80
Israel amɨn Piŋkop da paŋpulugosak do bɨsit awit
Asap dakon kap kɨnda. Kap yoŋ amɨn dakon kɨla amɨn da mɨŋat amɨnyo yoyɨŋban “Saŋbek saŋbek dakon jareŋ tagɨsi” uŋun tegon da yoni.
1 TP 25.22 Israel dakon Sipsip Kɨla Amɨn, gak Josep dakon amɨn kabɨ sipsip baŋ yaŋ kosit yolɨsal.
Bɨsitnin nandaŋ nibi.
Aŋelo madep serabim bamot da binapmon kɨla amɨn madep yɨgek tɨlɨmgo mɨŋat amɨn kabɨgo do yolɨŋbɨ pɨndatni.
2 Epraim ae Benjamin ae Manase da bɨkbɨgon tapmɨm madepgo nolɨki.
Abɨŋ nin yokwikon baŋ tɨmɨkgi.
3 Piŋkop, kalɨp egɨp egɨp tagɨsi egɨpgumaŋ uŋun aego aŋkaluk abi.
Butgo ninon yɨpmaŋek yo tagɨsi aŋ nibi.
Aŋek yokwikon baŋ pulugaŋ nipbi.
4 Yawe Piŋkop Tapmɨm Ami, mɨŋat amɨn kabɨgo bɨsit gayɨŋakwa bɨsap niaŋ da butjap nandaŋ yobi?
5 Butjap nandaŋ nimaŋaki kunam tagapno dabɨl pakbinin da jap pakbiyonin asak.
6 Gak da yum pɨndagaki amɨn kabɨ nin da ɨleŋon ekwaŋ uŋun da abɨŋ nin dakon mɨktɨm abɨdok do emat aŋ.
Uwalnin da yaŋsul aŋ nimɨŋek yanjaŋ nimaŋ.
7 Piŋkop Tapmɨm Ami, kalɨp egɨp egɨp tagɨsi egɨpgumaŋ uŋun aego aŋkaluk abi.
Butgo ninon yɨpmaŋek yo tagɨsi aŋ nibi.
Aŋek yokwikon baŋ pulugaŋ nipbi.
8 Kalɨpsigwan gak wain nap kɨnda Isip mɨktɨmon naŋ aŋapgul.
Aŋek on mɨktɨmon amɨn kabɨ yolbɨ kɨŋakwa wain nap uŋun kwaokgɨl.
9 Mɨktɨm uŋun garam aŋek kwaokbɨ kwaŋek gelɨ dubagɨsi pɨgɨwit.
Pɨgakwa madepsi kwaŋek mɨktɨm kɨsi ɨlɨmɨkgɨt.
10 Aŋek kabap aŋyoŋgam aŋek uŋun dakon kɨlɨŋɨ da sida kɨndap madepsi uŋun kɨsi wɨtjɨgɨt.
11 Uŋun dakon kɨlɨŋɨ da tap madep Mediterenian da arɨpmon kɨwit.
Ae terɨ kɨnda do gɨgɨ da kwaŋek pakbi madep Yupretis da arɨpmon kɨwit.
12 Gak mibɨlɨ nido wain pi dakon dam tuwɨlgɨl?
Yaŋ agɨl do amɨn da kɨŋ ap aŋek bamɨ paŋ.
13 Joŋ bɨt da abɨŋ paŋupbal aŋ, ae joŋ kɨlap da noŋ.
14 Piŋkop Tapmɨm Ami, ninon tobɨl apbi.
Kwen Kokupmon da ninon sɨŋtaŋbɨ pɨŋakwan wain pi do kɨlani abi.
15 Gak da gaga da tapmɨmon nin kwaokgɨl, do abɨsok abɨŋ nin paŋpulugoki.
Nin wain nap bulagɨ yombem baŋ gak da paŋteban abɨ tebaisi awit.
16 Uwalnin da mandaŋ kɨndapmon kɨlɨ sowit, do gak da butjap nandaŋ yomɨŋek paŋupbal aki.
17 Mani, mɨŋat amɨnyo nin gaga do manjɨgɨl, ae gak da abɨ madepsi tagaŋek teban tagɨmaŋ, do paŋpulugaŋek kɨlanin aki.
18 Yaŋ aki kaŋ, nin gak dɨma gepmaŋ detneŋ.
Gak da paŋpulugaŋbɨ tagɨ egek bɨsit aŋ gamɨŋek mango awɨgɨneŋ.
19 Yawe Piŋkop Tapmɨm Ami, kalɨp egɨp egɨp tagɨsi egɨpgumaŋ uŋun aego aŋkaluk abi.
Butgo ninon yɨpmaŋek yo tagɨsi aŋ nibi.
Aŋek yokwikon baŋ pulugaŋ nipbi.