ETET 5
MASMUR 107-150
107
Vatano AMISY Po mapaya irati kakai rai awa ransyeran wo kove raura seo Ai
1 Kove raura AMISY Ai, weye Opamo ko dave!
Apa muinye no tawan*107:1 Ayao Ibrani hesed ama ine ratoe tumaimbe naiso mare: ‘‘muinye no tawan.’’ Ama ino manakoe mare: ‘‘Amisye Apa muinye muno Apa anakotaro Po raurairive ti no tawan tutiro Apa kawasae Israel mansai mamo Po raveti mamaisy.’’ ntoa nuge nuganui.
2 Inya, vatano AMISY Po wasapaya to weap, koveamo wapo ayao umaso raura tutir,
weapirati vatano Po wasapaya irati anakotaro nsosobe rai weap.
3 Weapamo Amisye Po wasanugan akare to,
no munijo maran wata wanari we,
nai wanamuram muno nai varet,
nai wanansai muno nai wanampui.†107:3 wanampui: Ayao Ibrani maisyare so: ‘‘mayan.’’ Kuruno Ayao Amisy inta wo ratantona ama ine mare Mayano Akaba no no Israel ama ranijo wanampui, yara kuruno kaijinta wo ratantona ama ine mare Mayano Yasyin no no Israel ama ranijo varet.
4 Vatane umaso inta nawamo wanya ti umandayan bayave no anoko kanen,
muno wantatukambe unanuijo nto no munijo vatane una raije inta rai jewen.
5 Marore po mave muno mansawa ngkangkamandi,
muno mansanuga mamaun dave.
6 Weti arono una irati anakotaro nsosobe umaso rai, wo AMISY anonae,
umba Po mapaya irati awa ana nsosobe umaso rai.
7 Po maugav wanya irati unanuijo nsarokire obo raito,
wanawadi unanta no munijo vatane utantuna rije rai.
8 Syare wo kove raura seo AMISY Ai,
weye Apa muinye no tawan tutir,
muno Apa ana Po rave mbe anainambe vatane mai tenambe.
9 Weye Po mana raunande vatano mansawa ngkangkamandije mai indamu wo ramanam,
muno Po anaisyo ngkov dave raunanto vatano umarore mai indamu uman.‡107:9 Ayao so ratoe akato no Luk. 1:53.
10 Yara vatane inta nawamo utantuna no kaumuro ntapekane rai,§107:10,14,16 Kuruno Ayao Amisy inta wo ratantona ware kaumuro ntapekan muno poor besi mbe rarorombe arono vatano Israel mave arove no munijo Babel.
onawamo vatano makova nanawirati poor besi raasaro mai ti una siuri rai.
11 Usiuri weye wonae ubeta irati Amisye Apa ayao raiji,
muno Amisy Titi Rave Apa ananyao mamo wo ramumuibe.
12 Wemi mbewar Po anakero mangke veano matawan asyo kobe, ti awa mayare rakanive mai,
awa vambunine meweno mai ti utaopon, muno vatane inta po sopambe mai jewen.
13 Arono una irati anakotaro nsosobe umaso rai, wo AMISY anonae,
umba Po mapaya irati awa ana nsosobe mai umaso rai.
14 Po maugav uje irati ngkaumudi ntapekane raora,
muno Po poor besije rapaya irati mai.
15 Syare wo kove raura seo AMISY Ai,
weye Apa muinye no tawan tutir,
muno Apa ana Po rave mbe anainambe vatane mai tenambe.
16 Weye Po unsanda tembaga randujai ti ntuna,
muno Po ama kekepo besi raotadi ti ndanduiny.
17 Vatane inta nawamo vatano wananepabe weye wonae ubeta Amisye Aiji,
onawamo usiuri mangkebe weye wo ana ngkakai rave.
18 Wenawamo wonae anaisye rai tenambe,
muno onawamo uta usayae unsanda amanija rai to.
19 Weti arono una irati anakotaro nsosobe umaso rai, wo AMISY anonae,
umba Po mapaya irati awa ana nsosobe umaso rai.
20 Payaode mai vayave weamo usauman kobe,
muno Po mapaya irati atemo wene rai.
21 Syare wo kove raura seo AMISY Ai,
weye Apa muinye no tawan tutir,
muno Apa ana Po rave mbe anainambe vatane mai tenambe.
22 Syare wo maere raugav wo rameseo indamu wo kove raura seo Amisye Ai,
muno mansanayanambe wo Apa ana dave rariri!
23 Vatane inta nawamo wo nyomane vone raiyaive no mayane vone warave,
nai mayano maneka wem wanamavumbe.
24 Wo AMISY Apa anakotaro Po rave raen,
muno wo anapaporainyo Po rave no mayano ntento warave raen tavon.
25 Purarijato mayane rai ti ovaro repe tipu,
aneae akokoe ntitije mpapoambe.
26 Mo nyomane raijaseo ti nto no kakavine warae,
mo rantuvudi akasyo aneae ama uga raito,
onawamo ujaniv dave weye mansansowave ana ngkakai rai.
27 Aneae mo maijaseo maugaje ti mansamune nsadirae,
muno ubabarive maisyare vatane inta maeno awije rai wemaisy,
muno awa ana udatantona meweno mai.
28 Weti arono una irati anakotaro nsosobe umaso rai, wo AMISY anonae,
umba Po mapaya irati awa ana nsosobe umaso rai.
29 Po ovaro rep umaso ansopi ti tanamanin,
umba aneae mpapoambe ntanamanin tavon.
30 Vatano una no nyomane rai umaso manayanambe weye ovare tanamanin to,
umba Amisy Po maugavo munijo ubekedai raronto.
31 Syare wo kove raura seo AMISY Ai,
weye Apa muinye no tawan tutir,
muno Apa ana Po rave mbe anainambe vatane mai tenambe.
32 Koveamo wo Amisye aijaseo titive no anugane awa yasyin,
muno wo ararimbe no vatano ube akarive anugane rai mansamun.*107:32 Ayao Ibrani maisyare so: ‘‘vatano awa akoe matu,’’ ama ine mare ube akarive.
33-34 Vatano munije inta nawamo awa ana udave ngkakainoanive,
weti Amisye Po mana raveti mparikisy anyi ti mbe anoko sapave,
muno mana ama vune ngkanen anyi tavon ti mbe kopa ngkanembe,
muno Po kopa minsine raveti nsakam ti anare ntubai kakai.
35 Weramu umba Amisye Po anoko kanene umaso raveti mana ntananamo rai,
Po kopa ngkanen dave raveti mana ami ntatipu rai jakato.
36 Po vatano marore maugaveto una no we,
weti wo munije inta rauseo ntet indamu utantuna rai no we.
37 Wo nawaisye raperam ti wo anare kamije rangkiki rai janyi,
muno wo anggurije rayanyumo rai,
ti mo mane rauguje nsamumbe rave ti wo ranugan anyi.
38 Amisye Po kove raugaje mai ti awa arikainye wanui rave,
muno maero wo makume awa wanui miridi nseo rave kobe.
39 Weramu soamo utaopon to muno awa wanui miridi makaje,
weye awa marova wo mapinde, wo matawanto mangkebe ti mansanimaumbe rave.
40 Amisye seambe vatano akokoe mai ti Po maveti awa tame maje,
muno Po maveti wanya umandayan bayave no munijo ngkanembe unanui wo raito mewen dai rai.
41 Weramu vatano awa ananu jajewembe mai nawamo, Amisye Po maijaseo no awa siuri rai,
muno Po kove raugaje mai ti awa susyo wo mampame wanui rave kobe.
42 Vatano manuga nsarokiro Amisye Ai wo Apa ana dave umaso raen ti umananibe,
yara vatano mamune nawamo mawa ntapumi ti wayao kakai.
43 Are pirati apa ana datantona ngkov?
Weamo syare po ana so ratantona mavabe,
muno po AMISY Apa muinyo no tawane ratantonave.
*107:1 107:1 Ayao Ibrani hesed ama ine ratoe tumaimbe naiso mare: ‘‘muinye no tawan.’’ Ama ino manakoe mare: ‘‘Amisye Apa muinye muno Apa anakotaro Po raurairive ti no tawan tutiro Apa kawasae Israel mansai mamo Po raveti mamaisy.’’
†107:3 107:3 wanampui: Ayao Ibrani maisyare so: ‘‘mayan.’’ Kuruno Ayao Amisy inta wo ratantona ama ine mare Mayano Akaba no no Israel ama ranijo wanampui, yara kuruno kaijinta wo ratantona ama ine mare Mayano Yasyin no no Israel ama ranijo varet.
‡107:9 107:9 Ayao so ratoe akato no Luk. 1:53.
§107:10 107:10,14,16 Kuruno Ayao Amisy inta wo ratantona ware kaumuro ntapekan muno poor besi mbe rarorombe arono vatano Israel mave arove no munijo Babel.
*107:32 107:32 Ayao Ibrani maisyare so: ‘‘vatano awa akoe matu,’’ ama ine mare ube akarive.