Bible Iyansi NGALÀTYÀ 1

Un'kaan akà

Angalàtyà

Nsɛmà

U mbul wà nkam tär kusà a mböör a Yɛsu Klistɔ, Bàsɛlɛtɛ Golwa aŋàsin tii kà Azi Minɔ̈ɔ̈r (ŋàbawà bàfàbel naa Türki a Azi), ba bàbwaay paa. Itoo aba, Angalàtyà, bàwɛl itiir a mɛɛn a bul bàfàbel naa Ankara. Bumwɛy bàyä Làsaŋ Aŋàbwaŋ u ngwal a ntööm Pɔl unsà nkyeen a isal ande yàyweel anà yàtär (Ian 16.6; 18.23).

Baar bumwɛy bàyilabà ntööm Pɔl. Baar abà bàyilɔɔŋà naa aklistɔ mpa abà itoo a Ayudà, bàlab un'kɔɔn a Ayudà anà ba sye bàkyer akyɛy. Wɛɛ akà Pɔl, nde kàmɛn naa ndɔ̈ɔ̈m atubàyi ya balàbal yatɛy a Làsaŋ a Yɛsu Klistɔ: ya yàsyee aklistɔ a Ngalàtyà unsà isɔ a dweelà. Mpal kàwem nde, mbalà yumwɛy kà Ɛfɛsɔ, naa baar abà bàmɛnà naa ban'kyey ndaa a aŋankir ande, nde kasöön un'kaan mwɛy wàngwal.

Pɔl kàkyer mbalà tär ntɔn mufuur atɔŋ abà u mbwo a « Làsaŋ Aŋàbwaŋ »:

- Nde wàmutàswaŋ ndaa ayà kan'man nde uboo a mɔ̈ɔ̈ ande ŋakwo asànaa: mbuul a mpem ande, mbwo kàwɛl nde u Ndwà a Nzam a Yɛlusàlɛm, naa aklistɔ mpa abà itoo a Ayudà, bàfàlab tɛy un'kɔɔn a Ayudà, nde kàngwɛŋ anà ntööm Petɔlà ntɔn mbar bàtsül musyääl un'kɔɔn awà. Pɔl wà mukyey a ikɔ̈b naa nde wà ntööm, anà wà mundyär ngwalàngwal naa buur abà sye Mwol kun'pɛ.

- Nde wàmuswaŋ u mbwo a in'kaan a Nkwà Itaan naa, mɔ̈ɔ̈ watɛy mulab un'kɔɔn a Ayudà, wɛɛ wàmusà làkwikilà akà Yɛsu Klistɔ mpɛl.

- Mumay, nde wàmulɔm naa wɛy Dweelà a Nzam ukäär mɔ̈ɔ̈ abɛ, ntɔn Dweelà afàbɔr ndaa akün yifà ifa, sin sin ukwen.

- Ikööŋ imwɛy imwɛy, un'klistɔ umwɛy umwɛy uwem làböl alà anà akyey la ungyɛl a mpem, ntɔn mulwomà unsà isɔ.

Mbɔr

1 Pɔl, ntööm, kà unsà ngwal a baar itàkal u mbwo a mbuur mwɛy anki, wɛɛ u mbwo a Yɛsu Klistɔ anà Taa Nzam awà kun'wiiy uboo a akü, 2 anà atɔŋ banswà abà anà mɛ, mɛ an'pà mbɔr akà Ikööŋ abyà u Ngalàtyà: 3 Wɛy kab a ngway anà duu a Taaràbi Nzam anà Mwol Yɛsu Klistɔ byàkäl anà bɛ. 4 Klistɔ kàpɛ mɔ̈ɔ̈ ande ŋakwo ntɔn man'be abi, ntɔn mukigyɔɔr u mɛɛn an'be mà, unsà ukwen a Nzam, awà Taaràbi. 5 Wɛy làkoo làkäl anà nde mbul a in'tye! Wöwöö.

Làsaŋ Aŋàbwaŋ là làmwɛy mpɛl.

6 Mɛ in'wà unsà ubem muman naa bɛ làbà nswɛy musàkɔɔb mbuur awà kàlabel u mbwo a kab a ngway a Klistɔ, ntɔn mulab Làsaŋ Aŋàbwaŋ lànsöön. 7 Ŋaa, Làsaŋ Aŋàbwaŋ asin lànsöön latɛy, wɛɛ bà anà baar uboboo abɛ bàkwen mukàlatwääl lingyoomà anà musɔɔm Làsaŋ Aŋàbwaŋ abar là Klistɔ. 8 Wɛɛ ŋàbawà, isàkal naa we anà mbuur mwɛy, itàkal bi, itàkal sye naa un'kyeey kan'fà du, kàmàlakyään Làsaŋ Aŋàbwaŋ lànsöön anà la akwà kàlakyään bi, wɛy ŋakaan kun'käär! 9 Bi kàkyàtɛn ya itaan, mɛ ya an'fàtɛn apanà naa: isàkal naa we anà mbuur mwɛy kan'yà mukàlakyään Làsaŋ Aŋàbwaŋ lànsöön anà la akwà làwɛl bɛ, wɛy ŋakaan kun'käär!

10 Ntɔn, apanà, nkye mɛ in'wàmuleŋ ubwaŋ akà baar lɛɛ akà Nzam? Naa nkye, mɛ in'kwen musà làbɔ̈ɔ̈n akà baar? Ilàkal naa mɛ alàkwen musà làbɔ̈ɔ̈n akà baar, mɛ alàfàkal anki un'syääl a Klistɔ.

Pɔl kàbulà aben ntööm

11 Ntɔn, atɔŋ, mɛ alàkyään naa: Làsaŋ Aŋàbwaŋ kàlakyään mɛ, la kà là an'kyän a mbuur a mɛɛn anki. 12 Ntɔn la kà mbuur kan'pɛ anki, itàkal naa mbuur kan'lɔ̈ɔ̈ŋ, wɛɛ u mbwo a imɛɛy a Yɛsu Klistɔ.

13 Ntɔn, bɛ làkyàwem itaan nkääl kàkäl mɛ ayà uboo a iyudà: naa sye un'fur a nkyɛl nà mɛ kàkäl awà, umpal kàmɛɛyà mɛ Ikööŋ a Nzam nkwaaŋ ntɔn mupay kya. 14 Mɛ, mɛ kàkyen usà unsà iyudà, mulyaaŋ bàmbɔɔn uboo a nkööl amɛ anà uboo a làfuun amɛ u mbwo a un'kanà amɛ ntɔn nkääl a ankaa amɛ.

15 Wɛɛ Nzam, unsà kab a ngway ande, nde kan'sɔ̈ɔ̈l fà an'bäl a maa anà kan'bel mukun'syääl, nde kàmɛn naa yà ubwaŋ 16 nde kan'mɛɛy Mwan ande, ntɔn mɛ in'kyään Làsaŋ Aŋàbwaŋ ande akà baar mpa abà Ayudà, ukɔɔn alab an'lwɛŋ a mbuur, 17 itàkal mubeenà Yɛlusàlɛm ntɔn mukàbweey anà baar abà bàbulà antööm kusà a mɛ, mɛ kàkyen Arabi. Ungö apan mɛ kàfurà Damas. 18 Ungö a mbul tär, mɛ kàbeenà Yɛlusàlɛm ntɔn mukàbweey anà Petɔlà. Mɛ kàkyer ilä kwem aŋityeen apà nde. 19 Mɛ kàmɛn anki ntööm asin, nà Zyak mpɛl, un'tɔŋ a Mwol. 20 Ya amàlasöön mɛ yi, mɛ an'tɛn u mii a Nzam, kà loor anki.

21 Apan, mɛ kàkyen itiir a Silya anà Silisi. 22 Wɛɛ Ikööŋ a aklistɔ abyà u Yuday byàyöb anki ntabwey amɛ. 23 Bya byàwem mpɛl naa: « Mbuur akwà kàyimɛɛyà bi nkwaaŋ sɛmà itaan, ŋàbawà nde wàmuyilɔɔŋ làkwikilà alà kàsi nde muküünà mudwa la. » 24 Wɛɛ bya byàsyee Nzam làkoo ntɔn mɛ.