1 Zitisa Yave, a muelꞌama.

A Yave, Nzambi ama, ngeyo widi wunneni ngolo.

Ngeyo vueti kiezila ayi nzitusu.

2 Niandi wukifukidi muinda banga nledi ;

weti yalumuna diyilu banga nzo yi ngoto,

3 ayi wutunga makunzi ma bivinga biandi bizangama va minlangu miawu.

Niandi weti kitula matuti ditoma diandi di sengo

ayi weti diatila mu mavavi ma phemo.

4 Wunkitulanga phemo bamvuala bandi,

minlaki mi mbazu bisadi biandi.

5 Wuvuandisa ntoto va zifondasio ziandi ;

wulendi nikuka ko kadi fifioti.

6 Ngeyo wufukidila wawu mu thipula banga ngeyo wumfukididi nledi,

Minlangu mitelama nate ku mbata miongo.

7 Vayi bu wutema, minlangu mitina,

mu biyoko bi dumu kiaku, miawu mitina.

8 Mikumbila va mbata miongo,

mibua nate mu mindimba ku buangu kioki wukubikila miawu.

9 Ngeyo wumitudila zindilu ziozi ka milendi sabuka ko ;

milendi buela diamisa ntoto ko.

10 Niandi wukubika zitho zi minlangu

mu zikhola zinkumbanga va khatitsika miongo.

11 Zilembo vani nlangu kuidi bibulu bioso bi tsola,

ziphunda zi nsitu zimanisinanga phuilꞌawu.

12 Zinuni zi yilu zintunganga dianla mu yenda minlangu,

zieti yimbila va khatitsika matafi.

13 Wulembo lembila miongo tona ku bivinga biandi bizangama ;

ntoto wuyukutidi mu mbutu wu kisalu kiandi.

14 Niandi weti menisa biti mu diambu di bibulu,

ayi bikunusu mu diambu di batu bakuna,

ayi totulanga bidia mu ntoto :

15 vinu kieti yangidika ntima wu mutu,

mafuta meta kienzula zizi kiandi

ayi dipha dieti kindisa ntimꞌandi.

16 Minti mi Yave midi milembolo bumboti ;

minti mi sedeli mi tsi Libani miomi kakuna.

17 Muawu zinuni zieti tungila zindiala ziawu ;

nuni beti tedila ngongo yitungila nzo andi mu minti mimbutanga zimbala zi phutu.

18 Miongo mi nangama mivuiwulu kuidi zikhombo zi nsitu ;

zithadi zidi suamunu mu diambu di bibulu bieti tedolo damani*Damani : bulu kidi banga kikueya..

19 Ngondi yeti vasa zitsungi,

ayi thangu zebi thangu mbi kafueti diamina.

20 Ngeyo weti nata tombi, buisi bueti yila

ayi buna bibulu bioso bi nsitu bilembo diengila-diengila.

21 Zikhosi zillembo kungi mu diambu di biobi zifueti buila

ayi zieti tomba bidia biawu kuidi Nzambi.

22 Thangu yawu totuka, buna zivengumukini ;

zivutukidi ayi zilekidi mu minsuku miawu.

23 Buna mutu weti kuenda ku kisalu kiandi,

ku kisalu kiandi nate buisi bu nyila.

24 Phila bisalu biaku bididi woka, a Yave ;

mu nduenga wuvangila bibioso

ntoto wufulukidi mu bivangu biaku.

25 Vadi mbu wumosi, wunneni ayi wuyalumuka ;

muwedi bivangu ka bilendi baka bu tangulu ko ;

bima bimoyo bifioti ayi binneni.

26 Muawu mu nkuendilanga ayi vutukilanga masuwa ;

ayi Leviatani, bulu kioki wuvanga, muawu kieti sakinina.

27 Bibioso bikutalanga muingi wuba vananga bidia biawu mu thangu yifuana.

28 Thangu weti kubivana bidia, bieti bonga biawu ;

ngeyo zibula koko kuaku, bieti yukuta mu bima bimboti.

29 Ngeyo sueka zizi kiaku, buna bieka mona tsisi.

Ngeyo biziona vumunu kiawu, buna bieti fua ayi bieti vutuka mu mbungi-mbungi.

30 Ngeyo fidisa vumunu kiaku, buna bivangimini

ayi ngeyo weti kitula diaka zizi ki ntoto kimona.

31 Bika Nkembo wu Nzambi wuzingila mu zithangu zioso ;

bika Yave kayangalala mu bisalu biandi !

32 Niandi wuntalanga ku ntoto, ayi ntoto wulembo titi.

Niandi wulembo simba miongo ayi milembo totula muisi.

33 Ndiela yimbidilanga Yave mu luzingu luama loso.

Ndiela yimbidilanga Nzambi ama minzitusu thangu yoso yi luzingu luama.

34 Bika mambu mama ndinyindula mammonisa khini

banga phila ndilembo muena khini mu Yave.

35 Vayi bika bankua masumu balalukusu va ntoto,

ayi bika batu bambimbi babika buela monika !

Zitisa Yave, a muelꞌama !

Bika Yave kazitusu !