Bible Iyansi 2 TƐSALƆNIKÀ 1

Un'kaan wàyweel akà

Bàtɛsalɔnikà

Nsɛmà

Un'kaan a Pɔl wàyweel akà Bàtɛsalɔnikà afuurà ndaa bàtɛn uboo a un'kaan wàtàtwɛb: ngyeel a Mwol unsà làkoo. Ntɔn bàmbɔɔn bàfàkyey uyɔl naa ngyeel ayi yàkyàkwo itaan, un'kaan awà akwen mudwa an'kyän an'be amà.

Kiin a ndaa

Asànaa unsà un'kaan wàtàtwɛb, Pɔl, Silàvɛ anà Tumàtɛ ban'pà mbɔr akà baar ban'söön ba un'kaan 1.1-2.

Wa wàŋakab mbwo yweel: Mbwo yàtàtwɛb yàŋàyaamà unsà ngyööb. Yà nsɛmà, nde asɔnà iköŋ a ngwal, itàkal naa mpay a nkwaaŋ: nde an'tüüb anà an'lɔŋ unsà ntsuul a ndaa a Nzam taaŋ usàmɛnà Mwol Yɛsu. Ikal kyàyweel ikanà làkwikilà a aklistɔ ntɔn muyöb balàbal a « ilä a Mwol » anà muyilɔn. Mbwo yàyweel yà ndaa mupà ngwal. Mbwo yà ntsüü yà ntɔn mbɔr a Pɔl anà musà kɔɔ. Un'kaan wàyweel wà akà Bàtɛsalɔnikà ntsüü awa, yà balàbal asànaa un'kaan wàtàtwɛb. Nde wa kàsön ntsü a mbul 51 itàkal 52 utaaŋ abi là. Wa kàläb mbwo nsil ya ayà kun'kaan wàtàtwɛb. Mbeel ayi yà ntɔn bi iduub mii anà iyamà Nzam awà Taaràbi: « Itsuuŋ bi unsube » (Màtay 6.13).

Mbɔr

1 Pɔl, Silàvɛ anà Tumutɛ.

Bi ban'pà mbɔr akà Ikööŋ akyà kyà Taa Nzam anà kyà Mwol Yɛsu Klistɔ: 2 Wɛy Taaràbi Nzam anà Mwol Yɛsu Klistɔ bàlapɛ kab a ngway anà duu!

Nsaŋ mpal usàyà Yɛsu

3 Atɔŋ, taaŋ lanswà bi ikyer afuur an'tɔɔn akà Nzam ntɔn bɛ. Yubwaŋ naa bi ikyer abun, ntɔn làkwikilà abɛ làmuyɛl mbɔɔn, anà ukwen a umwɛy umwɛy uboo a bɛ akatɔŋ bumwɛy bàsöönà. 4 Kyakin ifàswaŋ bi ngaal uboo a Ikööŋ a Nzam ntɔn muküünà abɛ anà làkwikilà abɛ unsà nkwaaŋ anà mpay aŋàdiir làmanà bɛ.

5 Abà ya ikamɛɛyà ntsüül a nsaŋ a Nzam yàbalàbal, ntɔn bɛ làmɛnà bàŋàkwo ntɔn Imwol a Nzam akyà làmanà bɛ mpay. 6 Ya yà balàbal naa Nzam ufuur ngyɛb aŋàdiir akà baar bàfàlapà unkiiŋ, 7 anà nde afàpà, akà bɛ baar làmanà mpay, ngyɔ̈ɔ̈r anà akà bi, umpal a imɛɛy a Mwol Yɛsu fà du anà akyeey ande bunkaak a ngwal. 8 Nde asàyà uboo a làlem a mbaa ntɔn mupà ntaaŋàmbar akà baar mpa bàyöb Nzam anà mpa bàfàkyey Làsaŋ Aŋàbwaŋ a Mwol abi Yɛsu. 9 Ntaaŋàmbar aba isàkal bwà a mbul a in'tye, ukwɛl kusà a Mwol anà làkoo ande làngwal, 10 mpal usàyà nde muwal làkoo amu aŋin'kyɛɛl ande anà itääŋ amu aŋàlàkwikilà, kyekà bɛ làkyey imbäl abi. 11 Kyakin bi ikayamà taaŋ lanswà ntɔn bɛ, ntɔn Nzam abi kàlabuul bàŋàkwo mukal uboo a mbeel kàlasi nde, anà, u mbwo a ngwal ande, nde kàlabay mukwey ngyal abɛ mukyer ubwaŋ anà làkwikilà làfàmɛnà unsà isal. 12 Abun, bɛ làsàsyaŋà ikɔb a Mwol abi Yɛsu anà nde sye akyer asàlasyaŋà, asànaa làkwen kab a ngway a Nzam abi anà là Mwol Yɛsu Klistɔ.