1 A Nzambi, nzitusu wulembo ku vingidila mu Sioni

kuidi ngeyo tuela dukisa zindefi zieto.

2 Ngeyo weti wa lusambulu ;

batu boso bela kuiza kuidi ngeyo.

3 Mu thangu tufietukusu kuidi masumu ;

ngeyo wutulemvukila mu zinzimbala zieto.

4 Lusakumunu kuidi bobo wusobula

ayi bobo wunata mu ba va widi

muingi bazingila mu luphangu luaku.

Tuidi bayukuta mu bima bimboti bi nzo aku,

bi nzo aku yinlongo.

5 Ngeyo wutuveni mvutu ayi ndambu tsisi mu mavanga ma busonga.

A Nzambi, Mvulusi eto,

ngeyo diana di zitsukusunu zioso zi ntoto

ayi di mimbu milutidi tatuka.

6 Ngeyo wuvanga miongo mu lulendo luaku ;

ngeyo veka wukivuika zingolo.

7 Wunlembikanga biyoko bi mimbu,

biyoko bi mayo mandi ayi khindu yi makanda.

8 Batu bobo banzingilanga ku thama

bela mona tsisi matsiminanga maku,

kuna kueti totukila thangu ayi ku keti diamina,

ngeyo wutela kuawu minkunga mi khini.

9 Ngeyo wuyiza tala ntoto ayi wuwuvana nlangu ;

wuvana wawu bima buwombo.

Mila mi Nzambi midi miwala nlangu.

Ngeyo weti kubikila batu makundi

bila ngeyo wutumina buawu.

10 Weti lembila minkala miandi

ayi wulembo ladikisa makumutu mandi ma ntoto

ayi wulembo lebisa wawu mu masala ;

wulembo sakumuna bikunusu biandi.

11 Ngeyo weti manisina mvu mu mamboti maku ;

bima biwombo bilembo sapika mu zisaleti ziaku*Zisaleti : bima bi matoma.

12 Bibuangu bieti mena biti mi dikanga bilembo sapika

zikhundubula zilembo vuati khini.

13 Mamemi mafulukidi mu bibuangu bieti mena biti ;

mindimba mifulukidi mu makundi ;

milembo yamikina mu khini ayi yimbila.