tofolova Mosese wata Yaubada yana Sifi Siaina 'waidiega. Leinina side bani'odi.
'Auvea Yaubada, 'omu toketokeotogimu,
naninidi 'u 'i'idewadiga bwaikidi wata 'eba nuavogana.
'Awalawa 'aitamogana 'aitamogana 'u veveimeyedi,
yamu sauluva matatabuna 'atumaidi wata tonovidi.
4 Sam 86:9; Iel 10:7Tomotoga matatabudi ma yadi kololo i na ve'ililibuyemu,
ma yadi subia yamu toketokena i na lulu'ivoneyeni,
fai 'omu 'aiseotogimu magemagetamu.
Tomotoga 'aila'a tulina tulina i na maia i na 'odu'odu 'waimuye,
fai tomotoga fuedi yamu veimea tonovidi i 'isedi.
Anelose 'adi 7 nani vitadi sakoidi i 'ewadi i na tawedi fwayefwayeye
5 Sou 38:21Lei i 'a'avana a 'isanago nika Yaubada yana Vanuga Tabutabuna abame i sibaleni, nageneye Tutudaba Tabutabuna a 'iseni, Yaubada yana 'eba mia. 6 We'e anelose 7 vanuganina 'wainega i souyedi, nani vitadi sakoidi 7 i mimaiedi, naninidi tomia fwayafwaya 'adi 'eba vematavuloga. 'Adi talauma mataududulidi wata vunavunagidi, 'afaudiamo bulava golida i nago. 7 Nani ma yawaidi toketokedi 4 'waidiega tamu iadi 'aivoe 7 i 'ewadi, anelose 'adi 7 i veledi. 'Aivoenidi golida, nagedie Yaubada miamia-vagaina yana nuasako i veadagidi. 8 Sou 40:34; 1Ki 8:10-11; 2If 5:13-14; Ais 6:4I veledina nika Yaubada yana toketokena wata yana mageta Vanuga 'Eba Velu'ui i susuli bani'odi lufwa bega kebu tamu aitoi 'ana fata i na luku, nagami anelose 7 nani vitadi sakoidi 7 i na tawedi i na obu fwayefwayeye mulieta i na luku.