21
Piŋkop da kɨla amɨn madep aŋpulugaŋban mani awɨgɨgɨt
Dewit dakon kap kɨnda. Kap on kap yoŋ dakon kɨla amɨn do mandabi.
1 Yawe, kɨla amɨn madep da tapmɨmgo do kɨsɨk kɨsɨk nandɨsak.
Gak da aŋpulugaŋaki emaron teban tagɨt, do gak do but galaksi nandɨsak.
2 Yo tɨmɨt do nandagɨt uŋun gak da ɨbɨ kɨlɨ tɨmɨkgɨt.
Yo do bɨsit gayɨgɨt, uŋun ɨmgul.
3 But galagon da abɨdaŋek yo tagɨsi ɨmgul.
Aŋek kɨla amɨn madep dakon pelɨt gol baŋ wasaŋbi busuŋɨkon yɨpgul.
4 Egɨp egɨp do bɨsit gayɨŋban ɨmgul.
Aŋek egɨp egɨpni aŋdubak abɨ toktogɨsi egɨpdɨsak.
5 Aŋpulugaŋaki man madepni madepsi tosok.
Kɨla amɨn madep dakon tɨlɨmni wagɨl tagɨsisi gak da ɨmgul.
6 Gak da yo tagɨsi dagok dagogɨ mɨni aŋɨmɨŋ wɨgɨkdɨsal.
Gak uŋun da kapmatjok egɨsal, do kɨsɨk kɨsɨk madepsi nandɨsak.
7 Kɨla amɨn madep da egɨp egɨpni Yawekon tosok yaŋsi nandɨsak.
Piŋkop Wukwisi, uŋun da kɨla amɨn madep do bɨsapmɨ bɨsapmɨ but dasi galak taŋ ɨmɨsak, do tebaisi atdɨsak.
8 Kɨla amɨn madep da uwal morapni tebaisi tɨmɨtdɨsak.
Amɨn dɨma galak taŋ ɨmaŋ amɨn kɨsirɨ amɨn tet da tebaisi tɨmɨtdɨsak.
9 Kɨndap madep da yo sosoŋ, uŋun da tɨlak noman altosak bɨsapmon uwalni dapban pasɨldaŋ.
Yawe da butjap nandaŋ yomɨŋek pabɨŋ yopmaŋakwan kɨndap da soŋ yomɨŋ mudokdaŋ.
10 Kɨla amɨn madep da uwalni dakon monjɨ gwayoni kɨsi morap dapban kɨmak mudokdaŋ.
Aŋakwan monjɨ gwayoni mɨktɨmon saŋbeŋek dɨma egɨpdaŋ.
11 Uwal da nandak nandak aŋek kɨla amɨn madep yokwi aŋ ɨm do gen yaŋ paŋteban aŋ,
mani arɨpmɨ dɨma abɨŋ yɨpni.
12 Dɨkdɨkgo baŋ yamaŋ yobɨ tobɨlek pasal si kɨkdaŋ.
13 Yawe, tapmɨmgo madepsi do gak dakon man aŋkɨsik do kap yoneŋ.