Bible Iyansi TITƆ 1

Un'kaan akà

Titɔ

Nsɛmà

Un'kaan wà Pɔl kàsön akà Titɔ awà kàsälà anà nde. Un'kaan awà anà in'kaan wàtàtwɛb anà wàywɛɛl kàsɔn Pɔl akà Tumàtɛ bàfàbel naa « in'kaan a aseey ».

Uboo in'kaan ami, Pɔl akapaa an'lwɛŋ akà Titɔ asànaa kàpɛ nde akà Tumàtɛ naa nde aler aben Ikɔ̈ɔ̈ŋ a aklistɔ abyà u nsɛmà. Aŋuyɛnà bàfàkyey naa un'kaan akà Titɔ bàsön ungö a ntoo a Pɔl u bɔlokà u mbalà yàyweel kisii a 64 - 65 ungö a mböör a Yɛsu. Titɔ kàkal un'ngɛlɛki, waa kàbulà un'klistɔ. Pɔl kun'syen u Yɛlusàlɛm ntɔn mukàbwey anà andweer a Ikööŋ kwo. Wɛɛ Andweer a Ikööŋ bamwɛy bàkweenà naa bàkyɛy aklistɔ mpa abà Ayudà ntɔn muwà mɔ̈ɔ̈.

Ungö a mbaaŋ, andweer bàpɛ Pɔl ibaal musal uboo a baar mpa abà Ayudà mukɔɔn alab un'kɔɔn awà. Abun sye, Titɔ bun'kyɛy anki. Pɔl kàsun'wɛy u Krɛt ntɔn musɔɔl anà musà andwer kan'bul manswà kwo.

Pɔl kun'swaŋà naa ba bàkal anà indweer anà bàlab an'lɔɔŋ a ndandaa. Wɛy ba bàkɔɔn akal baar a man'be, wɛɛ baar a nkääl aŋàbwaŋ, bàyöb ndandaa. Mbuur ukwo anki muwà mɔ̈ɔ̈ u mbwo a nsyääl ande, wɛɛ u mbwo a làkwikilà ande amu Yɛsu Klistɔ mpɛl. Ntɔn làkwikilà làfàpà mɔ̈ɔ̈ aŋàpɔŋà anà inzaam.

Unsà un'lwaaŋ ndaa ayà uboo a un'kaan awà ayi: - 1.1-4: Mbɔr - 1.5-16: An'yiilà a Ikööŋ a Krɛt anà ità a nsyeel a mbaaŋ - 2.1-15: Nswɛɛŋ ntɔn itsuŋ a ifà ifà anà isin a ya - 3.1-11: Ukyer yàŋàbwaŋ anà isin a ya - 3.12-15: Mbɔr a ntsüü.

Mbɔr

1 Mɛ Pɔl, un'syääl a Nzam anà ntööm a Klistɔ Yɛsu ntɔn musyen baar kàsɔ̈ɔ̈l Nzam unsà làkwikilà anà unsà un'yɛnà a ndandaa asànaa inzaam ilɔɔmà kya, 2 unsà làkyän a mɔ̈ɔ̈ a mbul a in'tye kàpɛ Nzam ilää, Nzam awà mpa afàtà loor. Nde kya kapɛ kusà a an'taaŋ a mbul a in'tye, 3 anà u taaŋ kàsi nde, nde kàswɛŋ Ndaa ande uboo a an'lɔɔŋ amà ban'pɛ mulab nswɛɛŋ a Nzam awà Un'tswää a mɔ̈ɔ̈ abi.

4 Akà Titɔ, mwan amɛ wà ndandaa unsà làkwikilà abi là un'tüüb: Wɛy Taaràbi Nzam anà Un'tswää a mɔ̈ɔ̈ abi Klistↄ Yɛsu bapɛ kab a ngway anà duu.

Isal a Titɔ u Krɛt

5 Isàkal naa mɛ kàsawɛy u Krɛt, yà ntɔn naa ngye asàmay an'yilà màsääl anà musà andweer a Ikööŋ u bul lanswà mulab nswɛɛŋ kapɛ mɛ. 6 Undweer akal mbuur akɔ̈ɔ̈n ube, un'dim a un'kyay mwɛy mpɛl, akal anà baan aŋàlàkwikilà mpa ban'kwo mukafüün naa ba bye anà nkääl ambe anà aŋunkwɛm. 7 Ntɔn un'kyɛɛŋ a Ikööŋ akal mbuur akɔ̈ɔ̈n ube, ntɔn nde wà un'leer a isal a Nzam: nde ukal anki mbuur afàböön baar ndaa, ŋankyɛl, un'yöör a man, ŋangwiy, mbuur afàleŋ bweel a nswɛn, 8 wɛɛ nde akal ŋun'kaay, un'sam a ndaa aŋàbwaŋ, ŋan'kyän aŋàbwaŋ, mbuur a balàbal, ŋun'kyɛɛl, ŋankääŋ a mpem, 9 wàŋàbääb a Ndaa asànaa bàlɔŋ ya, ntɔn nde ukwe mulɛɛl unsà an'lɔɔŋ a ndandaa anà mutɔn asyeel a mbaaŋ.

10 Ntɔn baar mbɔɔn baŋun'tswe ngwal, anà ŋàloor, sin sin uboo a Ayudà aŋàlàkwikilà. 11 Ngye akyer atsum mun. Ba bàmutwaal lingyoomà uboo a an'ywar aŋikiinà, muyilɔɔŋ indiir mpa byan'kwo mulɔŋ, ntɔn muwal bweel a nswɛn. 12 Umwɛy uboo a ba, ŋangɔɔm aba ŋakwo, kàtɛn naa: « Taaŋ lanswà Bàkrɛt bà ŋaloor, nstür a mpɔr, abwal bàfàkwen nà udyà mpɛl. » 13 Aki imbäl a ndandaa. Lalan, aŋän a ngwal, ntɔn ba bàkäl anà làkwikilà a ndandaa 14 anà ba bàkɔ̈ɔ̈n alab in'sim a Ayudà anà nswɛɛŋ a baar ifàpà ndandaa ngö. 15 Indiir byanswà byàŋàpɔŋà akà baar abaŋàpɔŋà. Wɛɛ akà baar mpa bàŋàpɔŋà anà bàkɔ̈ɔ̈n làkwikilà, undiir mwɛy wàŋàpoŋà watɛy, ntɔn un'yɛnà anà an'kyän aba màŋàtay. 16 Ba bàfàkyey naa ba bàkyun'yöb Nzam, wɛɛ ba bàkyun'tɔn u nsyääl aba. Ba bà baar a ŋingyääy, bun'tswe ngwal anà bàkwe anki akikikye mukyer undiir aŋàbwaŋ.

TITƆ
<
1
>