13
Pabluha rulhuxe rinnebie len ka benne se'eke lhe'esi Corinto
1 Nuní aka tsunna libe itaa ata se'ele‑na nna iyába nu riyasa aka elhuxtisi geni teeki se'e chupa o tsunna ka benne biyú loke bixa uka. Aníha kini aka elhuxtisi ge nu ukaha. 2 Chiba xpeya le tti bitaa ata se'ele‑na nu berupa libeha, nnanna rea idittu redennea attu libe ria, ganna chi isiaya attuha ni ttúle labí satua lasia le: ni ka nu benkana tulha ttuha lhe nigaba nuxaru attu benne lhe. 3 Aníha kini lebi'i ilenle deki Cristuha‑ba nuha rinnee tti rinnea. Benneha labí a eyaxanie bixa udhake le, sinuki tsitsi udhaka benneha le. 4 Gwalí galá benneha beyake ttu benne labí tsitsi uná lebie tti utábie lo ya kurusiha, ttaka de Tata Do Yebáha ra tsitsi lebie, nu ra tsitsi leeha beni kini nnanna anka ben Cristuha. Anágaba ri'itu nnanna ratetu ttiba gwate benneha, labí tsitsi re letu, ttaka de Tata Do Yebáha ra tsitsi lebie, de nuha nna runie kini ri'itu tse'etu aka bentu de se'e lentu Cristuha. Aníha kini ixútu ki ute nátu len lebi'i.
5 La lebi'iba gwaltse'e gwalulanni gele ganna gwalínle ria lele Cristuha. Lebi'i gwa yúbale, benneha doe lhe'e lastole. Ganna abíba doe lhe'e lastole, la'ania nna chiba binittile arlo Tata Do Yebáha. 6 Neti ruxxenba lasia deki lebi'i gokinniba ikile deki ri'itu labí binittitu arloe. 7 Ri'itu rinnabatu len Tata Do Yebáha kini lebi'i abittu uinle nu satsa. Laa ruingatu kini ule'e deki ri'itu iria tsetu arlo Tata Do Yebáha. ¡Ko'o! Sinuki ruinlatu kini lebi'i tse'ele uinle latsiru, meskila ri'itu ule'e deki rinittitu arloe. 8 Kumu ri'itu ruintu nu raxxína len nu gwalíga anka tisa ge Tata Do Yebáha, labí ruintu nu abittu raxxína len tisa geeha. 9 Laxkala ittaba du letu de labí tsitsi re letu, lebi'i nna kwe tsitsila lele. Nuní rinnabatu gele len Tata Do Yebáha kini isinle akale benne tse'e tsitsirule lo neda geeha. 10 De nuha nna nnanna rea idittu runia yetsi‑ni nna ridhelhaa na len lebi'i, kini ganna chi bisiaya ata se'ele‑na abittu udhaka disaa le. Kumu Tata Xisiha labí betebie lo neda len neti kini utse'e looa le, sinuki betelee lo neda kia ki use'e tsitsia le.
11 Debá nuníba rigixxi'ania le xa betsi to,
gwaltse'e itta,
lhe gwaluin doelha kini isinle akale benne tse'e tsitsile lo neda ge Tata Do Yebáha,
lhe anágaba gwaluse'e tsitsi luesile,
lhe ttúba gwalulaba lele,
lhe latsiru gwaltse'e len luesile lhe.
Aná nna Tata Do Yebáha gwadúgabe len lebi'i. Benneha rakanie geri'i lhe ruse'e tsebie ri'i lhe.
12 Gwalugwe luesile ttu padiuxi lhe gwaligo ttu xxaga luesile lhe. 13 Iyába ka benne se'e nii ka benne chi riesini Tata Do Yebáha ki akake gebie ridhelhake ttu padiuxi gele.
14 Jesucristu benne anke Xxanari'iha edá lebie aka lenie le lhe anágaba edí baale elha si'i lasi ge Tata Do Yebáha, lhe Espíritu geeha satía dhoe len lebi'i. Amén.