Nkanda kuidi ba
Ebelewo
BUMUTU BU MUANA WU NZAMBI
1
Nzambi wukimonikisa mu Muanꞌandi
1 Mu zikhumbu ziwombo ayi mu zinzila ziwombo, Nzambi wuyolukila mutsi khulu, bakulu beto mu nzila yi mimbikudi. 2 Vayi mu bilumbu biabi bi tsuka Nzambi wutuyolukila mu Muanꞌandi, mutu wowo kabieka mvingidi wu bima bioso ayi mu niandi kavangila bima bioso. 3 Muana beni wulembo monikisa lezama ku nkembo wu Nzambi ayi niandi mfikula yimonisa bumboti bumutu buandi. Niandi weta kindisa bima bioso mu mambu mandi ma lulendo. Bu kamanisa kubika tsukudulu yi masumu ; buna wuvuanda ku Diyilu va koko ku lubakala lu Nzambi, nkua ngolo yoso.
4 Buna niandi wulutila zimbasi mu luvalu bila dizina di katambula dilutidi dizina di zimbasi.
Muana Nzambi lutidi zimbasi
5 Muaki kuidi mbasi mbi yoyi Nzambi kakamba :
ngeyo widi Muanꞌama,
minu ndibutidi mu lumbu kiaki Voti diaka :
Minu ndiela ba dise diandi
ayi niandi wela ba muanꞌama e ?
6 Bosi bu kakotisa mutu wutheti wu butuka va nza, wubuela tuba ti :
Bika zimbasi zioso zi Nzambi
zifukama va ntualꞌandi.
7 Mu diambu di zimbasi, niandi wutuba ti :
Niandi wunkitulanga zimbasi ziandi phemo
ayi bisadi biandi minlaki mi mbazu.
8 Vayi mu diambu di Muana, niandi wutuba ti :
A Nzambi, kundu kiaku ki kipfumu kinzinganga
mu zithangu zioso.
Nkawꞌaku wu busonga widi nkawa wu kipfumu*Nkawa wu kipfumu : voti wela yadila kipfumu kiaku mu busonga..
9 Wunzolanga masonga vayi wunlendanga mambimbi.
Diawu Nzambi, Nzambi aku, kasobudila
ayi kamonisa khini yi nzitusu
viokila yoyi kamonisa bakundi baku.
10 Wubuela diaka :
A Pfumu, va thonono
ngeyo wuvanga zifundasio zi ntoto ayi
diyilu divangulu mu mioko miaku.
11 Biela bungana
vayi ngeyo wela zinga mu mimvu mi kamimani ;
Biela nuna banga minledi.
12 Wela bizinga banga bu nzingulungu nledi
ayi biela sienza
vayi ngeyo wusienzanga ko ayi
mimvu miaku milendi suka ko !
13 Ayi kuidi mbasi mbi katuba ti :
Vuanda va lubakala luama
nate ndiela mana kitula bambeni ziaku
diatulu ki malu maku.
14 A ziawu zisi ko ziphevi zinsadilanga Nzambi, zifidusu mu diambu di sadila batu bobo bela vinginina kiuka ki phulusu e ?