3
Gasina dika uin ka benne ganna chi dabiga isia ka sá esia Jesucristuha
1 Timoteo, tegaba ki unalu nu kixxi'aya‑ni: ganna chi dabiga isia ka sá daluxaha, la'ania yalhá tsitsi sate ka benne, 2 kumu la'ania tse'e ka nu sun tteruba gekani uchacha ikikani,
lhe tsu'u xxatta lekani belhiu lhe.
Anágaba uinkana ttaba
lhe uinkana deki ankakana ka nu ra xxeni lekani lhe.
Anágaba akakana ka nu kuakana bala'ana ge ka benne,
lhe labíru udokana tisa ge ka xxudikani lhe.
Nigaba ixkixaru a ugwekana ka benne,
lhe anágaba akagabakana ka nu abittu tsia lekani Tata Do Yebáha,
3 lhe labí aka si'ikinna ka benne lhe,
nigaba a satua lekani ke lhe.
Anágaba akagabakana ka nu ujuakinna ka benne ka tisa a ixú,
lhe ttixka uinkana ttu bixa, ttebia ttelakana tti uinkana nuha.
Lhe anágaba akakana ka nu utía xxatta,
lhe akagabakana ka nu labí tsu'u lekani bixaba nu tse ruin ka benne,
4 lhe utekana ka benne se'e tse lenkana lasi ná ka nu udhaka xiikana ke.
Lhe anágaba akakana ka nu nnelaba uinkana ttu bixa, labí lade'axa ulaba lekani tti uinkana nuha,
lhe akakana ka nu tsapi xxattakana ge nu uinkana.
Lhe anágaba tsu'urula lekani uinkana nu raka yiesi lo yu‑ni attichula akakinna ge Tata Do Yebáha.
5 Ule'ekana deki rudo lekani nu anka ge Tata Do Yebáha, ttaka len elha ruin gekani rula'a deki labí liikinna ria lekanie.
Lu bekwitta kwe'e ka nu ruin aná.
6 Kumu luesi ka nu ruin aná, ka nuná ratta'akana lhe'e ka yo'o nna ridí yiekana ka nuila ka nu nnelaba ridielhakana ruinkana nu abittu anka tse. Ka luesi nuila ruin aná ruinbakana iyá looba nu satsa rakaba lekani 7 nna satíaba raka lekani udo nagakani ge ka tisa kubi, ttaka ni tsa labí isinkana tte dákinna nu anka gwalí. 8 Ttiba Janes‑ni lhe Jambres‑ni lhe ulu'u ni'akani nu ra Moisés‑ni, aníha‑gaba ka nu ridí yiekana ka nuila‑na, rigu'ugaba ni'akani nu anka gwalí. Ka nuná labí rulaba lekani nu anka tse, chiba binitti ka nuná, labíru ria lekani Tata Do Yebáha attiba ankaba geni. 9 Ka nuná labí isá lenkana nu ruinkana‑na, kumu isiaba sá ilá looba deki ankakana ka nu abittu yuu, attiba bilá loo ge ka nu ulu'u ni'akani nu ra Moisés‑ni.
Pabluha rabie Timoteo‑ni: “Ben iyá nu bodha'an Tata Do Yebáha uinlu”
10 Ttaka lu chiba yulu gasina rule'a ka tisa ge Cristuha
lhe gasina re lasia lhe.
Anágaba chigaba yulu bixa raka lasia unia
lhe chigaba yulu gasina ria lasia ge Cristuha,
lhe gwa yúgabalu deki neti ankaa ttu benne re besi lasia
lhe ankaa benne si'i lasi lhe.
Anágaba nna gwa yúgabalu gasina rutto ruchíaya lo iyá nu ratea,
11 lhe gasina ridú nookana neti lhe.
Anágaba nna gwa yúgabalu gasina ratea tti ruyúa elha disa, attiba luesi ka elha disa gwatea lhe'esi Antioquía‑ni lhe lhe'esi Iconio‑ni lhe lhe'esi Listra‑ni lhe. Iyába lo ka elha disa‑ni bodilaa Tata Xisiha neti. 12 Anágaba iyába ka benne raka leke udo leke nu anka ge Tata Do Yebáha de babake len Jesucristuha, ka benneha anágaba sateke, dhu noogabakana ke. 13 Ttaka ka nu ruin satsa lhe ka nu ruin lekani lhe, adírula satsa uinkana. Uin lekani len ka benne, anágaba ka benneha aníha‑gaba uinke lenkana.
14 Ttaka lu udola ben nu chi detilu lhe nu chi xen tsitsi lelu geni lhe, kumu lu gwa yúbalu nú bedhetinna lu ki ria lelu ge Cristuha, 15 lhe anágaba ttili ankalu nubiyú toha chi yulu ka tisa dia lo ka yetsi ge Tata Do Yebáha. Ka tisa dia lo ka yetsiha nuha ula'akanie lu, kini yulu gasina odilá Tata Do Yebáha lu de ria lelu ge Jesucristuha. 16 Iyába ka tisa dia lo ka yetsi ge Tata Do Yebáha ankake ka tisa biria ikie, lhe ankagabake ka tisa ka nu ixú ki ula'akanie ri'i lhe ki kisake ri'i tti rinittiri'i lhe. Anágaba odú lhixxake ri'i tti chi rikwadhari'i lo neda gebie lhe udhetigabakanie ri'i kini uinri'i nu dika ixú, 17 kini anáchu ttu benne ganna chi anke ge Tata Do Yebáha, benneha chi du sipe lhe chi du tsebie kini unie iyába nu anka tse.