143
Amɨn kɨnda Piŋkop da aŋpulugosak do bɨsit agɨt
Dewit dakon kap kɨnda.
1 Yawe bɨsitno nandaki.
Mɨrakgo yopmaŋek aŋpulugoki do yaŋ tɨdosot uŋun nandaki.
Gak amɨn kɨlegɨsi, ae bɨsapmɨ bɨsapmɨ dɨma nepmaŋ dekdal, do bɨsitno nandaki.
2 Ro 3.20; Gal 2.16 Gak da dabɨlon amɨn kɨlegɨ kɨnda dɨma egɨsak, do oman amɨngo nak gen pikon dɨma nepbi.
3 Uwalno da nol aŋkɨ nɨkban maŋ mɨktɨmon pokdot.
Aŋakwan amɨn kɨlɨ kɨmakgwit da arɨpmon pɨlɨn tukgwan egɨsat.
4 Nandak nandakno upbal taŋakwan but pasol madepsi nandɨsat.
5 Kalɨpsi egɨpgum uŋun do nandɨsat.
Yo morap agɨl ae pi tagɨsi agɨl uŋun do nandak nandak tebaisi asat.
6 Aŋpulugoki do didasat.
Mɨktɨm kɨbɨrɨsi da sɨkak do nandɨsak, uŋun da arɨpmon nak gak do madepsi galak taŋ gamɨsat.
7 Yawe, butno tapmɨmɨ mɨni aban nandɨsat, do bɨsitno nandaŋek tepmɨsi aŋpulugoki.
Dɨma pasɨl nabi.
Yaŋ abi kaŋ, amɨn kɨlɨ kɨmakgwit uŋun da tamokon kɨkeŋ.
8 Egɨp egɨpno gagon tosok yaŋsi nandɨsat, do aŋpulugaŋbɨ wɨsa dagokdo gak da amɨn nin do but dasi galak taŋ nimɨsal uŋun do nandakeŋ.
Nak bɨsit gayɨsat, do kosit nolɨŋbɨ uŋun naŋ kɨkeŋ.
9 Yawe, kɨlano abi do gagon obɨsat, do uwalno da kɨsiron baŋ pulugaŋ nepbi.
10 Gak Piŋkopno, do nayɨŋ dekbɨ gak dakon galaktok yolek egɨpbeŋ.
Wupgo tagɨsi uŋun da mibɨltaŋ namɨŋakwan kosit kɨlegɨkon agɨpbeŋ.
11 Yawe, man bingo tagɨsi tosak do yokwikon naŋ pulugaŋ nepbi.
Gak amɨn kɨlegɨsi, do jɨgɨ morap pasat uŋun wɨrɨrɨk nabi.
12 Nak do but dasi galak taŋ namɨsal, do uwalno dapbɨ kɨmotni.
Nak oman amɨngo, do uwalno obɨsi dapbɨ kɨmotni.