18
Yaubada me Babiloni i leodi
1 Vavine a 'iseni, mulieta wata a 'isanago tamu anelose a 'iseni abamayega i obuobuma. Anelosenina ma yana veimea wata magetana i 'awaiaia mataududulina, fwayafwaya matatabuna i magetai. 2 Ais 13:21,21:9; Iel 50:39, 51:8; Ve 14:8I toke i vegole ava'ai 'awaie i na souyeniga faifaina i vo,
Babiloni i luvela'ovi
'Atamananina Bwaikina i luvela'ovi.
Tutuya de'e 'atamananina yaiaina yadi 'eba mia,
manuga sakoidi wata 'aisayanidi kibwadi tulina tulina yadi 'eba giva.
3 Ais 23:17; Iel 51:7I luvela'oviga fai tomotoga 'adi 'aila'a tulina tulina 'ana oine i yemuya,
oinenina 'wainega nuadi i 'ewadi bega taiadi i sakona.
Tomia fwayafwaya yadi kinivo taiadi i sakona.
We'e fwayafwaya 'ana nuanua 'waineye bwaikina nuanuana kukua fuedi,
begaidi tovekimwane i ve'ai'aiwabu.”
4 Ais 48:20; Iel 50:8,51:6,45Wata tamu bona a nogai abamayega i vonavona 'atamananina faifaina i vo,
Yaku tomotoga, 'wa na souyemi 'atamananina 'wainega,
vavinenina 'wa na baileni kebu taiadi 'wa na sakosakona.
Kebu nuanuaku 'ana vematavulogayega
'omi wata a na vematavulogimi.
5 Nag 18:20-21; Iel 51:9Mogitana vematavuloga i na veluagai fai yana sakona fueotogidi i kwaudi i laka abame,
Yaubada i nuanuanidi.
6 Sam 137:8; Iel 50:29I vesauluva sakoina yaku tomotoga 'waidie,
'omi wata bani'odi 'wa na vesauluva sakoina 'waineye.
Sakona 'aitamogana 'aitamogana i 'idewadiga, wata 'omi 'wa na tutula 'ailuga 'ailuga.
Nani vitadi sakoidi bani'odi ufa toketokena ma vedina i 'idewai yaku tomotoga faifaidi,
'omi wata bani'odi vedi 'ailuga 'wa na 'idewadi 'wa na veleni i na yemu, 'ana vematavuloga.
7 Ais 47:7-9Yana 'ai'aiwabu faifaidi ma yana nualaka taunina i awa'ai'aia,
'omi vita wata nuavita 'wa na veleni yana 'ai'aiwabunidi bwaikidi 'adi fata bani'odi.
I lubwaineni vitanidi i na veluagadi fai tutuya fuedi taunina i awa'ai'aia i vo,
Yau kwini toketokeku,
kebu vita wata nuavita a na veluagadiga 'wabu'wabulavo i veveluagadiga bani'odi.’
8 Yana vonanina faifaina nani vitadi sakoidi i na veluagadi 'aiata 'aitamogana nageneye,
wafa, vemogai wata loka.
'Auvea Yaubada toketokeotogina, i na veimea vematavuloga i na veluagai 'ai-'ala'alata 'waineye i na 'alaogogodi.”
9 Isi 26:16-17Tomia fwayafwaya yadi kinivo vavinenina taiadi i sakosakona wata i sosoana-'avo'avovo yana 'ai'aiwabu faifaidi, lufwana i na 'iseni, faifaina nuadi i na vita i na 'we'wela. 10 'Ana vematavuloga faifaina i na kololo 'ani'ie i na tovoi i na vona i na vo,
Ieu, nuakalikalimu, 'atamana bwaikimu.
'Omu Babiloni, 'atamana toketokemu.
Tutuya 'ale'usaotogina nageneye
Yaubada yana vematavuloga 'u veluagai.”
11 Isi 27:31,36Tomotoganidi kukua i vevekimwaneyedi i miamiani 'awalawa tulina tulina 'waidie, ma yadi nuavita i na tataivonavona, fai kebu tamu aitoi i da miamia bega yadi kukua i na kimwanedi. 12 Isi 27:12-13,22Kukuanidi bani'odi golida, siliba, kileu wata 'odo'odo 'adi tutula bwaikidi, talauma 'avu'avudi, bakabakadi wata yamoyamoidi 'ai'aiwabu faifaidi, welavi magaidi 'atumaidi, tomotoga 'adi dabidabi 'adi tutula bwaikidi bani'odi kavi, kofa, kainumu, kilifou wata 'aisaya bwaikidi aladi. 13 Wata kukua 'ifwaidi bani'odi kavu, naia, vane, bunama magaidi 'atumaidi, oine, bunama olive, falawa, witi, bulumakau, sifi, osi, fwayafwaya 'ana waka salioti wata tofolova-maimaiga. 14 Tovekimwanenidi 'ani'ieyega i na vonamo vavinenina 'waineye i na vo, Kukuanidi basenadi yamu nuanua bwaikina 'akonadi i 'a'ava, yamu 'ai'aiwabu, 'amu vaigavu wata 'amu subia matatabuna i 'a'avaotoga, kebu 'ana fata wata 'u na veluaga-vaituganidi.” 15-16 Isi 27:31,36Tomotoganidi kukuanidi i vekimwaneyedi Babiloni 'waineye bega mani bwaikina i veluagadi, 'ana vematavuloga faifaina i na kololo 'ani'ie i na tovoi bega i na 'we'wela i na vo,
Ieu, nuakalikalina 'atamana bwaikina.
Taunina i 'i'ivivigavuya talauma 'avu'avudiega, bakabakadiega, yamoyamoidiega,
golida 'wainega, kileu wata 'odo'odo 'adi tutula bwaikidi 'waidiega.
17-18 Ais 23:14; Isi 27:26-30,32Tutuya 'ale'usana yana 'ai'aiwabunidi matatabuna i 'a'ava-matayo'o.”
Wata toniwaka matatabudi, waka 'ana tofolovavo wata tomotoga i dodoga wakanidi 'waidie, toyaubani taiadi 'ani'ieyega lufwana i na 'iseni ma yadi nuavita i na 'we'wela i na vo, No'o 'atamananina bwaikina, kebu tamu 'atamana bani'odiga.” 19 Isi 27:30-34Taunidi fwayafwayayega i na ivudi, i na vemogai wata i na tainu'wanu'wa i na vo,
Ieu nuakalikalina, 'atamananina vita bwaikina i veluagai.
Toniwaka matatabudi 'atamananina 'wainega 'ai'aiwabu bwaikina i veveluagadi,
siwe i simatayo'oimo yana 'ai'aiwabu i 'a'ava i sako-vagata.
20 VeL 32:43; Iel 51:48We'e 'omi tomia abama 'wa na sosoana vematavuloga i veleniga faifaina.
'Omi Yaubada yana tomotoga,
yana tomata'aulelevo wata yana tolu'ivonavo,
'wa na sosoana fai 'atamananina 'wainega vita 'wa veluagai,
siwe 'akonadi Yaubada vematavuloga i veleni 'ami mewa.”
21 Iel 51:63-64; Isi 26:21I 'a'avana mulieta tamu anelose toketokena kileu bwaikaotogina i silakai i toke i taweni malaveseye i vona i vo,
De'e kileunina a taweniga kebu wata 'wa na 'ise'iseniga,
wata bani'odi Babiloni 'atamana bwaikina i na toke i na leodi i na 'a'avaotoga,
nika kebu tamu aitoi i na 'ise'iseniga.
22 Ais 24:8; Iel 7:34,25:10; Isi 26:13 'Atamananimu, yamu sosoana i 'a'ava,
kebu wata tamu ava'ai bonana i na noganogai,
bani'odi lauinava gitayega, 'umo wata evulega.
Wata tofolova kebu tamu ava'ai i na 'idewaiga yamu 'awalaweye,
wata kebu 'ana fata sakoli butu'aidi i na noganogaidi.
23 Kebu tamu mageta bei i na 'ise'iseni,
wata nagi 'ana bonabonana i na 'a'ava.
Vona mogitana 'atamananimu 'amu tovekimwane matatabuna i 'edakumetaotoga tomia fwayafwaya matatabudi 'waidiega,
wata 'afo'a 'wainega tomotoga fuedi 'u vekaliedi,
siwe 'akonadi toketokenanidi matatabuna i 'a'ava.
24 Iel 51:49'Atamananina Babiloni 'waineye Yaubada yana tolu'ivonavo wata yana tomotoga magemagetadi i luvewafadi dayagidi i iloilolo.
We'e mogitana tomotoga matatabudi i luvewafadi fwayafwaya matatabuna 'waineye, dayagidi i 'eno'eno 'atamananina 'waineye.”
18:2: Ais 13:21,21:9; Iel 50:39, 51:8; Ve 14:8
18:3: Ais 23:17; Iel 51:7
18:4: Ais 48:20; Iel 50:8,51:6,45
18:5: Nag 18:20-21; Iel 51:9
18:6: Sam 137:8; Iel 50:29
18:7: Ais 47:7-9
18:9: Isi 26:16-17
18:11: Isi 27:31,36
18:12: Isi 27:12-13,22
18:15-16: Isi 27:31,36
18:17-18: Ais 23:14; Isi 27:26-30,32
18:19: Isi 27:30-34
18:20: VeL 32:43; Iel 51:48
18:21: Iel 51:63-64; Isi 26:21
18:22: Ais 24:8; Iel 7:34,25:10; Isi 26:13
18:24: Iel 51:49