1 Laka re Apolos‑ni lhe'esi Corinto‑ni, Pabluha nna iki de chi utena lhe'e ka yiesi se'e daka ata sia ka i'iyaha, nianna tti ugwadina bisinna lhe'esi Éfeso. Niha gwaxxakana ttu chupa ka benne chi ria leke ge Jesús‑ni. 2 Unnaba tisana ka benneha, rana ke:

―¿Si gwa uxíle Espíritu ge Tata Do Yebáha tti ugía lele ge Jesús‑ni?

Ka benneha nna bekabike, ráke na:

―Niru tsa labí chi biyienintu ge Espíritu ge Tata Do Yebáha.

3 Nianna tti unnaba tisa Pabluha ke, rana ke:

―Tti udile indaha, ¿bí ge udile nuha?

Ka benneha nna bekabike, ráke:

―Uditu inda de ka tisa utixxi'en Juan‑ni ri'itu.

4 Pabluha nna rana ke:

―Juan‑ni begadina ka benne inda de bodúna ke ge nu ruinkeha nna bodaxxuke neda ge Tata Do Yebáha. La'ania rana ke deki teeki tsia leke ge benne si isiaha, delába Jesús benne anke Cristuha.

5 Tti biyienkanie nu ra Pabluha, nianna begadi ttebakana ke inda bedettikana lá Jesús benne anke Xxanari'iha. 6 Tti uxxua ná Pabluha iki ka benneha, la'ania bisia Espíritu ge Tata Do Yebáha uyu'e latike nna uduloke unneke attu tisa subi lhe utixxi'ake nu raka le Tata Do Yebáha una ka benne lhe. 7 Ttiba tsi'inu (12) anka de iyá tte ka benne biyú udi indaha.

8 Pabluha, delo tsunna beaha, riana lhe'e yo'o ata rudheti ka nu Israel‑ni ka tisa ge Tata Do Yebáha. Labí rasinna ridaka lenna kana lhe ruinna kini okinni ikikani deki Tata Do Yebáha raka lebie innabie kana. 9 Ttaka adíkana nna ben tsitsiba lastokani labí uka lekani tsia lekani ge nu ra Pabluha. Betse'e loona neda ge Jesús‑ni rigualakana bala'ana geni arlo ka benne. Nianna bekwittala Pabluha arlo ka nu rigu'u ni'akani nu ranaha, nna ulesilana ka benne chi ria leke ge Jesús‑ni nna dia lenna ke lhe'e iscuela banani ttu nubiyú nu tee láni Tirano. Niha‑ba rule'enna ke ttu ttu sába. 10 Aníha‑ba benna delo chupa idaha. Laxkala iyába ka nu se'e daka Asia‑ni, ka nu Israel lhe ka nu abittu ankakana nu Israel lhe, iyábakana biyienkinna ka tisa ge Jesús benne anke Xxanari'iha.

11 Tata Do Yebáha nna xxeniba anka ka milagru runie. Rixúnie Pabluha kini ruinna ka nuha. 12 Laxkala axtaba ka lari ruxí loniha lhe ka lari rutá arloniha recheke ka nuha ata tee ka benne rani gekeha. Ka isagwe yu'u ka benneha nna gwa reria ttebana latike. Anágaba lhe ata yu'u espíritu satsa latike, gwa reria ttegaba nuha lati ka benneha. 13 Ttaka ttu chupa ka nu Israel ka nu reki rebeakana ka espíritu satsa yu'u lati ka benne, ka nuha bengabakana deki udettikana lá Jesús benne anke Xxanari'iha kini eria ka espíritu satsaha lati ka benneha, nianna tti rákana ka espíritu satsaha:

―Jesús benne rigixxi'a Pabluha gebie, benneha rudettitu rulisatu le, gwaleria lati ka benne‑ni.

14 Lhe'e ka nu ruin luesi nuní selagaba gasi ka xi'in biyú ttu nu Israel tee láni Esceva. Esceva ankana ttu ka nu loni ge adí ka bixxudiha. 15 Ttaka ttu lidú nna bekabi espíritu satsaha ge ka nu kwitiha, rana kana:

―Neti gwankabiabati Jesús‑ni lhe yúgabaa nuxa nuha Pablo lhe, ttaka lebi'i nna, ¿nú ankale?

16 Nianna bebi'i noo tteba nubiyú yu'u latini espíritu satsaha ka nu kwitiha, uya xxattana kana nna udaabana lokani, itú detuntubakana lhe tee gwebakana boxunnikana lo nubiyúha lhe'e yo'o ata se'ekanaha. 17 Iyába ka nu se'e lhe'esi Éfeso‑ni, ka nu Israel lhe ka nu abittu ankakana nu Israel lhe, tti binakana ge nu ukaha nna yalhá usi xxattakinna. Aníha uka nna bokinni ikikani nna rákana:

―¡Xxeniba ra le Jesús benne anke Xxanari'iha!

18 Ixeba ka nu ugía lekani ge Jesús‑ni risiakana nna rigixxi'akana lo benne ge nu satsa chi benkanaha. 19 Ixegaba ka nu benkana ge elha gwesá, ka nuha bottupakana ka libru ka nu bedhetikanaha nna bettekana ka nuha lo gi arlo iyába ka benne tupa niha. Tti uleakana lidhaka ka libruha nna gwalhenna ge ka nuha ttiba tsieyona (50) mili belhiu plata.

20 Ka tisa rigixxi'ake ge Jesús benne anke Xxanari'iha, ka tisaha tsitsiba ra leke lhe ttu diabake radhi chiettiruke lhe.

21 Iki de chi uka iyá nuní, nianna tti bebeki le Pabluha tsiana daka Macedonia lhe daka Acaya lhe, nialiba nna tti tsiana Jerusalén‑ni, lhe rágabana:

―Iki de chi ugíaya Jerusalén‑ni, nianna teeki tsiaya Roma‑ni.

22 Nianna tti udhelhana chupa ka benne rute náke lennaha, kini diake daka Macedonia, delába udhelhana Timoteo‑ni lhe Erasto‑ni lhe. Lana nna isá toruba beya'anna daka Asia.

23 La'ania nuha uka ttu elha utilha xxeni lhe'esi Éfeso‑ni de chi rudaxxu ka benne lhe'esiha neda ge Jesús‑ni. 24 Udulo nuha delo ni'a ge ttu nubiyú tee láni Demetrio. Nuha ruinna ka yo'o to ata rudo ka benne diosi nu tee láni Artemisa. Ka yo'o toha ankakana ge plata. Yalhá ixeni belhiu rodha'anna ge ka nu ruinkana luesi ka yo'o toha. 25 Demetrio‑ni nna bottupana ka nu riben sina geniha lhe adíru ka nu ruinkana luesi sinaha lhe, nianna tti rana ka nuha:

―Tata to, lebi'i gwa yu xeabale, len sina ruinri'i‑ni yalhá lhe'e belhiu ribeari'i. 26 Ttaka nnanna gwa riyienbinle lhe gwa rilábinle lhe reki ttu nubiyú tee láni Pablo ridí yiena ka benne rana ke deki laa diosiga anka ka nu ruinri'i len ni'a nári'i. Laxkala ixeba ka benne chi uxí yiena ke. Gwea nna laa suna lhe'esi Éfeso‑niga ridí yiena ka benne, anágaba ruinna lhe'e adíru ka yiesi se'e itúba daka lo yu ge Asia‑ni. 27 Labí suna ri'i ruxunnina geri'i unnittiri'i sina geri'i‑ni, anágaba ruxunnigabana ku'u ni'a ka benne yotu ge nan Artemisa geri'i‑ni, delába diosi benne ra xxeni lee‑ni lhe anágaba lhe dhulogaba ka benne ilhida gaake bie lhe. Lebi'i gwa yúbale iyába ka benne se'e lo yu ge Asia‑ni lhe ka benne se'e itúba yiesi lo yu‑ni lhe, iyábake rudú xibike arlo benne‑ni.

28 Tti biyienkin nuha nu ranaha, nianna bisa'a xxattakinna nna ribesi'abakana, rákana:

―¡Xxeniba ra le nan Artemisa ge ka nu Éfeso‑ni!

29 Ttu gayya xxeniba uka itúba lhe'esiha la'ania. Nianna iyábakana bebi'i nookana chupa ka benne biyú, ttúbie tee lábie Gayo, attubie nna tee lábie Aristarco. Ka benneha ankake benne ge Macedonia lhe lake nuha reki lenke Pabluha. Ka benneha nuha na'ayakana ke bisin lenkana ke lhe'e ata retupa ka benne ge yiesiha tti rugíake ttu bixa elhatsa. 30 Pabluha nna ruinna ga'ana niha kini inne lenna ka benne saa niha, ttaka ka benne chi ria leke ge Jesús‑ni labí begwelhake na ga'ana. 31 Anágaba ttu chupa ka nu ankakana ge Asia anka ladikani. Ka nuha se'e tsekana len Pabluha. Lakana udhelhakana ka nu ugíakana gweasikana Pabluha abittu satta'ana lo ka benne saa niha. 32 Ka nu saa niha nna raka gayyaba yu'ukana, a riria ni'akinna bixa uinkana. Nu subi subiba rákana, adíkana nna nigaba a yúkana bí ge tupakana niha. 33 Ttu chupa ka nu Israel selakana lhe'e ka benne saa niha, ka nuha besigakana ttu nubiyú tee láni Alejandro kini innena lo ka benne saa niha, kini edína ka Aristarco‑ni. Nianna tti bettá náni kini beyaka sii ka benne yu'u rigiyyaha kini aka innena. 34 Ttaka tti ute dákin benneha deki nu Israel‑ba anka Alejandro‑ni, nianna iyábake tulapaba uresi'ake. Ttiba chupa ura gwadána uresi'ake, ráke:

―¡Xxeniba ra le nan Artemisa ge ka nu Éfeso‑ni!

35 Nu anka escribanu ge lhe'esiha nna atti chi biri'a lenna beyaka sii ka nu yu'u ubesi'aha, nianna tti unnena, rana:

―Benne ge Éfeso, lebi'i gwa yu xeabale, iyába ka benne yuke deki ri'i, ka benne lhe'esi‑ni, ankari'i ka benne ruyú tsitsiri'i yotu ge diosi Artemisa geri'i‑ni, benne ra xxeni lee‑ni lhe ruyú tsitsigabari'i retratu gee‑ni, nu dana yebáha nna biginnina yiesi lo yu‑ni. 36 Laxkala iyába ka benne labí dika nna innáke labí lii nuní. De nuha nna lebi'i siiba gwaleyaka, abittuba udiubaxxi lele uinle ttu bixa. 37 Kumu ka nubiyú ka nu gwadaxxule se'e nii, labí chi uta'a ka nuní bixa lhanakana lhe'e yotu ge nana xunaxi geri'i‑ni, nigaba labí rigua ka nuní bala'ana gebie lhe. 38 Ganna si Demetrio‑ni lenna ka nu riben sina gen‑na, ganna lakana tee elha gaa gekani len nuxa benne, gwa se'eba ka uxtisi geri'i lhe gwa siaba ka yo'o ata raka elhuxtisi lhe. Arlo ka nuná tsiakana saga'a luesikani ganna bixa ge ritilhakana 39 nna ganna lebi'i rinnabale aka attu nu subi, gwa dikabana etupari'i ro'o yo'o lagwi nna inneri'i ge nuha. 40 Kumu nu ruinri'i nasá, ruxunnibana geri'i usiakana ikiri'i deki rutsatsari'i ka benne. Ganna ttixka innaba tisakana ri'i innákana: ¿Bí lo ni'a ge nna rutsatsale ka benne? La'ania nna, ¿bíla ekabiri'i gekani ganna?

41 Nuha‑ba rana nna bedhelhana ka benne tupa niha deyyake.