1 Kuye oobnembed Lot kuu taun ye kuuk botbed wiriniwen yambongko yaambed diboroon. Kwane, engyus ayoob kee mene Sodom yaa miniiwe, Lotbed wedmendekore yaro wene ye korok kankibene ika dembe 2 yedmoon, “Ne korok korok ee! Ne kuu yiib yaa angkodmandamiin kowe nambiwoom minime. Yiib yon ogibko angkekoruwa, awari amkimombed wananiib kuu yimin.” andoon. Kwanandoone, yimbed yedmiwen, “Yii, taun kidangkambed amnoom kuu dobaranuuwe waraneen.” andiwen. 3 Kwanandiiwe, Lotbed daande nangkandoone “Ee” andekoriwa, yambiwoom winiiwe, Lotbed ye deme karub yedmoone kabayingkindo ye flawayiib orok animaniib nengkiiwe nekwoone aniwen.

4 Anekoriwa, amnoombed owoddan kuu dibiiwe, Sodom ye karub aamkonoyiib kewediib korem kuu mene yambib angkara awanewandiwen. 5 Kwane, yimbed Lot yaa baande yedmiwen, “Karub kibik eb yoom doberem ande miniwen kuu kuna? Nub yaa benmenebko yi yaa nenem kamendem.” andiwen.

6 Kwanandiiwe, Lotbed bunangka wene ambongko kebenekore 7 yedmoon, “Nangkodmia! Mokorondime, yiib kuu arewa kamendaib! 8 Ne dana koyu ayoob kuu karub yoom dangindo kumbed yiib yaa be mene domondaniine komo kamaniib kuu yiib dowakenmo. Kumban owoddan ayoob keyaa arewa kamendaib! Yi kuu nambiwoom miniwen kowe, nembed yi kukbaraniin.” andoon.

9 Kwanandoone, Sodomdanbed yedmiwen, “Angkane! Eb kuu nub ambibkinmanban kumban, eb kuu nub wengyundi korok kerandameewoo? Yiminban kii! Angkane! Angkanokban kuu yi ayoob yaa kuu arewa kerundanuub kuu burudande eb yaa kuu arewa darewoob arimbed kerubdanuub.” andiwen. Andekoriwa, Lot dedmonenib ambongko monmarande kamiwen.

10 Kumban owoddan ayoobbed bunangka yire Lot kuu angkon ika ambiwoom kirodmo binge wande nen aomnekorib, ambongko kuu kebeniwen. 11 Kwane, yimbed karub korem ambib bunangka doriib yi indob kuu kebengkiiwe, indob tut keroone, yi korem ambongko wedmindeban keriwen.

12 Kwanekoriwa, owoddan ayoobbed Lot yaa yedmiwen, “Eb kuu eb danayiib eb wonongkimiib eb karubkimiib taun keyaom doriib kee ben angkane, 13 amborom kuu taun kee monmarandamuub kowe. Yariman ye kiringkono arimbed ambarakmi yemoon keriwen kowe, yembed Sodom monmari dowad nub ben yuroone munuwen.” andiwen.

14 Kwanandiiwe, Lot kuu wenene ye dana koyu ayoob awadmandamiib ye karub ayoob yaa yedmendoon, “Kirod minibko wenem, Yarimanbed taun kee monmarandameen kowe!” andoon, kumban ye kuu birondok monoon manok ande meeniwen.

15 Warandameen yaambed, engyus ayoobbed Lot yaa yedmiwen, “Kirod! Eb wonong yoom eb dana koyu ayoob ke doriib kee yoom be angkane. Kirod angkanokban keraneeb kuu taun kee monmaranuuwe yiib kangkon duknaniib.” andiwen. 16 Kwanandiiwe, kerebkarab kamoon kumban, Yarimanbed mimyob keenoon kowe, engyus ayoobbed ye yoom ye wonong yoom ye dana koyu ayoob yoom kuu taun bunangka be winiwen.

17 Winiiwe, engyu ayoob ye karub maambed yedmoon, “Bobnaub ande kabaanmo winime! Ika anuk wedmaib! Kankubunen yiri wene yinmonaib! Kabaanmo wene aangko daanime! Kwamunaniib kuu duknaibban.” andoon. 18 Kwanandoone, Lotbed yedmoon, “Ne korok, kwamunaabned, nub kuu yiminban ii! 19 Ebbed ne yaa dowakeniib keruwoon, kwane ne yaa amun kai kamewen kowe bobnainban. Kumban kombiri wene aangko daani kuu ne kuu yiminban kowe, neyiib monmaraneewe bobnaniin. 20 Kedi, kambong meb yaa kuu wedmeewoo? Kambong kuu dia kowe kombiri wananiin kuu yimin dee? Kambong kuu embengaa. Kukuu embengoo? Kambong embeng yaa wananiin kuu yimin andaneeb kuu bobnainban.” andoon.

21 Kwanandoone, engyumbed yedmoon, “Ee, eweng kuu wengambaraan. Kambong ke dakmewen kee monmarainban. 22 Kowe, kirod kabaanmo wene! Ma kamainban, eb kuu wene yakuyaa nandaneeb kumbed.” andoon. Lotbed kambong kuu embeng andoon kowe yaningko kuu Soar*Soar yaningko ye weng id kuu “Embeng”. andimaib.

23 Aron kuu yaro menuune Lot kuu wene kambong Soar yaa wene nandoone, 24 Yarimanbed yedmoone ambid arimbed bot sulfa amotiib taun Sodomiib Gomorayiib ari kirobeen. 25 Kwane, kankubunen yiriyiib nimakarub koremiib aya nonga buuk koremiib kuu monmaroon. 26 Kumban, Lot ye wonong kuu ika anuk wedmuune yu kuu karam kere at kongkab areb kereen.

27 Mirikne ware amkimo keruune, Abraham kuu uniyambed Yariman ye arinambo ari doboroon kuu ika wonoon. 28 Ye wene doberene Sodomiib Gomorayiib kankubunen yiriyiib yaa wedmoone, ambib yemoon amot denemoon yi amareng darewoob yeederebeen. 29 Godbed Abraham yoom dakmiwen ye weng kuu nonondandindo kowe, Lot yaa awanenoone taun monmaroon kuu kombiri wonoon.|H

30 Lot kuu kambong embeng aom dobiri kuu unoon kowe, ye yoom ye dana koyu ayoob yoom kuu koronde wene aangko daane aangko dem aombed dobiriwen. 31 Angkaanbed nengkaan yaa yedmendeen “Nub ambe kuu kiomnoon. Angkon, nub yaa awani ye dowad kuu karuwiibban kowe, danayiib keraubban kii. 32 Awarak ayi yeman ye ok yaningko wain konubko anekore awarak ayuko ye yoom dangenub danayiib kerem.” andeen. 33 Anduune, amnoombed wain ok koniiwe anoone awarak ayuune angkaan yoom dangiwen. Awarakbed ayeen kowe komo kamoon kuu yekaadban.

34 Awarimbed angkaanbed nengkaan yaa yedmeen “Ne yoom danguwen kowe, amnoom kuu angkon ika wain ok konubko anoko awarak ayuko kub yoom dangime. Nub ayoob kuu nub ambe yaambed danayiib kerem.” andeen. 35 Anduune, amnoombed wain ok koniiwe anoone awarak ayuune nengkaan yoom dangiwen. Awarakbed ayeen kowe komo kamoon kuu yekaadban.

36 Kwanekoriwa, yi awodki yaambed oyoomiib keriwen. 37 Angkaan kuu dana mingki woonekoru, yaningko Moab†Moab yaningko ye id kuu “Awodki yaambed”. andeen. Moab kuu Moab ambibkin yi awoya. 38 Nengkaan kuu dana mingki woonekoru, yaningko Benami‡Benami yaningko ye id kuu “Ne karubkim yi dana”. andeen. Benami kuu Amon ambibkin yi awoya.