Bible Iyansi LUKÀ 1

Làsaŋ Aŋàbwaŋ kàsön

Lukà

Nsɛmà

Bi isàlab un'kaan a Pɔl akà Bàkɔlintɔ u kab lànà mbwo yà kwem aŋinà, ikamɛnà naa un'kaan awà Lukà un'sam a Pɔl kàsön. Nde kàkäl anki un'yudà, nde kàkäl un'ngɛlɛki.

Nde un'kaan awà kàsöön Tyɔfil u mbul ayà uboo a mbul an'kwem an'syaam aŋinà anà an'kwem nsambwaar ungö a mböör a Yɛsu.

Lukà kàläb ndaa yanswà bàsön Malakɔ anà Màtay, wɛɛ nde kàkwɛy ndaa asin yà ifà ifà. Ndaa kàsön nde ayi:

- Muswaŋ naa nde kàläb pànsi pànsi ndaa yanswà kàtɛn anà kàkyer Yɛsu.

- Mböör a Ywan anà yà Yɛsu akyeey bàkyään ya kusà a mböör aba.

- Iküün a Yɛsu kyàsɛmà akà Adam, iswaŋà naa akà Nzam. Abun nde kà un'yudà mpɛl anki, wɛɛ nde wà mbuur a in'sɛŋ myanswà u mɛɛn.

- Nkyeen a Yɛsu Yɛlusàlɛm fà Ngalilɛ anà ndaa asin yà ifà ifà kàkyer nde anà mpay a ukwà kàmɛn nde kwo.

- Lukà akyäänà Làsaŋ Aŋàbwaŋ akà baar mpa abà Ayudà. Iswaŋà naa Yɛsu kà wà ntɔn Ayudà mpɛl anki. Waa in'sɛŋ myanswà u mɛɛn myàyöb anà myàkyey naa nde wà Un'tswää a mɔ̈ɔ̈ a baar banswà.

- Ndaa ayà uboo a un'kaan awà ayi:

- 1.1-4 Lukà kan'söön Tyɔfil

- 1.5-2.52 Mböör a Ywan anà yà Yɛsu anà imbɛy aba

- Kab 3.1-20 Isal a Ywan Un'düümà

- Kab 3.21-4.13 Ndüümà a Yɛsu anà ndɛb ande

- 4.14-9.50 Isal a Yɛsu u Ngalilɛ

- 9.51-19.27 Yɛsu kan'lwomà u Ngalilɛ mukyà Yɛlusàlɛm

- 19.28-23.56 Ilä a Yɛsu byà ntsüü u Yɛlusàlɛm

- 24.1-53 Yɛsu kan'wiyà, kan'mɛnà akà baar anà kan'beenà du.

Nsɛmà

1 Un'sam Tyɔfil.

Baar mbɔɔn bàbön musɔn ndaa yàlyaaŋ uboo a bi. 2 Ba ya bàsön asànaa bàkyään baar bàmɛn ya u mii fà nsɛmà anà bàbulà asyääl a ndaa a Nzam. 3 Lalan mɛ sye kàläb mɛ ndaa ayi pànsi pànsi fà nsɛmà aya. Un'byääl Tyɔfil, yubwaŋ naa mɛ asöön ndaa ayi. 4 In'kyer mɛ abà ntɔn ngye ayöb naa an'lɔɔŋ kàwɛl ngye mà ndandaa.

Un'kyeey mwɛy kan'kyään mböör a Ywan Un'düümà

5 Mpal kàkäl Ɛlɔdi mfum a Yuday, kàkäl anà ngaŋ mwɛy wà itsuŋ a angaŋ a Abya ikɔb ande Zakàlye. Un'kyay ande, mbuur a mbil a Alɔn, ikɔb ande Làsàbɛr. 6 Ba bàbɔ̈ɔ̈l bàkäl baar a balàbal u mii a Nzam. Ba bàfalabà ubwaŋàbwaŋ in'kɔɔn myanswà anà nswɛɛŋ yanswà yà Mwol. 7 Wɛɛ ba bàkäl anki anà baan ntɔn Làsàbɛr kàbör anki, ba bàbɔ̈ɔ̈l bàkäl aŋànün.

8 Ilä mwɛy, Zakàlye kàkäl musal ingaŋ ande kusa a Nzam, ntɔn la làkäl taaŋ a itsuŋ aba musal. 9 Mulab nsyääl a angaŋ, löb làbü akà nde ntɔn mubilà uboo a idwà a Mwol ntɔn musà tswà mbaa kwo. 10 Umpal musà tswà mbaa, un'sɛŋ a baar wanswà kàkäl u nsà muyamà. 11 Kà imbürà, un'kyeey a Mwol mwɛy kàyàmɛnà akà Zakàlye: nde kàmbär u kɔɔ a ibaal a mɛsà a tswà. 12 Mpal kàmɛn Zakàlye un'kyeey awà, lileŋ làkyer un'wal, bɔɔmà làkyer un'kaar. 13 Wɛɛ un'kyeey kàtɛn a nde naa: « Zakàlye, twon an'man bɔɔmà, ntɔn Nzam akyàwem ngyamàkà angye: un'kyay angye Làsàbɛr ayaböör mwan baal. Ngye ayun'pà ikɔb a Ywan. 14 Nde asàkal ntwà a un'sak mbɔɔn ntɔn ngye. Baar mbɔɔn sye bàsàman un'sak ntɔn mböör ande. 15 Ntɔn nde asàkal mbuur a kölàköl u mii a Mwol. Nde usanwaa anki vin, itàkal man manswà bàfàyɔr. Nde asàkal aŋàyɔl a Dweelà In'kyɛɛl sɛmà dum a ngwän. 16 Nde asàfuur baan a Isàlɛl mbɔɔn akà Mwol awà Nzam aba. 17 Nde isal ande asàkyer u dweelà anà u ngwal asànaa ŋangɔɔm Ɛlya, ntɔn mutüüb bàtaa anà baan aba, mufuur baar a un'tswe ngwal muyweer asànaa baar a balàbal. Nde asàboom un'sɛŋ aŋàlɔ̈ɔ̈n ntɔn Mwol. » 18 Zakàlye kàtɛn a un'kyeey naa: « Mɛ ya in'yàyöb aben? Ntɔn mɛ in'wà un'nün anà umpal ayi un'kyay amɛ sye wàŋànün. » 19 Un'kyeey kun'fuur naa: « Mɛ, mɛ in'wà Ngàbàlye. Mɛ in'fàkal tsütsü apà Nzam, nde kan'töm muyäm anà ngye anà mukakyään ndaa aŋàbwaŋ ayi. 20 Le, ngye ayàbulà nkiin, ngye ayàkwo anki musà ndaa tii mpal isàkwo ndaa ayi, ntɔn ngye ndaa amɛ akyey anki. Ndaa ayi isàmɛnà umpal ya paa. »

21 Umpal ayin, baar banswà bàkäl mudilà Zakàlye u nsà, bàmukabemà naa nde kan'kàkyer itaan uboo a idwà. 22 Wɛɛ mpal kàyàtoo nde, nde kàkwe anki muyäm anà ba, apan ba waa bàyöb naa nde kan'man impà kà idwà. Muyäm a ba, nde kàyaswaŋà mpin, mun kàkälà wàŋàdübà.

23 Umpal kàmay nde ilä a isal ande u ndwà a Nzam, nde kàfurà ndwà ande. 24 Ungö a ilä, un'kyay ande Làsàbɛr kàkäl yöm. Apan nde kàkàyee ngɔn tyeen. Nde kàtɛɛnà naa: 25 « Abà ubwaŋ a Mwol kan'kyer nde akà mɛ: ŋàbawà nde kan'tɔɔm ileer ande udu a mɛ ntɔn mulwom nswɛn amɛ u mii a baar banswà. »

Un'kyeey mwɛy kan'kyään mböör a Yɛsu

26 U ngɔn wàsyaam, Nzam kàtöm un'kyeey Ngàbàlye u bul mwɛy là Ngalilɛ ikɔb a la Nasàlɛr, 27 akà mwan un'kaar unkɔr awà kàtɛ Yɔsefi mbuur a mbil a David ntüüm, ikɔb ande Màlye. 28 Un'kyeey kàbilà u ndwà ande waa kàtɛn naa: « Mbɔr angye, Mwol kan'swaŋ ubwaŋ ande mbɔɔn akà ngye, nde wà anà ngye. » 29 Màlye kàmɛn ndaa yubem, waa kàyayweerà naa mbɔr ayi ikaswaŋà aben. 30 Apan, Un'kyeey kàtɛn a nde naa: « Màlye, twon an'man bɔɔmà, ntɔn Nzam kàmaswaŋ ukwen ande banswà. 31 Le, ngye ayàkal yöm, ngye ayàbɔr mwan baal, ngye ayun'pà ikɔb a Yɛsu. 32 Nde asàkal mbuur a kölàköl, bàsun'beelà Mwan a Nzam a Dudu. Mwol Nzam asun'sà u kir a imfum a nkaa ande David. 33 Nde asàyaal ipepey u ndwà a Yakɔb, imwol ande sye isàtsü anki. » 34 Màlye waa kàtɛn a un'kyeey naa: « Ya abwɛy iyàkal aben ntɔn mɛ ŋàtàkal anki anà baal? » 35 Un'kyeey kun'fuur naa: « Dweelà In'kyɛɛl ayàkal udu angye, ngwal a Nzam a Dudu ikyer ayafwee asànaa kilàpib. Lalan mwan in'kyɛɛl ayàbɔr ngye bàsun'beelà Mwan a Nzam. 36 Le, un'tɔŋ angye Làsàbɛr sye we anà yöm a mwan baal unsà inün ande. Bàfatɛɛnà naa nde wà ikɔb, wɛɛ ŋàbawà yöm ande là u ngɔn wàsyaam. 37 Ntɔn undiir kan'kwo mukɔ̈ɔ̈n Nzam watɛy. » 38 Apan Màlye kàfuur naa: « Mɛ in'wà un'tsüüŋ a Mwol. Wɛy ndaa yanswà an'tɛn ngye ikäl abwɛy. » Un'kyeey waa kàsun'wɛy.

Màlye kan'kàler Làsàbɛr

39 Ungö apan, Màlye kàkyen agyägyä u bul mwɛy udu a mɔŋ u mɛɛn a Yuday. 40 Nde kàbilà u ndwà a Zakàlye, waa kàpɛ Làsàbɛr mbɔr. 41 Kyekà, umpal kàwem Làsàbɛr mbɔr a Màlye, mwan kànini uboo a an'bäl ande. Làsàbɛr kàyöl a Dweelà In'kyɛɛl, 42 waa kàsi in'kwɛŋ: « Nzam kàkyapà làpɛɛm aŋàsöönà akaar banswà, mwan ayàbɔr ngye we anà làpɛɛm a Nzam. 43 Làkoo alà lan'fà ken naa ngwän a Mwol amɛ uyi akà mɛ? 44 Ler, umpal kan'wem mɛ mbɔr angye, mwan awà kan'bäl amɛ kan'nini ntɔn un'sak mbɔɔn. 45 Ngye awà un'kaar aŋun'sak, ngye kàsi làkyän naa Mwol ayàkyer ndaa kakyään nde. »

Diim a Màlye

46 Waa Màlye kàtɛn naa:

« U mɔ̈ɔ̈ amɛ wanswà mɛ in'kwen usyäŋà Mwol,

47 mpem amɛ yan'yɔl a un'sak

ntɔn Nzam, Un'tswää a mɔ̈ɔ̈ amɛ,

48 ntɔn nde kàtɔɔm ileer ande udu a làbɔ̈ɔ̈n a un'tsüüŋ ande.

Lalan, sɛmà apanà ngyääl yanswà isatɛɛnà a mɛ naa un'kaar aŋun'sak,

49 ntɔn Ŋangwal kàkyer indiir a kölàköl ntɔn mɛ.

Ikɔb ande kyà in'kyɛɛl,

50 U mbul a intye nde wàŋàyɔl a ngyɛb

ntɔn baar bàfun'kyɛɛl.

51 Nde kàswɛŋ ikɔ̈b ande musyääl ngwal a kɔɔ ande:

nde kàpay baar aŋàyɔl a uyɔl u mpem aba,

52 nde kàtyeey amfum kà an'kir aba mà imfum

anà kàsɛɛn baar a làbɔ̈ɔ̈n.

53 Nde kàyööl aŋangyal a indiir mbɔɔn,

wɛɛ nde aŋin'naaŋ kafuur an'kɔɔ a ipɔl.

54 Nde kàbay un'tsüüŋ ande Isàlɛl:

nde kàyɔbà ngyɛb ande asànaa kàswɛŋ nde bànkaa abi,

55 akà Abàlam anà ikyee ande kyà mbul a in'tye. »

56 Màlye kàkäl isii a ngɔɔn tär akà Làsàbɛr, apan waa kàfurà ndwà ande.

Mböör a Ywan Un'düümà

57 Taaŋ a Làsàbɛr mubɔr làkwe la, nde kàbör mwan baal. 58 Baar a tsütsü anà baar a mbil ande bàwem ba naa Mwol kan'swaŋ ngyɛb ande mbɔɔn akà nde, ba bàsäŋà anà nde. 59 Ilä kyànaan ungö a mböör ande, ba bàyi mutsul mwan. Ba bàkweenà mukun'pà ikɔb a taarànde Zakàlye. 60 Wɛɛ ngwän kàtɛn naa: « Aay, bàyun'beelà Ywan! » 61 Ba bàtɛn a nde naa: « Aa, u ndwà abɛ mbuur awe anà ikɔb akyɛy watɛy! » 62 Abun, ba waa bàfuul taarànde muswaŋà mpin ntɔn muyöb naa ikɔb nà nde ukwen mupà mwan ande. 63 Zakàlye kàlɔ̈m kilàbää, waa kàsɔ̈n abà: « Ndandaa ikɔb ande Ywan. » Baar banswà bàkyer abem. 64 Apan sye, ndaa a Zakàlye waa yàsabà, waa kàsɛmà musà Nzam làkoo. 65 Abun, baar a tsütsü bàmɛn bɔɔmà. Ndaa ayi baar bàsaamà ya u myɔŋ a Yuday myanswà. 66 Baar banswà bàweemà ya bàkäl muyweerà anà mutɛn naa: « Kimwan aki ayàkal aben? » Ndandaa kɔɔ a Mwol làkäl anà nde.

Diim a ngɔɔm a Zakàlye

67 Taarànde Zakàlye kàkäl aŋàyɔl a Dweelà In'kyɛɛl, waa kàbulà mutà ngɔɔm anà mutɛn naa:

68 « Wɛy Mwol uwɛl nsaak, Nzam a un'sɛŋ a Isàlɛl,

ntɔn nde kàyàler anà kàtsuuŋ wa kà isɔ.

69 Nde kàtwey Un'tswää a mɔ̈ɔ̈ a ngwal ntɔn bi

uboo a ndwà a un'tsüüŋ ande mfum David.

70 Ayi ndaa kàkyään nde itaan u mun a aŋangɔɔm ande bà in'kyɛɛl:

71 ntsuuŋ abi kà an'kɔɔ a aŋankir abi

anà kà an'kɔɔ a baar bàfàkyer bi ube.

72 Nde kàswɛŋ ubwaŋ ande akà bànkaa abi.

Nde sye kàdiimà anki kyän ande là in'kyɛɛl.

73 Ndandaa, Nzam kàdi kyän akà nkaa abi Abàlam,

74 mukà itsuuŋ kà ikɔ̈b a aŋankir abi

anà mukà ipà mbwo mukun'syääl ukɔɔn bɔɔmà,

75 ntɔn bi ikälà baar a in'kyɛɛl anà bàbalàbal kusà ande

kà ilä a mɔ̈ɔ̈ abi byanswà.

76 Wɛɛ ngye mwan amɛ, bàsabeelà ŋangɔɔm a Nzam a dudu,

ntɔn ngye asàfwel kusà a Mwol ntɔn muyilà mbwo ande

77 anà mulɔŋ un'sɛŋ ande naa nde akyer ayà mutswà nde mɔ̈ɔ̈

ntɔn nde ayun'dwääl nkul a man'be ande.

78 Nzam abi wàŋàyɔl a ngyɛb, lalan kà itööm nde pɛɛlà làfü du asànaa taaŋ làfàsɛnà la,

79 ntɔn mupɛɛlà baar abà uboo a làpib anà u mbwo a ukwà,

ntɔn musyen bi u mbwo a duu. »

80 Mwan wa kàkäl muyɛl u ndür anà u dweelà. Nde kàkälà u nsye a ipɔl tii mpal kàyàmɛnà nde u mii a un'sɛŋ a Isàlɛl.

LUKÀ
<
1
>