Bible Iyansi 1 PETƆLÀ 1

Un'kaan atàtwɛb wà

Petɔlà

Nsɛmà

Un'kaan atàtwɛb a Petɔlà wà un'kaan a un'sɛŋ awà bàtöm akà klistɔ abà ban'buul mpem benàben kitiir a nsi a Azi Minɔ̈ɔ̈r, ŋàbà Türki. Baar a itiir a nsi aki bàkäl baar a mpem a ube. Un'kaan awà akwen mupà làkyän aba un'kanà: uman mpay mbwo mwɛy anà Klistɔ ntɔn muswaŋ mbaan akaŋankir aba. « Ukyer ubwaŋ » sye taaŋ lanswà, amà man'kyän ande myilä anà ilä. Un'kaan awà wàŋàkab itin inà. Itin kyàtàtwɛb kyà muswaŋ an'kyän a Nzam amà màkalɔɔmà naa mbuur mbuur ukäl win'kyɛɛl, alà làfàpà mbwo a ngyööb a mɔ̈ɔ̈ a dudu unsà idiim aŋàbwaŋ kyà « nkɔɔŋ a mɔ̈ɔ̈ ». Itiir kyà yweel kyàmuswaŋ mbaan a nkääl, ayà amu Klistɔ, ntɔn mukal mbuur aŋàbwaŋ, un'sɔ aŋàbwaŋ itàkal un'kaar aŋàbääl wàŋàbwaŋ. Itiir kyàtär kyà ntɔn muyöb làkyän a iköŋ aŋàbà, yöb naa Nzam wà mbak a baar a mɔ̈ɔ̈ anà bàŋàkwà. Itin kyànà kyà ntɔn muwal ilää aŋàbwaŋ ntɔn baar aŋàmɛɛ nkwaaŋ kyekà ba bàfàkyer ndaa aŋàbwaŋ. Ntsülà ifàpà baar aŋàyɛl un'kanà asànaa atö anà asyee mukal bàŋàtsim ubwaŋàbwaŋ. Yanswà ifàtsü unsà mbɔr a ntsüü. Nkye un'kaan awà wà ntööm a Petɔlà? Amwɛy bàfàkyer akyey. Bamwɛy bàfàsi naa waa wun'kaan a un'lɔŋki mwɛy ungö a mbul nkam yimfum a Petɔlà. Itàkal naa abà, ikaswaŋà naa waa bàtööm « baar bàkàtɔŋ unsi asin » ikɔ̈ɔ̈n ubwaŋ ntɔn ba. Kyekà, ndaa ayi yàbulà ikal a kab a Nzam. Kyakin, abà ba bàŋàbilà afwee u mɛɛn, ba ban'kwo muswaŋ nsöön aba anà mutà imbäl a Làsaŋ, làsaŋ aŋàbwaŋ là Nzam. Bi ibà baar ban'kwo musɔɔm nkääl a iköŋ unsà mbaan anà ukwen a un'tɔŋ, mɔ̈ɔ̈ abi wàŋàpà akà Klistɔ. Wà Klistɔ afàpà an'kyän a mpay ifàman bi, unsà nkääl aŋàbwaŋ abi, unsà làkyän abi. Abun un'söön wàmuswaŋ Ikööŋ umbwo a idiim a isin: bàkyer udu a Klistɔ « nkɔŋ a mɔ̈ɔ̈ », aklistɔ bà nkɔŋ a mɔ̈ɔ̈ a ndwà a dweelà mwɛy. Unsà ndaa iler un'sɛŋ a Isàlɛl u mɔŋ a Sinayi, ba bàŋàsà « un'lwaaŋ aŋàsɔɔl, iköŋ a mfum a angaŋ, un'sɛŋ a Nzam, un'sɛŋ awà wànde ». Ba bambäl akà baar a ukwen a Nzam. Un'kaan awà bàtöm sye akà aklistɔ a Bitini. Kyeka, u nsɛmà a mbul nkam, kàkäl anà mfum a Bitini ikɔb ande Pline le Zöne. « Babilɔn ». Nde akasii unsà an'kyän ande naa ba bàkäl indiir abunàbun anà babämà ndaa ambe yifà ifà akà atɔŋ aba mpa abà Ayudà, anà bamɛɛy nkwaaŋ. Kyakin ntööm wà mukyer mbwo yanswà mufakwɛy un'kanà ntɔn munaan an'kyän aba amu imbuur a Yɛsu Klistɔ awà mpay aba. U ngyamàkà a an'diim ilääb mbɔr, Petɔlà wàmufuur an'kyän ande mitääŋ naa Nzam ba mɔ̈ɔ̈ katsü aben anà kapɛ aben làkyän a mɔ̈ɔ̈ umbwo a ukwà anà ngwiiyà a Yɛsu Klistɔ. Asànaa Klistɔ, ba bàkäl anà làbɔ̈ɔ̈n u ndaa ande umbwo a nkääl aba anà nsyääl aba kusà a mpay. An'lwɛŋ a nsyääl bapɛɛ u ndaa iler isal a mbuur mbuur, nkääl uboo a asyääl anà alɔɔŋ, làbɔ̈ɔ̈n uboo abääl, mɔ̈ɔ̈ uboo a Ikööŋ anà nkääl kusà a baar mpa abà Ayuda. U kab làtyeen, un'söön wàmupà ndam a nswɛɛŋ akandweer, amfum a Ikööŋ, atö anà aŋàlàkwikilà banswà: ba bàkäl aŋàtsim unsà mpay, bàsi làkyän unsà ilää a Nzam! Un'kaan an'tsü unsà mbɔr.

Isàkal naa atääŋ a un'kaan wà ban'sà muküünà unsà làkwikilà aba, itàkal naa mpay yà mwo, yà sin sin ntɔn imbäl akyà ban'kwo ba mutà u mɛɛn: kyakin, ilɔɔmà naa mɔ̈ɔ̈ aba wanswà, nkääl aba yanswà « itɛn isal aŋàbwaŋ a Nzam », ntɔn baar mpa abà Ayudà bàyöb isal aŋàbwaŋ aba anà bàsyäŋà Nzam kilä usàyà nde.

Mbɔr

1 Mɛ Petɔlà, ntööm a Yɛsu Klistɔ, an'pà mbɔr akà baar kàsɔ̈ɔ̈l Nzam, bàfàkal u nsi a ingyey anà bàkyàpää u Pɔn, Ngalàtyà, Kapadɔs, Azi anà Bitini, 2 Taa Nzam kàlasɔ̈ɔ̈l kusà asànaa kàkwen nde, u mbwo a un'kyɛɛl a Dweelà, ntɔn bɛ làkäl anà unkyeey akà Yɛsu Klistɔ anà bàŋàpɔŋà u mbwo a an'kil ande.

Wɛy kab a ngway anà duu màkäl mbɔɔn anà bɛ!

Làkyän a mɔ̈ɔ̈

3 Wɛy nsaak ikäl akà Nzam, Taa a Mwol abi Yɛsu Klistɔ! Unsà ngyɛb ande yàkölàköl, nde kipɛ mɔ̈ɔ̈ akün ntɔn bi ikäl anà làkyän a mɔ̈ɔ̈ u mbwo a ngwiiyà a Yɛsu Klistɔ uboo a akü, 4 ntɔn mudil kwal alà kàlɔ̈ɔ̈n Nzam ntɔn baar ande. Kwal alà làkwe anki làtay, itàkal làbü ŋingyäy, itàkal làpiy ntwɛn a la bwà. Nde wàmulɔ̈ɔ̈nà la u du ntɔn bɛ, 5 bɛ baar ukatii nde kà unkaak a ngwal ande u mbwo a làkwikilà, ntɔn ngweel a mɔ̈ɔ̈ ayà isàmɛnà kà ilä a ntsüü.

6 Kyakin, bɛ làbàŋàyɔl a un'sak, itàkal naa u kitaaŋ bɛ làbà u ngyɛb u mbwo a nsii ifà ifà. 7 Ntɔn ntal a làkwikilà abɛ làŋàsii yan'söön ntal a wɔl alà làfàtay itàkal naa la ban'fub u mbaa. Lakwikilà alà làsàwal nsyäŋà, làkoo anà ibyääl umpal usàmɛnà Yɛsu Klistɔ. 8 Bɛ làfàkwen Yɛsu Klistɔ ukɔɔn akun'man. Apanà sye bɛ làbàmusà làkwikilà amu nde itàkal naa bɛ ŋàtuman anki, anà bɛ làbàmufuur a un'sak ifà asin anà wàlàkoo, 9 ntɔn bɛ lan'wal isin a làkwikilà abɛ: ngweel a mɔ̈ɔ̈ abɛ.

10 Aŋangɔɔm bàleŋ anà bàbaal pànsi pànsi ngweel a mɔ̈ɔ̈ ayi, anà ba bàtɛ ngɔɔm ntɔn kab a ngway alà kàlɔ̈ɔ̈n Nzam ntɔn bɛ. 11 Ba bàleŋà naa paŋà nà, naa sye ndaa nà isàkal asànaa kàkyään Dweelà a Klistɔ kàkäl uboo a ba, umpal kàkyään nde mpay isàkal akà Klistɔ kusà anà làkoo ande làsàyà ungö. 12 Nzam kàmɛɛy akà aŋangɔɔm naa isal aki kà kyàkäl ntɔn ba ŋakwo anki, wɛɛ ba kya bàkyerà ntɔn bɛ. Ntɔn, apanà indiir ibi, alɔɔŋ a Làsaŋ Aŋàbwaŋ bàlakyäänà bya u mbwo a ngwal a Dweelà In'kyɛɛl kàtöm Nzam fà du. Akyeey, ba ŋakwo bàkwen musà ileer aba unsà bya.

Làkäl unsà mɔ̈ɔ̈ a in'kyɛɛl

13 Kyakin, làyöŋà an'kyän abɛ ntɔn isal, làkäl unsà làbɔ̈ɔ̈n, làsi làkyän abɛ lanswà unsà kab a ngway alà bàlatwääl kà ilä a mɛɛy a Yɛsu Klistɔ. 14 Asànaa baan a unkyeey, twon lan'lab ilään a ndür làkäl bɛ akyà umpal làkäl bɛ aŋàdiimà, 15 wɛɛ ifà imwɛy asànaa mbuur kàlabel wà in'kyɛɛl, wɛy bɛ làkäl bà in'kyɛɛl unsà nkääl abɛ yanswà, 16 ntɔn, bàsön naa: « Bɛ làsàkal bà ŋin'kyɛɛl, ntɔn mɛ in'wà aŋin'kyɛɛl. »

17 Wɛɛ isàkal naa bɛ làfàbeel naa Taa, mbuur awà afàtsul nsaŋ, ukɔɔn un'kɔl aŋàyↄŋ akà mbuur wanswà unsà isal ande, làkäl unsà bɔɔmà sye umpal làbà bɛ pà u mɛɛn. 18 Làyöb naa kà unsà indiir aŋàkwà anki, asànaa ngim, itàkal wɔl, waa bàlabeen unsà nkääl a ube làwɛl bɛ akà ataaràbɛ. 19 Aay, bɛ bàlabeen unsà an'kil a ntal a Klistɔ, asànaa mwan a un'kɔk akɔ̈ɔ̈n too itàkal làbiin, 20 awà bàtöm kusà mutàkyer du anà mɛɛn, anà bun'swɛŋ kà ilä a ntsüü ntɔn bɛ. 21 U mbwo a nde, bɛ làfàsà làkwikilà amu Nzam awà kun'wiiy uboo a akü, anà kun'pɛ làkoo, ntɔn làkwikilà anà làkyän abɛ màkäl amu Nzam.

22 Bɛ làpöŋ mɔ̈ɔ̈ abɛ u mbwo a unkyeey akà ndandaa, ntɔn bɛ làkwen bɛ a bɛ ukɔɔn akal ayà mpem yweel. Wɛy ukwen a mpem a pɛɛlà anà bà ipepey bàkäl uboo a bɛ. 23 Ntɔn bɛ bàlabör u mɔ̈ɔ̈ akün, kà u mbwo a imbɛŋ kyan'kwo mukwà anki, wɛɛ u mbwo a imbɛŋ mpa kyan'kwo mukwà, unsà ndaa a Nzam ayà mɔ̈ɔ̈ anà yà mbul a in'tye. 24 Ntɔn:

mbuur wanswà wà asànaa un'lɛŋ aŋàyɔm,

anà làkoo ande lanswà là asànaa iful a un'lɛŋ,

un'lɛŋ usàyɔm, iful ande kyan'bwà,

25 wɛɛ ndaa a Mwol yà mbul a in'tye.

Kyekà, ndaa ayi, yà Làsaŋ Aŋàbwaŋ alà bàlakyään.