3
Zozi -dan "mlian Moizi da
1 'An "bʋɩ Zozinɔn, ka drɛ Bali -le vɛ -a, kɔɔ Bali 'ka 'si "va 'nan -e 'ka 'kʋ laji. -Yee "wɛan 'ka 'ci "nrɔn Zozi da. Bali -a 'pa 'sia 'trɛda, ɛn -yɛɛ drɛ -cee Bali -panzan -dan a. -A 'bɔ 'le 'wɩ nɛn -kaa ve minnun lɛ. 2 Bali Zozi 'si "va ɛn yaa drɛ 'a. Zozi 'ta 'wʋla -a wei da. 'Wɩ 'tʋwli zɩɛ -a 'bɔ nɛn Moizi -a drɛ 'li. E 'ta 'wʋla Bali wei da, te -yɛɛ cɩ Bali -le minnun 'lɛzan 'a. 3 'Pian Zozi -dan "mlian Moizi da. -A -cin 'e 'tɔ 'ka 'ji 'nan, min nɛn e 'kɔn 'tɔ bɛ, -a 'tɔ "we e "mlian 'kɔn 'bɔ nɛn yaa -tɔ bɛ -a da. 4 Ɛn "nyian bɛ, 'kɔn 'tʋdʋ pɛɛnɔn nɛn 'trɛda bɛ, blamin 'bɛ -tɔ, 'pian Bali 'bɛ fɛ pɛɛnɔn drɛ.
5 'Li bɛ, Moizi a Bali 'suzan "tun "a Bali -le minnun yei. E 'ta 'wʋla Bali wei da, ɛn 'wɩ nɛn Bali "ta -a dra bɛ, -a 'bɔ nɛn yaa ve Bali -le minnun lɛ. 6 'Pian Crizi -le vɛ bɛ, Bali -pɩ nɛn, ɛn Bali 'yee minnun pɛɛnɔn 'pɛba 'wʋ -yrɔ. -Kaa ya Bali -le minnun -a, 'pian e ya 'nan te -kaa 'pɛ -sru 'e 'tɔa dɩ, ɛn -kaa yi -tɛra Minsan da ci "nrandɩ -a.
Bali -le minnun 'o "trɔɛn -tɔa Bali wei lɛ!
7 'Wɩ zɩɛ -yee "wɛan nɛn 'ka "trɔɛn "tɔ 'wɩ nɛn Bali lei 'saun -a 'vɩ bɛ -yrɛ. Kɔɔ e ya 'e 'crɛn -tɛdɩ Bali -le 'fluba 'ji 'nan:
«-Te cɛɛgʋ nɛn
ka cɩ Bali wei mannan bɛ,
8 te 'ka "trɔɛn "yuyu 'tan dɩ!
Te 'ka 'wɩ drɛ
"le 'ka tranun -le 'wɩ 'zʋ dɩ!
Te o ya "bui "da bɛ,
'o 'ci -tɔ lou 'an man,
ɛn waan 'le wɛɛla.
9 An 'wɩ "kaga drɛ 'o yiɛ man
lɛ -fuba sinjɛn wlu paan "le 'nan -e 'waan 'tɔ vɩ,
'pian 'bɛ 'nan nɛn 'o 'ci -tɔ lou 'an man,
ɛn waan 'le wɛɛla.
10 -Wee 'wɩ drɛdɩ 'an 'ci srɛ,
ɛn maan 'vɩ 'an 'fli lɛ 'nan:
‹Tʋ pɛɛnɔn man bɛ
-wee -wulo -ji "nrɔndɩ o "sia 'an man -kɔɔbli.
-Si nɛn an cɩ -a -kɔɔnnan -wlɛ "bɛ,
o 'ka 'bɛ 'va dɩ.›
11 -Yee "wɛan 'bli 'fɔ 'an 'ji o man,
ɛn an -tɔ "da 'nan:
‹Fɛnan nɛn maan 'pla -wee 'flinla "nan "a bɛ,
wa'a bɔa -nan 'li "fo "dɩ!› »
12 'An "bʋɩ Zozinɔn, 'ka yiɛ 'tɔ 'ka 'fli -va! Min -wlidɩ "nɛn ya'a yi -tɛala Bali da dɩ, -e 'e 'si Bali -sru "bɛ, te 'e 'kɔn 'ka yei "dɩ. 13 'Pian yi -tʋdʋ pɛɛnɔn man bɛ, 'ka cin "koe "tɔ 'ka da! 'Wɩ nɛn Bali -le 'fluba -a 'vɩ 'nan, -te cɛɛgʋ nɛn ka cɩ Bali wei mannan bɛ, -te e ya tian 'cee vɛ -a bɛ, 'ka cin "koe "tɔ 'ka da! -Te ka ya 'wɩ zɩɛ -a drɛnan bɛ, 'wɩ 'wlidɩ 'ka 'kɔlaman min -tʋ man yɩdɩ -a 'ka yei -e -a san 'e "trɔɛn "yuyu 'tan Bali va dɩ. 14 Fɛ nɛn maan ve zɩɛ -yɛɛ cɩ 'nan, -te -cee yi -tɛradɩ Bali da -ji, -kaa 'pɛ -sru 'ka tɔalɛ dɩ -trilii ɛn -kaa 'le 'sran bɛ, te -kaa 'vale Crizi -a -cɛɛ 'ta 'wʋla. 15 Kɔɔ e ya 'e 'crɛn -tɛdɩ Bali -le 'fluba 'ji 'nan:
«-Te cɛɛgʋ nɛn ka cɩ Bali wei mannan bɛ,
te 'ka "trɔɛn "yuyu 'tan
"le 'ka tranun -a drɛ "bui "da bɛ
-yee 'wɩ 'zʋ dɩ!»
16 Tʋ zɩɛ -a man bɛ, -tɩnun lɛ nɛn Bali 'wɩ tin 'ba, "bɛ -sru ɛn 'o 'ci -tɔ lou Bali man? Minnun pɛɛnɔn nɛn Moizi o 'si nɔanba -ji Ezipti bɛ o nɛn. 17 Ɛn "nyian -tɩnun man nɛn Bali ci srɛ lɛ -fuba sinjɛn wlu? Minnun nɛn o 'wɩ 'wlidɩ drɛ ɛn o kaa "bui "da bɛ o nɛn. 18 Bali -tɔ "da 'nan:
«Fɛnan nɛn maan 'pla -wee 'flinla "nan "a bɛ,
wa'a bɔa -nan 'li "fo "dɩ!»
-Tɩnun -le 'wɩ nɛn Bali -a 'vɩ? Minnun nɛn o Bali wei -fɔla 'o "trɔɛn -sru "bɛ o nɛn. 19 'Wɩ pɛɛnɔn nɛn e 'bɔ -kaa tranun man zɩɛ, yaa -kɔɔnman -cɛɛ 'nan, wa'a yi -tɛlɛa Bali da dɩ -le "wɛan, wa'a bɔlɛ fɛnan nɛn Bali -a 'pla -wee 'flinla "nan "a bɛ, -a -nan dɩ.