1 Vaba mutu wumosi wuba mbevo, dizina diandi Lazale*Lazale : Minsekudi minkaka misonika Lazalo va buangu ki Lazale.. Niandi wuba muisi Betani, buala buba mvuandanga Maliya ayi khombꞌandi Malata.

2 Maliya, niandi nketo wudukudila Pfumu Yesu malasi ma tsudi mu malu ayi wufiona mawu mu zitsuki ziandi. Lazale wuba kimbevo, wuba khomba yi bakala yi Maliya. 3 Buna bakhomba bandi babaketo zituma mutu kuidi Yesu mu kunkamba :

—Pfumu, tala mutu wowo weta zola wulembo bedi.

4 Vayi Yesu bu kawa bobo, wutuba :

—Kimbevo kioki kilendi kumvonda ko, vayi kidi mu diambu di nkembo wu Nzambi muingi Muana Nzambi kakemboso mu kimbevo kioki.

5 Muaki Yesu wuzola buwombo Malata, khombꞌandi yi nketo ayi Lazale. 6 Vayi bu kawa ti Lazale wulembo bedi, wubuela vuanda bilumbu biodi va buangu kioki kaba. 7 Bosi wukamba minlonguki miandi :

—Tuvutukanu ku Yuda.

8 Vayi minlonguki miandi minkamba :

—A Labi, keti ndambu kuandi yi bilumbu biviokidi, Bayuda bazola kuzuba matadi vayi buabu tidi kuaku buela vutuka ku Yuda !

9 Yesu wuba vutudila :

—Muisi ko kumi zithangu zizole mu muini e ? Enati mutu dieti va muini kalendi bumina thutu ko bila wulembo moni kiezila ki nza. 10 Vayi enati mutu wulembo diati va builu, buna maka bumina thutu, kiezila kisi ko mu niandi.

11 Bu kamanisa tuba mambu momo, buna wubuela diaka :

—Nkundi eto lazale wulembo leki tulu vayi ndiedi mu kuenda nkotula.

12 Minlonguki mimvutudila :

—Pfumu, enati lekidi tulu buna wela beluka.

13 Muaki Yesu wuyolukila lufua luandi vayi bawu babanzila ti Yesu wuyolukila tulu toto tunlekongo. 14 Buna Yesu wuba sudikisa ti :

—Lazale fuidi. 15 Vayi khini ndimmona mu diambu dieno bu ndikambu ba vawu muingi luwilukila. Vayi tuendano buabu ku kadi.

16 Tona mutu wowo baba ntedilanga Didime†Didime : dinsundula diphasa., wukamba bakhomba bandi minlonguki :

—Tuendano kuna mu diambu beto mamveto tufua yandi va kimosi.

17 Yesu bu katula, wuyenda bata buna Lazale weka bilumbu biya ku tsi ntoto. 18 Betani diba divula difikama ayi Yelusalemi, nduka-nduka bikilometele bitatu, 19 ayi Bayuda bawombo bayiza kuidi Malata ayi Maliya mu kuba bomba mu diambu di khombꞌawu wu bakala.

20 Malata bu kawa ti Yesu lembu yizi, wuyenda kundengana vayi Maiya wuba wuvuanda ku nzo. 21 Malata wukamba Yesu :

—Pfumu, enati wubedi vava nganu khombꞌama kasi fua ko. 22 Vayi buabu nzebi kuama ti dioso kuandi diambu di wela lomba kuidi Nzambi, Nzambi wela kuvana diawu.

23 Yesu wunkamba :

—Khombꞌaku wela fuluka.

24 Malata wumvutudila :

—Nzebi ti wela fuluka mu lumbu kitsuka, batu bu bela fuluka.

25 Vayi yesu wunkamba :

—Minu ndidi mfulukulu ayi luzingu. Woso wukunguilukila, ka diambu ko wufua, wela zinga. 26 Woso wunzinga ayi wukunguilukila kalendi fua nkutu ko. Wilukidi mawu e ?

27 Malata wumvutudila :

—Nyinga Pfumu, minu nguilukidi ti ngeyo Klisto, Muana Nzambi, wunkuiza va nza.

28 Bu kamana tuba mambu momo, Malata wuyenda tela mu kinsueki Maliya, khombꞌandi yinketo, mu kunkamba :

—Maliya, Nlongi wizidingi, ngeyo kantela !

29 Maliya bu katumbu wa Malata ; wutelama mu nsualu ayi wuyenda kuidi Yesu. 30 Muaki buna Yesu kakikotidi ko mu buala, wuba kaka va buangu kioki Malata kayiza kundenginina. 31 Bayuda bobo baba ayi Maliya mu nzo ayi bobo baba kumbomba, bu bamona ti Maliya wutumbu telama mu nsualu ayi wutotuka, buna banlandakana bila babanizla ti wedi ku biziami ku dila.

32 Vayi Maliya wutula vaba Yesu, bu kammona buna wubua va malu mandi ayi wunkamba :

—Pfumu, enati wubedi vava nganu khombꞌama kasi fua ko !

33 Yesu bu kamona ti Maliya wulembo didi va kimosi ayi bayuda bobo babayandi, buna kiadi kingolo kimbuila mu ntima.

34 Buna wuyuvula :

—Kuevi luntudidi e ? Bamvutudila :

—Pfumu Yiza tadi.

35 Yesu wudila.

36 Bayuda batuba :

—A beno…, Tala phila yikanzodila !

37 Vayi bankaka mu bawu batuba :

—Mutu wawu niandi wuzibula meso ma phofo, nganu kasi vanga ko diambumuingi mutu wawu kabika fua e ?

38 Yesu wuluta buela mona kiadi kiwombo mu ntima. Wuyenda ku biziami. Ziami beni kiba kisokolo mu ditadi. Va muelo vawu batula ditadi dinneni.

39 Yesu wuba kamba :

—Botulanu ditadi diodi. Malata, khomba yi mutu wufua, wunkamba :

—Pfumu, weka kuiza tsudi bila kiaki kieka lumbu kinya tona kazikulu.

40 Yesu wunkamba :

—Ndisi kukambanga ko ti mawumona nkembo wu Nzambi enati wilukidi e ?

41 Babotula ditadi. Yesu wuvumbula meso mandi ku diyilu, wutuba :

—Tata, ndivutudidi matondo bila wukunguilanga. 42 Nzebi ti weta kunguila mu zithangu zioso, vayi enati ndintubila bobo mu diambu di nkangu wawu wunzungididi muingi bakikinina ti ngeyo wuthuma.

43 Bu kamana tuba mambu momo, Yesu wuyamikina mau mbembo yingolo :

—Lazale, totuka !

44 Mutu wufua wutotuka, wuzingu bitendi-bitendi bi minledi mu mioko ayimu malu ; zizi kiandi kifuku ku tsi nledi.

Yesu wuba kamba :

—Lunnianguna, lumbika kenda kuandi.

45 Bawombo mu Bayuda bobo bayiza kuidi Maliya, bu bamona mambu momo mavanga Yesu, banwilukila. 46 Vayi bankaka mu bawu bayenda bata Bafalisi ayi baba kamba mamo mavanga Yesu.

47 Buna bapfumu zi zinganga Nzambi ayi Bafalisi bakutakana mu lukutukunu lunneni ayi bakamba :

—Mbi tufueti vanga e ? Bila mutu wawu wulembo vangi bikumu biwombo. 48 Beto kumbika ti kalembo kavanganga bobo, buna batu babo mabanwilukila. Buna basi Loma bela kuiza, bela tulula nzuꞌeto Nzambi ayi tsi eto.

49 Vayi wumosi mu bawu, dizina diandi Kayife, niandi wuba pfumu yi zinganga Nzambi mu mvu beni, wuba kamba :

—A buna lusi zaba kadi kiasa ko e ? 50 Luisi zaba ko ti bulutidi mboti mutu wumosi kafua mu diambu di batu boso ayi tsi yoso yibika bungu !

51 Kasia tuba mambu momo mu luzolo luandi veka ko. Vayi bu kaba pfumu yi zinganga Nzambi mu mvu beni, buna wubikula ti Yesu kafueti fua mu diambu di tsi andi. 52 Bika sia ti mu diambu di tsi kaka, vayi mu diambu di kutikisabana babo ba Nzambi bamana sasakana muingi bakituka mutu wumosi.

53 Tona lumbu kina, bawizana va kimosi mu diambu bamvondisa. 54 Diawu, Yesu kasi buela kukimonikisa ko va meso ma bayuda. Wubotuka kuna, wuyenda ku zunga kifikimini ayi dikanga, ku divuladibeti tedilanga Efalayimi. Wuvuanda kuna ayi minlonguki miandi.

55 Pasika yi Bayuda yifikama batu bawombo baba mu mala bayenda ku Yeluzalemi tuamina Pasika yiba mu diambu di bakivedisa. 56 Batomba Yesu. Ayi bu baba mu Nzo Nzambi bayuvasana bawu na bawu :

—Buevi lumbanza e ? Lummuena ti kalendi kuiza ko ku nyengo e ? 57 Bapfumu zi zinganga Nzambi ayi Bafalisi bavana lutumunu muidi batu ti woso kuandi wunzaba kuidi Yesu, buna kafueti samuna muingi bankanga.