2
Espíritu ge Tata Do Yebáha bisiabie uyu'e lati ka benne
1 Tti bisia sá tti raka laní nu tee láni Pentecostés, la'ania iyába ka benne ria leke ge Jesús‑ni ttu sade'eba ta tupake. 2 Attiruba nna iyya suba leke uyu'u be gwetsáha ttiba ata daa ttu be idí. Aníha‑ba betá tsi'ini itúba lhe'e yo'o ata se'ekeha. 3 Nianna tti uka xxe ttiba ka belha ge gi nna ugwadhikana iki ttu ttuke. 4 La'ania nuha bisia Espíritu ge Tata Do Yebáha nna uyu'e lati iyábake. Nianna tti udulo ttebake unneke ka tisa subi; unneke kua beteba Espírituha inneke.
5 Lhe'esi Jerusalén‑nigaba se'e ttu chupa ka nu ankakana nu Israel, delába ka nu rudo tsitsirukana tisa ge Tata Do Yebáha. Ka nuha dákana lhe'e iyába ka yiesi se'e yiesi lo yu‑ni. 6 Tti biyienkinna uyu'u beha, nianna betupa ttebakana ata raka nuha, nna uka tébakinna kumu ttu ttukana biyienkinna rinne ka benneha ka tisa rinnekana lhe'e ka yiesi ata udákanaha. 7 Rugía ya'abakana lhe bebanabakinna tti biyienkinna nu rakaha, nianna rinnaba tisa luesikani, rákana:
―¿Laaba ka nu Galileaba iyá ka nu se'e gwenne nii? 8 ¿Galasina nna gwa riyienbinri'i rinnekana ka tisa rinneri'i lhe'e ka yiesi ata dari'iha? 9 Ri'i ankari'i ka benne dari'i daka Partia lhe daka Media lhe daka Elam lhe dari'i daka Mesopotamia lhe daka Judea lhe anágaba daka Capadocia lhe daka Ponto lhe anágaba ka benne se'e daka Asia lhe. 10 Dágaba ka benne se'e daka Frigia lhe ka benne se'e daka Panfilia lhe daka Egipto lhe ka benne daa daka Libia nu re gaxxaba ata re lhe'esi Cirene. Se'egaba ttu chupa ka benne dáke lhe'esi Roma, se'eke ttu satti nii. Ttu chupake ankake benne Israel nna attu chupake nna labí ankake benne Israel, ttaka nna beyakake nu Israel nna riagaba leke attiba ria le ka benne Israel‑ni. 11 Se'egaba ka benne daa daka Creta lhe daka Arabia lhe. ¡Iyábari'i ka benne dari'i ka daka niha, gwa riyienbinri'i rinne ka benne‑ni ka tisa rinneri'i, rigixxi'ake ge nu xxeni ruin Tata Do Yebáha!
12 Iyába ka benne se'e niha bebanabakanie, nigaba a yuke bixa ulaba leke. Nianna tti rinnaba tisa luesike, ráke:
―¿Bí diani iyá nu raka nii?
13 Ttaka adí ka nu se'e niha nna ruxisilakana, rákana:
―¡Dusibakin nuná!
Pedruha rigixxi'ana ge Jesús‑ni
14 Nianna tti udú lii Pedruha len a sinea (11) ka apóstol ge Jesús‑ni nna unnena idisa rana ka benne se'e niha:
―Lebi'i ka benne Israel lhe iyábale ka nu se'ele lhe'esi Jerusalén‑ni, gwaludoruga nagale nu innea kini unale bixa nuní raka nii. 15 Ka nu se'e‑ni laa dusigakin nuní, lebi'i nna rale deki dusikinna, ki si ankaruba retin jaa dila nuní. 16 Nnanna, nii chi rilenle raka nu utixxi'a Joel benne uke profeta ge Tata Do Yebáha itú nu reha, tti rabie:
17 Aní ra Tata Do Yebáha: “Ganna chi dabigana isia ka sá daluxaha,
la'ania ugadia Espíritu kia‑ni lati iyábale ka benne se'ele yiesi lo yu‑ni.
La'ania ka xi'in biyúleha lhe ka xi'iniunnáleha
kixxi'akinna le nu raka lasia unale.
Ka nu kwiti geleha nna unia kini ula'akinna ttu bixa.
Anágaba ka tatuxtoo to geleha uingabaa kini itsiakanie ka ela.
18 La'ania ugadia Espíritu kia‑ni lati ka benne biyú lhe lati ka benne nuila lhe,
delába ka benne ixúti ke kini kixxi'ake nu raka lasia una adí ka benne.
19 Yebáha unia kini aka ttu bixa, kini iláni ka benne nna ebanakanie geni:
Yiesi lo yu‑ni nna unia kini ilali reni lhe iria gi lhe chadha seni lhe.
20 Tatubisa‑na nna echulha lobie,
nanto beo‑na nna eyake xiná attiba reni.
Iyá nuní aka atti lanila isia sá esia Tata Xisiha.
Ttu sá xxeni nuha aka la'ania lhe ttu sá nu dika ebanani ka benne geni lhe,
21 nna iyába ka benne ganna innabake len Tata Xisiha, labie nna godilábe ke.”
22 ’Lebi'i xa benne Israel, ―ra Pedruha― gwaludoruga nagale nu upeya le: Lebi'i gwa yúbale, Tata Do Yebáha benie kini Jesús ge Nazaret‑ni benie ka milagru lhe benie adíru ka nu bebaninle geni lagwi gele. Iyá nuní benie kini bele'ebie deki lee udhelhe Jesús‑ni. 23 Benneha nuha betelee lasi ná ka nu ruin satsaha kini bettikane lo ya kurusiha. Ukaba attiba chi ga'anani Tata Do Yebáha aka. 24 Jesús‑ni nuha belhidha ben Tata Do Yebáha lo elhuttiha, bodilee bie lo elha disa biyúe ge elhuttiha, kumu elhuttiha labí udaana uin genie. 25 Ge Jesús‑ni nuha unne David‑ni lo ka yetsi ge Tata Do Yebáha, tti rana:
Satíaba riláti Tata Xisiha danerue arloa.
Labí ruxunnina kia bixa satea, kumu benneha daka ná benbaa due.
26 De nuha nna ittaba du lasia lhe de elha gwedeaka lasi nna rulhaa gebie
lhe anágaba xen su lasiba dhoa lhe;
27 kumu lu xa Tata Xisi to kia, de chi ankaa benne chi ulesilu kini akaa gelu
de nuha nna labí odha'anlu neti lhe'e yieru baaha,
nigaba a ugwelhalu usu bela latia‑ni lhe.
28 Kwinabalu bele'enlu neti gasina aka bania ttu dia lii,
lhe anágaba nna udú ittagabalu lasia de dulu len neti.
29 ’Betsi to, gwalugwelharuga kixxi'aya ge David benne uka xuttori'iha. Yule benneha uttibe nna bigatsibe. Loora nnanna sa rilábinri'i teeba baa ge benneha. 30 Ttaka David‑ni uka galána profeta lhe anágaba nna chigaba yuna deki Tata Do Yebáha chi bodha'an tsitsi tisa gebie, ree deki ttu ka benne datiake naha, ttu ka benneha akake nu innabia, attiba lana ukana nu unnabia. 31 Laxkala David‑ni la'aniali attisidiba chiba rilenna deki eyaka benba Cristuha lo elhuttiha. De nuha nna unnena rana, labí eya'an benneha yiesi elhuttiha lhe nigaba labí usu bela lati benneha lhe. 32 Gwalíba nna Jesús‑niba nuha belhidha ben Tata Do Yebáha lo elhuttiha nna iyábatu biyú lotu aníha‑ba uka. 33 Aníoka nna uxí lidhaka Jesús‑ni nna bisine udoe daka ná ben ge Tata Do Yebáha, nianna tti begwebie benneha Espíritu geeha, delába Espíritu nu chi rabie deki ugwebie Jesús‑ni. Espírituha nuní chi begadi Jesús‑ni latitu, de nuha nna riyieninle lhe rilenle nu raka nnanna. 34 Lebi'i gwa yúbale laa David‑niga nuha beyapi yebáha, kumu kwinaba lana unnena rana:
Tata Do Yebáha ree Cristu benne runie neti mandaduha:
“Utá udo daka ná bania.
35 Niiba dholu axtaliba ganna chi bese'a
ka nu abittu raka uyúkana lu, kini lu nna ulealu ikikani.”
36 ’De nuha nna iyá ttele ka benne Israel, teeki una tsele deki Jesús benne betále lo ya kurusiha, benneha chi ben Tata Do Yebáha bie kini ake Xxanari'i lhe ake Cristu lhe.
37 Tti biyienkinna nu ra Pedruha nna ttiruba bega'a dina lhe'e lastokani, nianna tti unnaba tisakana benneha lhe adí ka apóstoal lhe, rákana ke:
―Betsi to, ¿bíla anka nu uintu ganna?
38 Pedruha nna bekabina gekani, rana kana:
―Gwalodúna le ge nu ruinle nna gwalodaxxu neda ge Tata Do Yebáha nna kua ttu ttule gwaligadi inda nna udettile lá Jesucristuha atti gadile indaha. Aníha kini dhi Tata Do Yebáha elha xen lasi ge ka tulha chi benle. Nianna tti utebie Espíritu geeha len lebi'i. 39 Espírituha nuha chi ra Tata Do Yebáha deki utebie gele lhe utebie ge ka xi'inle ka nu si daa lhe, anágaba nna utegabe Espírituha ge iyába ka benne se'e idittu, delába iyába ka benne gaxi Tata Do Yebaa benne anka Xxanari'iha.
40 Ixeba nu unne Pedruha rulisana ka benne se'e niha lhe rágabana ke:
―Gwalukwitta kwe'e ka nu ruin satsa se'e nnanna.
Ka benne ria leke ge Jesús‑ni, ttu tsapaba se'eke
41 Aníoka nna ka benne ugía leke ge ka tisa unne Pedruha, ka benneha udibake inda nna la sáha tteba nna bisela ttiba a tsunna mili ka benne kubi. Biselake len ka benne chi ria leke ge Jesús‑ni. 42 Iyába ka benne chi ria lekeha gwa ruinbake nu rule'eni ka apóstoal ke. Ttu tsapaba se'e len luesike lhe turo'oba roke yetta lhe ttúba rinneke tti rilhapike tisa len Tata Do Yebáha lhe. 43 Iyába ka benne rasibakanie de rilákanie ixeba ka milagru lhe adíru ka nu rebanakanie geni ruin ka apóstol ge Jesús‑ni. 44 Iyába ka benne chi ria leke ge Jesús‑ni ttu tsapaba se'e len luesike lhe anágaba bixaba tee geke nna ge iyábake reyaka nuha. 45 Rutto'obake ka lo yu gekeha lhe adíru nu tee geke lhe, belhuha nna ritidhina geke kua riyasabani ttu ttuke. 46 Labí rudhanke, ttu ttu sába ritupake ata do yotuha lhe anágaba lhe'e ka yo'o gekeha itú iki itú leke ro len luesike yetta de elha gwedeaka lasi 47 lhe anágaba rulhagabake ge Tata Do Yebáha. Laxkala iyába ka nu lhe'esi Jerusalén‑ni rakakinna geke, lhe ttu ttu ságaba rutselaru Tata Xisiha adíru ka benne chi ga'ananie odilábie ke, rutsele ke len ka benne chi ria leke gebie.