1 Yesu wuyenda ku mongo minti mi Olive. 2 Vayi mu nsuka-nsuka, Yesu wuvutuka ku Nzo Nzambi. Batu boso bayizaku va kaba ; wuvuanda ayi wuba longa.

3 Minlongi mi mina ayi Bafalisi bannatina nketo wumosi babuila mu kitsuza*Kitsuza : mu tsekudulu yinkaka tulenda tuba ti nketo wawu bambuila mu kiphinga. ; bantula va ntuala wu batu boso ; 4 bankamba :

—Nlongi, nketo wawu bambuila mu thangu kaba vanga kitsuza. 5 Mu Mina, Moyize wututuma ti tufueti vonda baketo ba phila yayi mu matadi. Vayi ngeyo, mbi wuntuba e ?

6 Banyuvudila kiuvu kioki mu diambu di bamfiela muingi babaka bila kioki bafueti kumfundila.

Vayi Yesu wuyinama, wusonika mu nlemvo va tsi. 7 Bu bantantisa mu kunyuvula ; buna niandi wuvumbuka ayi wuba kamba :

—Woso mutu mu beno zebi ti kasi disumu ko, kaba mutu wutheti mu kunzuba ditadi.

8 Buesidi yinama, wusonika va tsi. 9 Bu bawa bobo, baboso batona tina wumosi wumosi ; tonina kuidi banuna. Yesu wusiala niandi veka va kimosi ayi nketo va ntualꞌandi. 10 Buna Yesu wuvumbuka ayi wunkamba :

—A nketo, mimfundi miaku kuevi midi e ? Kadi mutu kasi kubedisa ko e ?

11 Nketo wumvutudila :

—A tata, kadi mutu.

Buna Yesu wukamba :

—Minu mamvama ndikadi kubedisa, Yenda kuaku vayi kadi buelavola masumu†Bibuku bibi tona Yowani 7.53–8.11 bisi ko mu minkanda minkakamikhulu. Minkanda minkaka mitula biawu ku tsuka nsamu wumbote wu Yowani voti vioka Luka 21.38..]

12 Yesu wubuela kuba kamba diaka :

—Minu ndidi kiezila ki nza. Woso mutu wukundandakana kalendi diatila mu tombi ko, vayi wela baka kiezila ki luzingu.

13 Buna Bafalisi bankamba :

—Ngeyo veka wulembo kiteliminanga kimbangi, kimbangi kiaku kisi ki kiedika ko !

14 Vayi Yesu wuba vutudila :

—Kimbangi kiama kidi ki kiedika, ka diambu ko minu veka ndilembo kitelimina kimbangi. Bila minu nzebi kuevi ndiba ayi nzebi kuevi ndinkuenda. Vayi beno luisi zaba ko kueve ndiba ayi kuevi ndinkuenda. 15 Beno mu kimutu lueta sambisila. Vayi minu ndikadi sambisa kadi mutu wumosi. 16 Enati minu ndilembo sambisa, buna tsambusuluꞌama yidi yi kiedika ; bila ndisi ko minu veka vayi Tata wuthumba widi yama. 17 Madi Masonama mu Mina mieno ti : kimbangi ki batu buadi kidi ki kiedika. 18 Minu veka ndilembo kitelimina kimbangi ayi Tata wuthuma wulembo thelimina diaka kimbangi.

19 Banyuvula :

—Kuevi kuidi Dise diaku e ?

Yesu wuba vutudila :

—Beno luisi kunzaba ko ayi luisi zaba ko Dise diama ! Enati lunzebi, nganu luzebi Dise diama.

20 Yesu wutubila mambu momo bu kaba longa mu Nzo Nzambi, wutelama va ndambu buangu bantambikilanga makaba. Kadi mutu kasia nunga ko mu kumbuila, bila thanguꞌandi yifueni ko.

21 Yesu wubuela ku bakamba :

—Minu ndieka nkuenda, muaki luela kuthomba ayi luela fuila mu masumu meno. Ku ndinkuenda beno lulendi kuiza kuawu ko.

22 Buna Bayuda bayuvasana :

—Buna wela kukivonda e ? Mananga diawu kalembo tubilanga ti : “Ku ndinkuenda beno lulendi kuiza kuawu ko e ?”

23 Yesu wuba kamba :

—Beno luidi basi nza vayi minu ndidi muisi diyilu. Beno luidi basi nza yayi, vayi minu ndisi ko muisi nza yayi. 24 Diawu ndilukambidi ti “beno luela fuila mu masumu meno”, bila enati lukadi wilukila ti “Minu ndidi”, buna luela fuila mu masumu meno.

25 Buna banyuvula :

—Ngeyo widi nani e ?

Yesu wuba vutudila :

—Wowo ndieti ku lukambanga mu zithangu zioso. 26 Mawombo madi yama mu tuba mu diambu dieno ayi ma kulusambisila ; vayi mutu wowo wuthuma widi wu kiedika ayi mambu momo ndiwa kuidi niandi mawu ndieta kamba kuidi basi nza.

27 Vayi basia sudika ko ti Yesu wuyolukila bobo mu diambu di Tata.

28 Buna Yesu wuba kamba :

—Bu luela nangika Muana-Mutu, buna bosi luela zaba ti “Minu ndidi” ayi buna luela zaba ti ndivanganga ko kadi diambu dimosi mu minu veka vayi ndilembo tubi mambu momo mandonga Tata. 29 Mutu wowo wuthuma widi yama ; kasia kumbika minu veka ko, bila minu ndieta vanga mu zithangu zioso mambu momo meta kummonisa khini.

30 Bu katuba mambu momo, batu bawombo banwilukila.

31 Yesu wukamba Bayuda bobo banwilukila ti :

—Enati beno lunkangananga mu mambu mama buna luidi minlonguki miama mu kiedika, 32 luela zaba kiedika ayi kiedika kiela kulukula.

33 Bamvutudila :

—Beto tuidi mu nkuna Abalahami ayi kadi khumbu tusia beto bavika ba mutu ko ! Buna buevi wuntubila ti : “Luela ba batu ba kiphuanza e ?”

34 Yesu wuba vutudila :

—Bukiedika ndikulukamba ti : Woso mutu wumvanganga masumu, buna niandi mvika wu masumu. 35 Mvika kasi muisi dikanda ko vayi muana, mu zithangu zioso, widi muisi dikanda.

36 Diawu enati Muana wulukudidi, buna lukululu mu kiedika. 37 Nyinga, nzebi ti luidi mu nkuna Abalahami, vayi lutidi kuphonda bila mambu mama masi ko buangu mu beno. 38 Ndilembo lukambi mambu momo minu ndimona bu ndiba kuidi Siama vayi beno lulembo vangi mambu momo luwa kuidi Sieno.

39 Bankamba :

—Abalahami niandi sieto !

Yesu wuba vutudila :

—Enati luidi bana ba Abalahami, nganu lulembo vangi mavanga ma Abalahami. 40 Vayi buabu beno lulembo tombi kuphondisa, minu, mutu ndilukembi kiedika kioki ndiwa kuidi Nzambi. Abalahami kasia bu vanga ko. 41 Beno lulembo vangi mavanga ma sieno.

Bawu bamvutudila :

—Beto tuisi bana ba kindumba ko. Vayi Nzambi niandi khatika Sieto.

42 Yesu wuba kamba :

—Enati Nzambi niandi Sieno nganu lueta kunzola, bila mu Nzambi nditotukila ; ayi buabu ndidi vava. Ndisia kuizila ko mu luzolo luama vekavayi niandi wuthuma. 43 Bila mbi lunkambu sudikila mambu ndilembo lukambi e ? Bila lulendi ko wa mambu mama.

44 Beno Satana niandi dise dieno ayi lutidi vanga zinzinunu zi dise dieno. Niandi mvondi tona vana thonono ayi kasia zingila ko mu kiedika, bila mu niandi muisi ko kadi kiedika. Mu thangu keta vuna, buna mu ntimꞌandi mueta ba luvunu bila niandi nkua luvunu ayi dise di luvunu. 45 Vayi minu bu ndilembo tubi kiedika, beno lukadi kunguilukila. 46 Nani mu beno wulenda kukhamba disumu diodi ndivanga e ? Buna bila mbi lukadi kunguilukila enati ndilembo lukambi kiedika e ? 47 Woso mutu Nzambi kavuidi wunwanga mambu ma Nzambi. Beno Nzambi kasi luvua ko, diawu ka luwilanga ko.

48 Bayuda bamvutudila :

—Mueni ti bukiedika kuandi tulembo kambanga ti ngeyo widi muisi Samaliayi Pheve yimbimbi yidi yaku.

49 Yesu wuba vutudila :

—Nana, minu ndisiꞌama Pheve yimbimbi ko. Vayi Dise diama ndieta kinzikavayi beno lulembo kundenzi. 50 Minu nditombanga nkemboꞌama ko. Vayi vadi mutu wuntombanga wawu ayi weta sambisa.

51 Bukiedika ndikulukamba : woso mutu wunlundanga mambu mama, kalendi fua ko.

52 Buna byuda bamvutudila :

—Buabu tuzebi ti Pheve yi mbimbi yidi yaku ! Bila Abalahami ayi mimbikudi bamana fua, vayi ngeyo wunkamba ti woso mutu wunlunda mambu maku kalendi fua ko ! 53 Buna ngeyo wumbanza ti ngeyo lutidi mu bunneni. Dise dieto Abalahami, diodi difua voti mimbikudi miomi mimana fua e ? Buevi wulembo kibanzila e ?

54 Yesu wuba vutudila :

—Enati minu ndilembo kikembisa minu veka, buna nkemboꞌama widi wuphamba. Vayi Dise diama, diodi lulembo tedila Nzambi eno niandi wulembo khembisa. 55 Muaki beno luisi kunzaba ko vayi minu ndinzebi. Enati thubidi ti ndisi kunzaba ko, buna ndieka nkua luvunu banga beno. Bayi minu ndinzebi ayi ndieta lunda mambu mandi. 56 Dise dieno Abalahami wumona khini bu kayindula ti wulenda mona lumbu kiama ; wumona kiawu ayi wumona khini yiwombo.

57 Bayuda bankamba :

—Ngeyo kudukisidi ko makumatanu ma mimvu, vayi buabu wulembo tubi ti wumona Abalahami !

58 Yesu wuba vutudila :

—Bukiedika ndikulukamba ti tuamina Abalahami kabutuka, buna minu ndidi.

59 Bu katuba mambu momo, batota matadi muingi banzuba vayi Yesu wusuama ayi wutotuka mu nzo Nzambi.