37
Vatano kove*37:0 vatano kove:Ayao Ibrani lassadiqama ine ratoe tumaimbe mare: ‘‘vatano kove.’’ Ama ino manakoe mare: ‘‘vatano ubeta Amisye Apa ananyao rai.’’ Ayao so ratoe manui no Masmur so rai. pe vatano mamune†37:0 vatano mamune:Ayao Ibrani rasha ama ine ratoe tumaimbe mare: ‘‘vatano mamun.’’ Ama ino manakoe mare: ‘‘vatano wonae Amisye Ai muno Apa ananyao rai muno ananyao rui vayave rai.’’ Ayao so ratoe manui no Masmur so rai. pe aya ana nande yai no maran
1 Masmur Daud po ratoe.
‡37:1 Masmur somamo ransyerano Ibrani akrostik inta mije, weye ntavondi urupijo Ibrani ama ntetebeaje rai. Weramu ayao Yawa ntavondi urupije so rai jewen.Vemo winy mparijo vatano mamune mai jinya,
vemo winyamo nanuga mparijo vatano awa ana udave ngkakainoanive mai jinya.
2 Weye wenawamo makaniveta vayave kobe, maisyare insumaijo ngkanene wemaisy,
muno maisyare anare njayaibe mayone wemaisy.
3 Syare nyanave AMISY obo Ai muno nyo ana ngkove obo raijar.
Indati wino kovo nsaumane rautan no muni so.
4 Syare winy nananibe AMISY atavon,
indati Wepi Po nya ana mbekedai ti no no nanuga raveti mamaisy.
5 Syare nyo taune naunanto AMISY Ai,
muno nanaveano amen; Wepirati indati Po naugavo kove rai.
6 Wepirati indati Po winya mbeto Apa ananyao rai raroron kakavimbe ti vatane wo raen no nai maisyare wo uma apa vare raen wemaisy.
Muno nya mamaisye raen kakavimbe maisyare uma moyar no masyote yasyine wemaisy.
7 Syare nanuga ntanamanin nyo AMISY anyut,
natawandi nyo atunao Apa betoije rai.
Vemo mparijo vatano wo ana mawese rako mai jinya,
weye wenawamo vatano wo aarurijate raker muno wo ana kakaije obo ratantona.
8 Parije mamo nsopi muno nanuga mamoane mamo rapaya ra ntami,
vemo mpari nora, weye parije mamo mo anakotaro ngkakainoanive obo raugav.
9 Weye vatano awa ana udave ngkakainoanive nanawamo maotar ti makanive irati munije so rai,
yara vatano manaveano AMISY amen, awa ura irati munije we rai.
10 Masyote inta ai jakato, vatano mamune opamo aumandi to;
ranivara akani ta no apa norije rai, wepamo aen akatoe ramu.
11 Yara vatano manuga mpaaje nanawamo awa ura irati munije we rai,
muno mananibe una irati anakotaro mawese ama uga obo rai.§37:11 Ino kaijinta no taiso: ‘‘mananibe una no kovo saumane ama uga rai.’’
12 Vatano mamune wo kakaije ratantona nanto irati vatano kove mai,
manuga mamuno mai ti matomokane ntitiki mai.
13 Weramu Akoe pamo pugoeno vatano mamune mai,
weye Po raen pare Apa masyoto Po mangke raugaje maije ndea mangkepan kobe.
14 Vatano mamune wo awa omake rapatino ama kokome rai, muno wo apae raivit,
indamu wo vatano ana jajewembe nawe vatano siurije nawe maubaisy,
muno vatano utavondi Amisye Apa bekere rai maotadi.
15 Weramu onawamo awa omake nsakinav akare mo taune maotar akato,
muno awa apae mamo rakupi ti ntuna.
16 Vatano kove apa ananuge kavinta vayave
omamo ngkov akato irati vatano mamune apa ananuge mawese ai.
17 Weye vatano mamun awa vambunine mamo AMISY Po radaut,
yara Po sopambe irati vatano kove mai.
18 AMISY Po vatano ana ngkakaije inta raeno mai jewene mayaranande mavabe masyote anteter,
muno wenawamo indati awa ura muni Amisye Po raunande mai raija ntoa nuge nuganui.
19 Arono una irati nsosobe ama uga rai, wenawamo unanta irati siurije rai ramu,
arono marore tami, wenawamo una irati mane obo rai.
20 Yara tugae, vatano mamun indati ukakai;
muno vatano ube marovave AMISY Ai indati ugwenen kobe.
Maisyare kavasasi ama ugo mpopan raumandi ramaisy,
wenao mansaumandi maisyare kijao nsaonto ti rakanive.
21 Vatano mamun po romane ranajo po raugav, weramu po ravae akare ramu,
yara vatano kove bekobe, weti po romane raugaje manui, mamaisyo anuga muinye rai.
22 Weye vatano AMISY Po kove raugaje mai, wenawirati awa ura munije so rai,
yara vatano AMISY panaamatambe mai onanawamo Po maotar ti makanive.
23 AMISY Po vatano utavono Aije maugavo awa unanuijo wanya raije rai,
Wepi Po masopan tindimuve weye anayanambe awa ana wo rave rai.
24 Arono utemasyo, wenawamo unanta pare manakoe rai jewen,
weye AMISY taune Pi Po maneme raijar.
25 Arono ta rikamuramoe ndea be vatan anuive so,
weramu syo vatano kove inta aeno Amisye aneme mpaya aije ramu,
muno apa arikainye, apa ajavije inta wanatambe anaisye raije ramu.
26 Vatano napijep bekobe ti po apa ananuge rapapaya vayave irati vatano wo ranajo mai,
muno apa arikainye muno ajavi nanawamo kovo manakoe no mai.
27 Syare ana ngkakaije rapaya ra ntami yara ana ngkove obo raijar,
weamo nya susyo merere nto utantuna irati munijo we raija ntoa nuge nuganui.
28 Weye AMISY anuga no irati ana mamaisye muno moyare obo rai.
Opamo Po vatano matawandi utavondi Aije mapaya ra una marambe ramu.
Onawamo Po makum mavabe ntoa nuge nuganui,
yara vatano mamun onawamo indati awa susye maotar ti makanive.
29 Vatano kove nanawamo indati awa ura irati munije we rai,
muno utantuna raija ntoa nuge nuganui.
30 Vatano kove pamo indati po ayao ana ratantona ntitije raura,
muno apa ana dapatimuge mamo moyar.
31 Weye Amisye Apa anaparatote obo mirati no anuga rai tugaive,
weti tavondijo rai mavabe muno po rakivandije ramu.
32 Vatano kove pamo, vatano mamune po anyanyuti,
po varore rakanijo ai indamu po aubaisy.
33 Weramu AMISY Po vatano kove apaya ra no vatano mamune aneme raije ramu,
muno Po apaya ra mangke raugaje ai jewen arono patimu marane raugaje ai.
34 Syare AMISY obo Pirati wasanave amen muno watavondijo Apa ananyao rai.
Wea indati Po wasaijaseo indamu weapa ura munije we rai tawan tutir,
muno wapo raen Po vatano mamune maotar ti makanive rai.
35 Risyamo syo vatano mamune inta aen to, opamo sivuin dave muno po vatane matekar asyo,
opamo bambunin dave maisyare inyowo ntiti rave wemaisy.
36 Weramu arono rikivandeto opamo aen akatoe jewen,
syo akanijamo rinanto aije ramu.
37 Syare winyo vatano anuga nsarokir muno tavondi Amisye Apa bekere rai anyanyut,
weye vatano bekero saumane rai, wepamo indati masyoto makareye umu apa susye merere nto.
38 Yara vatano umarovave Amisye Ai nanawamo indati Wepi Po maubai bintabo,
muno vatano mamune nanawamo awa susyo merere nto rapamo ti mewen.
39 AMISY Po vatano kove mapaya irati vatano mamune mai,
muno Po makom arono una irati ana nsosobe ama uga rai.
40 AMISY Opirati Po maijaseo muno Po maugavuje vatano mamune manem uga raora,
Po maugavuje muno Po mapaya irati awa vambunine rai,
weye Amisy Obo pirati wakata gaugambe Ai.
*^ 37:0 vatano kove:Ayao Ibrani lassadiqama ine ratoe tumaimbe mare: ‘‘vatano kove.’’ Ama ino manakoe mare: ‘‘vatano ubeta Amisye Apa ananyao rai.’’ Ayao so ratoe manui no Masmur so rai.
†^ 37:0 vatano mamune:Ayao Ibrani rasha ama ine ratoe tumaimbe mare: ‘‘vatano mamun.’’ Ama ino manakoe mare: ‘‘vatano wonae Amisye Ai muno Apa ananyao rai muno ananyao rui vayave rai.’’ Ayao so ratoe manui no Masmur so rai.
‡37:1 37:1 Masmur somamo ransyerano Ibrani akrostik inta mije, weye ntavondi urupijo Ibrani ama ntetebeaje rai. Weramu ayao Yawa ntavondi urupije so rai jewen.
§37:11 37:11 Ino kaijinta no taiso: ‘‘mananibe una no kovo saumane ama uga rai.’’