8
-Cee Bali -panzan -dan nɛn Zozi 'a
'Wɩ pɛɛnɔn nɛn kʋ cɩ -a vɩnan 'gʋɛ, -a -wulo nɛn 'gʋ. -Cee Bali -panzan -dan a laji lou. E ya 'e -nyrandɩ Bali nɛn 'yee mingɔnnɛn pɛin -da bɛ -a -pɛ "yi "da. E ya Bali -pan nyranman 'panan fɛnan 'saun nɛn Bali -a man drɛ 'wɩ zɩɛ -a drɛnan -a bɛ -a -nan. Blamin "cɛɛ fɛnan zɩɛ -a man drɛ dɩ, 'pian Bali 'bɛ man drɛ 'e 'bɔ 'a.
Bali -panzan -dan pɛɛnɔn nɛn waa -tɔa "bɛ, waa -tɔa 'nan -e 'e Bali -pan nyranman 'pa. -Yee "wɛan -cee Bali -panzan -dan "e "fɛ -tʋ -nɔn "nyian Bali lɛ. "Te Crizi 'e 'kɔn tian 'trɛda bɛ, "te e 'ka Bali -panzan -a dɩ. Kɔɔ Bali -pannɔn a -nan 'va. Ɛn o ya Bali -pan nyranman 'panan "le zɩ Moizi -le -pei -a 'vɩ bɛ -yee 'wɩ 'zʋ. Bali -pan nyranman nɛn minnun zɩɛ waa "paa bɛ, e ya "le -a 'kpa nɛn waa dra laji bɛ -a -kɔɔn "manvɛ -le 'wɩ 'zʋ. Kɔɔ zɩ Bali -a 'vɩ Moizi lɛ 'nan 'e -tandan -tɔ 'yrɛ bɛ, yaa 'vɩ 'nan:
«'I drɛ "yi!
-Tandan nɛn maan kɔɔn 'yiɛ
te i ya pɔn da bɛ,
-a 'lein nɛn 'i -tɔ 'mɛn.»
Bali -pan nyranman nɛn Bali -a -nɔn Zozi lɛ bɛ, -a 'kpa "mlian Bali -pannɔn pɛɛnɔn 'le vɛ da. Kɔɔ Zozi nɛn Bali -a 'si ɛn e Bali 'lee blamin yei "sɛn 'e cin va "nyian 'e 'pee. Ɛn blamin 'lee Bali yei "sɛndɩ 'e cin va pee zɩɛ -a 'kpa "mlian -a tɛdɛ vɛ da. Kɔɔ fɛ nɛn Bali -a 'vɩ 'nan 'e -nɔan "blamin lɛ 'wɩ zɩɛ -a -ji bɛ -a 'kpa "mlian -a tɛdɛ vɛ da.
Bali -a 'yɩ "yi -e 'e blamin pli 'e man "nyian 'e 'pee, kɔɔ -a tɛdɛ vɛ nɛn Bali -a drɛ Izraɛl 'nɔn lɛ bɛ, ya'a -kɔlalɛ -e 'e o drɛ 'saun Bali 'lɛ dɩ. Tʋ zɩɛ -a man nɛn Bali 'wɩ 'pla Izraɛl 'nɔn 'bɔ lɛ. Yaa 'vɩ -wlɛ 'nan:
«Tʋ -tʋ -taa "bɔlɛ bɛ,
an Izraɛl 'nɔn
'lee Zude 'nɔn -pliman 'an man 'e 'pee.
O -pli "nɛn
maan wo 'an man 'e 'pee bɛ,
ya'a 'kɔan "le -a tɛdɛ nɛn
maan drɛ o tranun lɛ
te an o 'si Ezipti 'lɛglɔn 'ji bɛ
-yee 'wɩ 'zʋ dɩ.
-A tɛdɛ vɛ nɛn
maan drɛ zɩɛ
wa'a 'ta wʋlɛa "da "dɩ,
-yee "wɛan 'an "trɔɛn 'si o va.
10 'Pian tʋ -tʋ -taa "bɔlɛ bɛ,
an -tɔa 'an wei da 'nan
-e 'an Izraɛl 'nɔn -pli
'an man "nyian 'e 'pee.
Tʋ zɩɛ -a man bɛ,
'mɛn -pei -tɔ wɩnun -cin -kɔanla o ji,
ɛn zɩ kɔ min 'e 'ta wʋ 'trɛda bɛ
-yɛɛ "paaman o ji.
An -kɔan -wee Bali -a,
ɛn o -kɔan 'mɛn minnun -a.
11 -E 'e "sia nannannun man
-e 'e 'bɔ min cejenun da bɛ,
o pɛɛnɔn -taa -a -tɔlɛ 'nan
mɛɛn cɩ Bali -a.
'Wɩ zɩɛ min -tʋ "cɛɛ "paaman "nyian
'e bɔɛzan -tʋ ji dɩ.
-Te 'bɛ "cɛɛ dɩ,
min -tʋ "cɛɛ ve 'e "bʋɩ -tʋ lɛ 'nan,
'i 'ta -e 'i Minsan yɩ dɩ!
12 -Te o 'wɩnun drɛ 'an 'va 'wlidɩ 'e 'cɛn oo,
maan "cɛa -wlɛ.
Ɛn -te o 'mɛn -pei -tɔ wɩ -mie srɛ 'e 'cɛn oo,
ma'an "nyian 'an 'ci nrɔnman "da "dɩ.»
13 -Te Bali -tɔ 'e wei da 'nan 'e blamin -pliman 'e man 'e 'pee bɛ, yaa -kɔɔnman 'cɛɛ 'nan, -a tɛdɛ vɛ nɛn Bali -a drɛ bɛ, e drɛ "le sɔ ceje -le 'wɩ 'zʋ. Kɔɔ -te sɔ drɛ ceje bɛ, -a 'yi "sia "ji, te 'bɛ 'fɔladɩ 'bɔ.