57
Amɨn kɨnda Piŋkop da aŋpulugosak do bɨsit agɨt
Dewit dakon kap kɨnda. On kap do “Miktam” yaŋ yoŋ. Dewit Sol do pasalek kɨŋ tɨp kɨnamgwan pasɨl egɨpgut bɨsapmon kap on mandagɨt. Kap yoŋ amɨn dakon kɨla amɨn da mɨŋat amɨnyo yoyɨŋban “Dɨma paŋtasɨk ani” uŋun tegon da yoni. 1SA 22.1; 24.3
1 Piŋkop, bupmɨ nandaŋ nabi.
Nak gagon abɨsat, kɨlano aki do nandɨsat.
Pup pudɨk da meŋi da pɨt kagagwan pasɨlek ekwaŋ, uŋun da tɨlak aŋkutnaŋaki tagɨsi egɨsat.
Nak yaŋ gɨn egapbo wɨgɨ aŋupbal ani dakon yo da pasɨlni.
2 Nak Piŋkop Wukwisi do yaŋ tɨdosot.
Uŋun da aŋpulugaŋban galaktokni tagɨ yolgeŋ.
3 Uŋun Kwen Kokup egek nak yokwikon naŋ abɨdaŋek nak aŋupbal ak do aŋ amɨn uŋun pabɨŋ yopdɨsak.
Piŋkop toktogɨsi but dasi galak taŋ namɨŋek dɨmasi nepmaŋ dekdak.
4 Amɨn da nak aŋgwasaŋ.
Uŋun laion amɨn noknok yombem.
Geni uŋun tepmɨsi, gwawia ae gobɨŋ yombem.
Melni uŋun emat agak sɨba yombem geni tepmɨsi.
5 Piŋkop, mɨŋat amɨnyo da gak dakon man kundu yapmaŋek kwensi awɨgɨni do nandɨsat.
Tapmɨmgo yɨpbi mɨktɨm morap kɨsikon nomansi teŋteŋosak.
Yaŋ aŋaki mɨŋat amɨn morap kɨsi da man madepgo do nandani.
6 Uwal da nak abɨdok do pat yɨpmaŋ, do jɨgɨ madepsi da nak obɨsi abɨŋ nepmaŋdak.
Nak da mokeŋ do kosiron gapma wayɨk yɨpmaŋ.
Mani dɨma magɨm.
Iyɨ uŋun gapmagwan mawit.
7 Piŋkop, butnokon da gak do tebaisi nandaŋ gadasat.
Do gak dakon man awɨgɨk do kap yokdɨsat.
8 Dɨpmɨn yɨpmaŋek pɨdokeŋsi.
Gita ae kuleleyo tɨdokeŋsi.
Wɨsa dɨma dagaŋakwan nak da kalɨp pɨdaŋek kap yokeŋ.
9 Amɨn Tagɨ, Amɨn Ŋwakŋwarɨ Kabɨ da binapmon ya yaŋ gayɨkeŋ.
Mɨŋat amɨn morap kɨsikon agek mango awɨgɨkeŋ.
10 Nin do but dasi madepsi galak taŋ nimɨsal.
Uŋun dakon tɨlak yɨpneŋ kaŋ, wɨgɨ kundu da arɨp akdɨsak.
Toktogɨsi gengo tagɨsi uŋun yol kɨmagek ninon yo tagɨ asal uŋun arɨpmɨ tagɨ manjɨneŋ kaŋ, tɨlakni uŋun wɨgɨ gɨkwem kagagwan da arɨp.
11 Piŋkop, mɨŋat amɨnyo da gak dakon man madepsi awɨgɨni do nandɨsat.
Tapmɨmgo yɨpbɨ mɨktɨm morap kɨsikon nomansi teŋteŋosak.
Yaŋ aŋaki mɨŋat amɨn morap kɨsi da man madepgo do nandani.