8
Yesus Kristus opamo wama Syeno Titi pije
1 Mbe mobe ti syayao dai jakato mi som: Wama Syeno Titi tuna no Amisyo Titi anem ngkove rai no munijo ntiti indamu be akarive atavon. 2 Po apa anakero syene raija no Yavaro Amisye ama Tanoano Ndandini Dave rai no no munijo ntiti. Omamo yavaro tugae wansambayambe rai, omirati vatane wo raijaro maneme rai jewen, yara Amisye taune po ranari.
3 Anakero raugaje syeno titi ai no taiso: po vatane awa anakotaro wo raugavere raunanto Amisye ai, muno po maere rameseo Amisye ai mansamarom tavon. Wama Syeno Titi Yesus po ana inta raunande Amisye ai tavon.* Yesus apa ana po raunande Amisye ai mi som: Po taune anasine raunande indamu kakai (7:27). 4 Arono Yesus no no mine vone so rai, Opamo awaino syene jewen, weye syeno Lewi una to, onawamo wo maere rameseo Amisye ai mamaisyo Ananyao Musa rai. 5 Syeno Lewi umaso awa anakero wo raijare mamo maisyare raname vayave ma, mbe rarorombe anakotaro no no munijo ntiti rai. Weye wasaemen arono Amisye po Musa atutir po randumo sambaya ranari, po raura aje ai taiso: “Inya! Winyo ranari mamaisyo Syo rarorono nai no unate rai ramai dave.”✡ Keluaran 25:40 6 Weramu anakero raugaje Yesus ai mamo ama kove ntiti rave, weti mamaisyo anakero syeno Lewi awa rai jewen. Weye urairijo wanyino Yesus po raokaisy omirati ngko dave mije, mo urairijo wusyino Musa po raugave rakivan. Weye urairijo wanyine mo kovo manakoe raugav, yara urairijo wusyine ama kove mamaun.
7 Ranivara urairijo manasyine mamo mamai dave to ratire, weamo urairijo wanyine† Ayao Yunani no naiso mo ratoe mare, “urairijo jirume.” Urairijo jirume mamaisyo urairijo wanyine rai, wemi Yesus po raugav. Yara urairijo manasyine mamo Ananyao Musa, wemi raugaje wusyimbe. mamo nde akato ramu. Weramu urairijo manasyine mamo mamai kobe rainy. 8 Muno Amisye po ayao kakai raen no Apa kawasae mansai, weti Po raura pare:
“Wadanide! Arono ama masyoto nde nande,
indati Risyo urairijo wanyine raokaisyo Israel mansai muno susyo Yehuda mansai.
9 Urairijo namije mamo mo urairijo Syo raokaisyo
awa anene mansai no wusyinoe ramaisye jewen,
arono Syo mansaugavuje munijo aro Mesir raora.
Onawamo usai Sya urairi idaugaje mansai rai jewen.
Wemi mbewar inakirive mai.
10 Weramu Risyamo syare syo urairijo wanyine raokaisyo
vatano Israel mansai no masyoto rijat no taiso:
Indati Syo sya ananyao raugasya no awa ana wo ratantona rai
muno Syo ratoe no manuga rai.
Indati Risyirati awa Amisy pi Risy,
muno wenawamo Sya kawasae nanawije.
11 Weti indati wo awa arakovo yavaruga
muno awa arakovo kaijo rui vayave
mansanyao akatoe ramu indamu wo rinaen.
Weye vatan tenambe indati wo rinaen:
vatano mamaun muno vatano akokoe nao tenambe.
12 Indati Risyamo syo awa ana wo raveti ngkakai rapaya mansai,
muno inakari makato irati awa ayao kakai rai jakatoe ramu.”✡ Yeremia 31:31-34
13 Soamo Amisye po urairijo wanyine raura, weye pare urairijo manasyine mbe wusyimbe to. Weti urairijo manasyine rapaya ra ntami.
*8:3 Yesus apa ana po raunande Amisye ai mi som: Po taune anasine raunande indamu kakai (7:27).
✡8:5 Keluaran 25:40
†8:7 Ayao Yunani no naiso mo ratoe mare, “urairijo jirume.” Urairijo jirume mamaisyo urairijo wanyine rai, wemi Yesus po raugav. Yara urairijo manasyine mamo Ananyao Musa, wemi raugaje wusyimbe.
✡8:12 Yeremia 31:31-34