1 Te pur zecquɨ tuby bniniin ni riáld herency lalzi náby bichiin, laaby xíteete guelrnabeeti napby zectiziac tuby mos, masquɨ xtenby a ná de xixten xtadby. 2 Per nuu de ni rcualo ne rnabee laaby ne de xixtenby axtquɨ chi idzɨny dxi ni gunii xtadby icáaby herencyqui. 3 Ziygaczaquɨy dunnɨ, zecac de bniiniy gucnɨ gulo pur ni bionuun irate de costumbrɨ xte bɨnguɨchliu. 4 Ne Dios chi bdzɨny dxi guc zec ni guniiny gac, laany bxiaaldny Lliinny Jesucrist ni bdzɨny lo guɨchliuré pur tuby gunaa. Ax gubánny zectisy ni rnabee ley ni bsanné Moisés dunnɨ 5 par güelee bldány bniety lo leyqui ax güelee nan de lliin Dios.

6 Ne pur ni anan lliin Dios, laany bxiaaldny Spíritu Sant xte Lliinny Jesucrist par ibeznénny, ax pur Spíritqui rniin: “¡Xtadnɨ Dios!” 7 Pur ningui aquɨtru nátin zec de mos sino que pur ni anan de lliin Dios, ax sdxaldnɨ herency xtenny pur Crist.

8 Guloru deni gady gumbeet merpac Dios, laat baantɨ sirvɨ lo de ni rlilot ná Dios ne niclɨ gati Diostidengui. 9 Per anre ni arumbeet Dios o ni arumbeeza Dios laat, ¿xínii rcaaztɨ ibíi gúntɨ iralozy de ni baantɨ gulo? ¿Xínii rcaaztɨ ibíi gactɨ zecpacza de esclav xte de cosqui stuby? 10 Anre ni agubíi zénet cuend xi de dxi o xi de búiu o xi de tiamp o xi de iz ná par gúntɨ tuby cos o stuby cosza zec ni guc xcostumbrɨt gulo. 11 Cuantsi rdxibia pur laat te, ¡tuguanla gadyquɨ bseed xlieezia laat!

12 Pur ningui rguiin rnaaba lot de xcumpniera: gulbány zec ni nabánia, zec ni baania pur bziientɨ dec tubylote sáan rac. Quɨt caniitia laat dec nuu xi mal abaantɨ nare 13 te pur laat nántɨ dec gulogulote chi bseeda laat de didxzaac xte Jesucrist, nare racxúa chiy. 14 Per masquɨ ziy laat belaznét nare. Quɨt baantit despresy nare niclɨza quɨt gulelaaztit naa, sino que baantɨ cuend nare zecpacza tuby ánglɨ xte Dios o zecpacza lagacac Jesucrist. 15 Nare nánna dec belati relee axt de bslot sbéet par ninɨɨdxtɨ nare. Ne anre, ¿cún ni rcaaztɨ naa? 16 O, ¿ta lalza rdxichnét nare pur ni guniia laat ni ná didxldí?

17 Rguixtiia lot dec de bɨny ni cayun pur gúntɨ cuend xtiidxdeb, gati dibylotisti rcaazdeb laat sino que xgabdeb ná: isaantɨ ni bseeda laat ax mazru gúntɨ cuend xtiidxdeb. 18 Xíteete náti icaaz bniety saani per par güen ne iduibteza tiamp, gati chi zuguanézia laat. 19 Par nare laat nát zecpacza de lliinia. Ax agubíi nuua nalas pur laat, zecpacza ni rdeed tuby gunaa nalas par idzɨny lliinbɨ guɨchliu. Ne zelaa teda nalas axtisy chi azenuupactɨ Jesucrist zec ni riáld. 20 ¡Belrulati zuguaníaa laat te par ininépaca laat, per ziy anre niclɨ quɨt ganna xa gúna cun laat!

21 Per gulnii nare, laat ni rcaaztɨ ibánytɨ zec ni rnabee ley: ¿Ta gady gacbeet xi rnii ley? 22 Ley rnii dec guu tiop llingaan Abraham. Guu tuby llingaanbɨ pur tuby gunaa ni bdialá Agar ni guc esclav xtenbɨ, ne guu tuby llingaanbɨ purquɨpac chialbɨ Sara. 23 Llingaan Abraham ni cuáa esclav xtenbɨ, gulbɨ pur ni bguaald Abraham esclavqui. Per llingaanbɨ ni cuáa chialquɨpacbɨ, gulbɨ per agati purzíti ni bguaald Abraham chialni sino que par guc cumplir promes ni baany Dios cun laab. 24 Anre Sara ne Agar, de bniety gunaaré ná ejemplɨ par dunnɨ pur tiop nez ni nuu par chanuu bniety. Tuby nezqui ná guelrenuu ley ni bdeed Dios Moisés quia dany Sinaí, ax de ni zenuu leyqui laadeb nádeb zec esclav xte leyqui zec ni guc Agar esclav xte Abraham. 25 Ne laat nántɨ dec nez Arabia ná dany Sinaí ax de bniety nezqui raipdeb danyqui, Agar. Per anre Jerusalén ná zec danyqui te pur irate de ni zá nez Jerusalén, de ni zenuu ley, laadeb nádeb zecac esclav xte ley. 26 Per dunnɨ quɨt nabánytin zec esclav xte de cosqui, ax llayabaa ná Jerusalén xtennɨ rut quɨt nátiza esclav, zec ni quɨt gucti Sara esclav. 27 Ne lo xquiits Dios rnii:

28 Nare rniia laat dec zectiziac ni gul Isaac pur ni güeldilaaz Abraham xtiidx Dios gac ziy, ziytiziacza dunnɨ anan lliin Dios pur ni roldilaaznɨ xtiidxny. 29 Ne gulalqui llingaan Agar, baanbɨ burlɨ llingaan chial Abraham. Ziytiziacza anre de ni zenuu ley rundeb burlɨ dunnɨ ni rbeznén Spíritu Sant, pur ni anan lliin Dios. 30 Per laat nántɨ dec lo xquiits Dios rnii: “Bdialáa esclav xtenu cun tod llingaanbɨ, te pur quɨt náti par igaazy herency ni riáld llingaan chialu.” 31 Pur ningui de xcumpniera, dunnɨ quɨt nátin zec llingaan esclavqui sino que dunnɨ nan zec llingaan chial Abraham pur ni quɨt rnabeeti ley dunnɨ.