GALESIA
Pol ere Galesia provinsri tatame emne bas rasem siglou.
Kiyi late tuma.
Gwote siglou Pol ere bas rasem, Galesia provinske temenem Kristen etemne newopitim. Galesia provins e kantri Turki etek tetan.
Polken akeite tameken eme God eri tuma wusowun sewurbetem, akeite akeite tatame nogwape, Juda berai tatame, eme Kristen tem. Juda tatame etem kir eme Kristen tem. Kau Juda Kristen tame eme etep wom. Juda berai tatame eme Kristen tem, God ere Moses erne newom wule eme kir tobote, e yenbo. Etep wom, eme Pol eterken ei nakwosem. Etepkap, Pol ere Galesiari Kristen emne etep bas rasem. Eike tatame eme Jisas erne kenawaike abote, God ere emne sene pette, eme yenbo tete. Eme Moses erne newom wule tobobe, o eme beke tobo, God ere etep beke abo. Pol ere emne etep bas rasem.
Pol eter ere Aposel tame, God ere erne wom, eke ere tuma seken wusoubetem. Pol ere Galesia provinsri Kristen emne etep wom. Kem wule yaper mane tobote. Kem Juda etemri wule o yeiwarege etemri wule mane tobote. Kem Jisas Krais eteri wulewou tobote. Kem eterne kenawaike abote, kem pap yewobe wule kuyese ek nenbetete. Pol ere emne etep bas rasem.
Pol ere Galesia provinsri tatame emne bas rasem tuma gwote.
Sapta 1:1—2:14. God eter Pol erne kenem, ere Aposel yaku kerebetem.
Sapta 2:15—4:31. Krais Jisas erne kenawaike abobe tatame etemwoune God ere wobe, eme tatame yenbo.
Sapta 5—6. Krais eterke nema akeite wule eri kulke beke te, God Eteri Wou ere nemne panen sewurbe, nema wule yenbo tobobe.
1
1-2 An Pol, an Galesia provinsri Kristen tatame kemne siglou bas rasbe. Geisimase nogwape eme arenken tetan, an etemken nema kemne pir wobe. An aposel yaku kerebe tame, eke an Jisas Krais eteri Tuma Yenbo wusoube. Eike tame aposel yaku ane beke newo. Eike tame eme aposel yaku ane beke won kere. Berai. God ere Jisas erne wou sene newom, Jisas ere sele mei mesginin sene wayen yim. Jisas Kraisken Apei Godken epe ane aposel yaku kerete wom.
3 Apei Godken neremri Aneyen Jisas Kraisken epe kemne kobo lan noub eyarte, kem pap yenbo temente. An etep abobe. 4 Krais ere neremri Apei God eter wom tuma noub meten tobom, ere neremri wule yaperke sam. Nema wule yaperke sate nenbetem, ere nemne abon kobo lan san nemne petem. Eke nema nowselri wule yaper kuyese mesginbe. 5 God ere nemne noubwai nenbe, nema eri sig eisau kwokwos kwokwos som wobetete. E tuma sekenwai.
Tuma Yenbo wurisubu tetan.
6 An kemne etep metem, an wouken akem. God ere kemne wopeten Krais eterke kemne kobo lan eyarem. Sene kem erne agetage mesginin akeite tuma metbe. Eke an wouken akem. 7 Metye. Akeite tuma yenbo beke wuri te. Krais eteri tuma yenbo etewouke tetan. Tame kau eme yan kemne seilabe. Krais eteri Tuma Yenbo eme yaper nente abobe. 8 Metye. Kem akeite tuma mane mette. Nema kemne kiyi wusoubetem tuma e Jisas Krais eteri Tuma Yenbo. Kem ete tumawou meten kenawaike abote. An wobe. Nerem o God eteri komri tame etem, nema kemne etepkap akeite tuma wote, an abobe, God ere nemne ker tetan komke won yite. An etep wobe. 9 Nema kemne woye tuma an kemne sene wote. Tame eme kemne akeite tuma wusoute, ete tuma e kerem kiyi worwor metem tumakap berai, an wobe, ete tame emne God ere ker tetan komke won yite nenbe.
10 Kem beke abobe? An kemne wusoube tuma, tatame eme meten ane metekwasbe, o God ere ane metekwasbe? Berai. God ere ari wusoube tuma metekwaste, an etep abobe. Metye. An yaku kerete, tatame eme ane metekwaste, etepkap, an God eteri yaku kere tame berai.
Pol ere aposel yaku petem tuma.
11 Ari geisimase, an kemne wobe. An kemne kiyi wusoubetem Tuma Yenbo e tame etemri tuma berai. 12 Eike tame ane ete tuma beke wusou, o ane beke wo. Berai. Jisas Krais eter ere ane ete tuma wusowum.
13 Kem kiyi metem, kiyi an Juda etemri wule noub tobobetem. Tobobetem, an Kristen emne yaperwai nenbetem. An emne kobo beke la. An yaku eisau keren emne yaper nenbetem. Kem etep metem. 14 Neremri yeiwarege etemri wule an metekwasen pap yenbo metbetem, ari nowu sip eme God ere Moses erne newom wule tobobetemkap, emri porerekap an etep teitkwunem.
15 God ere pap yewobe tame. An let bai tewo baike temenem, ere ane kenawaike abon wom. Ere ane wopetem, an eteri yaku kere tame tem. 16 Etep tem, God eteri porerek ere Eri Yen Jisas erne ane peteram. Etep tem, an Jisas eteri Tuma Yenbo Juda berai tatame emne wusoute yaku petem. Ete yaku an petem, an akeite tame emne beke yin la, emri porere selpap beke womet kamet. Berai. 17 An Jerusalem kom beke yi, kiyi temenem aposel tame emken tuma beke namde. An emne beke semowun yi. Berai. Agetage an kantri Arebiak yin tem, sene an Damaskus komke sene yin tem.
18 Nabe mur temke, an Jerusalemke ek yin aposel tame, Pita, erne late yim. Late yim, an eterken tuma namden Sande pes etek tem. 19 Etek temenem, Aneyen Jisas eteri mase Jemsken Pitaken etepwoune an lam. Akeite aposel emne an beke la. 20 An kemne bas rasbe tuma an beke yikwokwo. God ere ane labe, an kemne sekenke wobe.
21 Sene an Siria provinsri komken Silisia provinsri komken an etek yin sewurbetem. 22 Etek yin, sewurbetem, Judia distrikke tetan Kristen tatame eme ari bitimi kiyi mak lamenem, eme ane beke met. Eme ane yurik lam. 23 Akeite tame eme emne ari nenbetem wos wusowum, eme etep metmenem. Pol, kiyi ere Kristen tatame emne yapersubu nenbetem, ere Jisas erne kenawaike abobe wule teitkwunlawoyim. Sene ere ete wule noub meten wusoube. Eme etepkap metmenem. 24 God ere ane sene petem, eke eme eri sig yenbo wobetem.