Bible Iyansi MÀTAY 1

Làsaŋ Aŋàbwaŋ kàsön

Màtay

Nsɛmà

Un'kaan awà ukaswaŋà anki mbuur kàsön wa, wɛɛ aŋuyɛnà mbɔɔn bàkasii naa wa Màtay kàsön, un'yudà aŋàtaŋ, un'füür a itɛr. Nde wà umwɛy uboo a Antööm kwem aŋiyweel, bàfun'bel sye naa Lɛwi. Nde wa kàsön ntsü a mbul an'kwem an'syaam, bumwɛy naa an'kwem nsambwaar, bumwɛy sye naa an'kwem naan. Nde wa kàsön ntɔn Ayudà, mukaswaŋ naa Mwol Yɛsu, Un'tswää a mɔ̈ɔ̈, kàyi mukwey ngɔɔm. Lalan ukafurà nde mbalà mbɔɔn u Nkwà yà itaan.

Isin a ndaa a un'kaan awà kyà « Imwol a du », « Imwol a Nzam ».

Akà Màtay bàmanà in'lwaaŋ a kölàköl myà Làsaŋ Aŋàbwaŋ kàläb Malakɔ:

- Làsaŋ a Ywan Un'düümà

- Ndüümà anà ndɛb a Yɛsu

- Isal a Yɛsu u Ngalilɛ, mper kàyilyääŋà nde anà kàyilɔɔŋà nde in'sɛŋ a baar anà kàyikɔɔrà nde abɛy. Ungö apan, nkyeen ande mper a Yɛlusàlɛm. Kwo nde kàkyer ilä ikikye: mpɔsà mwɛy yàkàtsü a mbar a nkweel ande, a ndwääl ande, a ndaa imbürà yà kölàköl yà ngwiiyà ande, anà yà mɛɛnà ande.

Wɛɛ Màtay kan'tàwal taaŋ mbɔɔn u nsɛmà ntɔn an'sin, mböör anà imbɛy a Yɛsu. Apà, nde wàmuswaŋ kusà naa Yɛsu wa usàlab nde wà unsà Làsaŋ Aŋàbwaŋ ande wà nà: Mfum, Un'tswää a mɔ̈ɔ̈ awà bàbön mupà, wà Mànwel sye, iswaŋà naa: Nzam uboo a bi. U mbwo a nde Nzam asàkölà ndaa kàkyään nde unsà Nkwà yà itaan.

- Làsaŋ Aŋàbwaŋ kàsön Màtay làmuswaŋ sye ndaa a nsöön: nkööŋà a ndaa mbɔɔn yà an'lɔɔŋ a Yɛsu unsà ntɛɛn tyeen yà kölàköl:

- 1. « An'lɔɔŋ udu a mɔŋ » màmuswaŋ lää a ndandaa alàbàdilà akà baar akün bà « Imwol a du ».

- 2. Nswɛɛŋ bàpɛ akà baar ban'kwo mukyään ngyeel a Imwol aki.

- 3. Ngyee a Imwol aki yàŋàswaŋ u mbwo a itim nsambwaar: Imwol aki kyà ŋàyee apanà, wɛɛ iböŋ a kya isàkal aŋàyäy.

- 4. Möö nà kan'kwo mukal uboo atɔŋ u mɛɛn akün amà Imwol.

- 5. Iböŋ a ntsüü a Imwol aki ban'kwo mudil aben.

Abun, unsà Làsaŋ Aŋàbwaŋ kàsön Màtay, Yɛsu akamɛnà asànaa Un'lɔɔŋ ayàsɛmà mɛɛn akün mà Imwol, anà ayàpà baar bàbilà kwo an'lɔɔŋ amà ba amà ndöŋ ntɔn ba bàkäl ambäl akà baar bumwɛy.

Itoo a Yɛsu

(Luk 3.23-38)

1 Un'kaan a un'lwaaŋ a Yɛsu Klistɔ, itoo a David, itoo a Abàlam.

2 Abàlam kàbör Isak, Isak kàbör Yakɔb, Yakɔb kàbör Yudà anà atɔŋ ande, 3 Yudà kàbör Falesi anà Zalà, ikɔb a ngwän aba Tamar, Falesi kàbör Isilɔn, Isilɔn kàbör Alam, 4 Alam kàbör Aminadab, Aminadab kàbör Naasɔn, Naasɔn kàbör Salmɔn, 5 Salmɔn kàbör Bɔɔzi, Rayab kàkäl ngwän ande, Bɔɔzi kàbör Yɔbɛd, Luti kàkäl ngwän ande, Yɔbɛd kàbör Yɛsɛ, 6 Yɛsɛ kàbör mfum David.

David kàbör Salàmun, ngwän ande kàkäl un'kyay a Uli. 7 Salɔmun kàbör Rɔbɔwam, Rɔbɔwam kàbör Abya, Abya kàbör Asa, 8 Asa kàbör Yɔsafat, Yɔsafat kàbör Yɔlam, Yɔlam kàbör Ɔsya, 9 Ɔsya kàbör Yɔwatam, Yɔwatam kàbör Akazi, Akazi kàbör Isikyä, 10 Isikyä kàbör Mànasi, Mànasi kàbör Amɔn, Amɔn kàbör Yɔsyä, 11 Yɔsyä kàbör Yɛkɔnya anà atɔŋ ande, u paŋà bàsɔ̈ɔ̈l baan a Isàlɛl nsi u Babilɔn.

12 Ungö a nsɔ̈ɔ̈l a nsi, Yɛkɔnya kàbör Salàtyɛl, Salàtyɛl kàbör Zɔrɔbabɛl, 13 Zɔrɔbabɛl kàbör Abyudi, Abyudi kàbör Ɛlyakim, Ɛlyakim kàbör Azɔr, 14 Azɔr kàbör Sadɔki, Sadɔki kàbör Akim, Akim kàbör Ɛlyudi, 15 Ɛlyudi kàbör Ɛlyazar, Ɛlyazar kàbör Matan, Matan kàbör Yakɔb, 16 Yakɔb kàbör Yɔsɛfi, un'dim a Màlye awà kàbör Yɛsu awà bàfàbel naa Klistɔ.

17 Abun, yanswà yàkäl ngyääl kwem aŋinà fà Abàlam mukàman David, yàfàlyaŋ sye ngyääl kwem aŋinà fà David tii u paŋà alà bàsɔ̈ɔ̈l baan a Isàlɛl nsi u Babilɔn, ngyääl kwem aŋinà sye yàfàlyaŋ fà nsɔ̈ɔ̈l a nsi u Babilɔn tii u paŋà alà bàbör Klistɔ.

Mböör a Yɛsu Klistɔ

(Luk 2.1-7)

18 Le, mböör a Yɛsu Klistɔ yàkäl abà: Ngwän ande Màlye kàkäl un'kaar kàtɛ Yɔsefi ntüüm, wɛɛ kusà ba mutàtüüb ndür, nde kàmɛnà anà yöm unsà ngwal a Dweelà In'kyɛɛl. 19 Wɛɛ un'dim ande Yɔsɛfi, ntɔn kàkäl nde mbuur a balàbal, nde kàkwen anki mukun'mɛɛy nswɛn u mii a baar, lalan kàwɛl nde an'kyän u mpem ande mukun'wɛy kà unku. 20 U taaŋ kàyweerà nde abà, un'kyeey a Mwol mwɛy kàyàmɛnà akà nde u ndwɛy, waa kàtɛn a nde naa: « Yɔsefi, mwan a David, twon an'man bɔɔmà muwal un'kyay angye Màlye, ntɔn yöm alà kan'bäl ande lan'fà akà Dweelà In'kyɛɛl. 21 Undiir awun, nde ayàbɔr mwan baal, ngye ayun'pà ikɔb a Yɛsu, ntɔn nde asàtswà mɔ̈ɔ̈ a un'sɛŋ ande unsà man'be a wa. »

22 Ndaa ayi yanswà yà ntɔn undiir kàtɛn Mwol u mun a ŋangɔɔm ande ukwe:

23 « Le, mwan un'kaar unkɔr asàkal yöm, nde asàbɔr mwan baal,

bàsun'beelà Mànwel »,

iswaŋà naa « Nzam wà uboo a bi ».

24 Mpal kàwiyà nde u twaal, Yɔsefi kàkyer ndaa kun'swɛŋ un'kyeey a Mwol, waa nde kàsi un'kyay ande u ndwà. 25 Wɛɛ nde kàtüüb anki ndür anà nde tii mpal kàbör nde mwan baal awà kàpɛ nde ikɔb a Yɛsu.