1 Tti bina Jesús‑ni deki ka fariseo‑ni chi biyienkinna ra ka benne: “Jesús‑ni raxirue ixe ka benne ki sanalhake bie lhe rugadirue ixe ka benne inda tti Juan‑ni” 2 (meskiba laa Jesús‑ni nuha rugadie ka benneha inda, ka benne rudhetinieha‑ba rugadike ka benneha inda), 3 tti bina Jesús‑ni nu chi biyienkin fariseo‑ni, nianna bedábie daka Judea nna besine daka Galilea attu libe. 4 Tti deyyeha nna teeki betebie daka Samaria 5 nna besine lhe'e ttu yiesi ge niha. Yiesiha tee láni Sicar. Rena gaxxaba ata tee ttu lo yu nu boka'an Jacob‑ni xi'in biyúni José‑ni. 6 Niha re yiela inda tee láni Yiela Ge Jacob. Jesús‑ni nna de chi resanie deyu'e neda, de nuha nna besine ro'o yielaha nna ure ttebe. Ttiba retin tsi'inu (12) nuha chi anka la'ania. 7 Niha bisin ttu nuila ge Samaria daa nuha uxí inda. Jesús‑ni nna ree nuilaha:

―Betetti inda i'iyaa.

8 Ka benne rudhetinieha nna si diala ka benneha lhe'esiha ugo'o nu goke. 9 Nuila ge Samaria‑ni nna rane:

―¿Gasina nna rinnabalu neti inda, ki lu benne Israel‑ba ankalu, neti nna benne Samariaba neti?

Aníha rana kumu ka benne Israel‑ni lhe ka benne Samaria‑ni lhe, labí rutsá luesi ka benneha. 10 Jesús‑ni nna bekabie ge nuilaha, ree:

―Ganna ttixka lu yulu nu tse rute Tata Do Yebáha lhe ganna ttixka yulu nú benne nuní rabie lu: “Betetti inda i'iyaa”, la'ania nna gwannabalalu inda lenie, labie nna gutelee inda nu unna elha nabani gelu.

11 Nuilaha nna rane:

―Ki bigaba bi denlu ki kwealu inda‑ni xa tata. Yiela‑ni yalhá lhi'u dia nuní. ¿Gála salhealu inda nu unnana elha nabani ganna? 12 ¿Si xxenirula ra lelu tti benneola geri'i Jacob‑ni? Benneha bodha'ane yiela‑ni geri'i. Lhe'e yiela‑ni u'uye inda lhe u'uya ka xi'inieha lhe u'uya ka ku'una bia geeha lhe.

13 Jesús‑ni nna bekabie geni, ree:

―Nuxaba benne ganna i'iye inda ge yiela‑ni ebisiba benneha inda attu libe, 14 ttaka benne i'iye inda utea‑ni, ni tsa labíru ebisi benneha inda attu libe; kumu inda utea‑ni akana ttiba ttu dina satíaba dhona lhe'e lastoe nna nuha uinna kini satíaba aka benbie arlo Tata Do Yebáha.

15 Nuilaha nna rane:

―Tata xisi to, bete luesi inda ralu‑na i'iyaa, kini abitturu ebisia inda lhe kini abitturu itaa nii ubea inda lhe.

16 Jesús‑ni nna rabie nuilaha:

―Beyya nna gwalisa nubiyú geluha nna utá lenna.

17 Nuilaha nna bekabina gebie, rane:

―Lanú nubiyú ki neti do.

Jesús‑ni nna rabie na:

―Gwalíbinlu ralu: “Lanú nubiyú ki neti do.” 18 Kumu gayu ka nubiyú chi udo lenlu nna nu do lenlu nnanna, labí chi anka nuná nubiyú gelu. Gwalíbinlu nu ralu‑na.

19 Nuilaha nna rane:

―Neti rakati profetaba ankalu xa tata. 20 Ka benne uka xuttotuha, iki i'iya‑niba bitake bedú xibike arlo Tata Do Yebáha. Lebi'i ka benne Israel nna rale lhe'esi Jerusalén‑niliba teeki udú xibi ka benne arlo Tata Do Yebáha.

21 Jesús‑ni nna bekabie geni, ree:

―Ugía lelu kia xa nuila. Isia sá gaxaba se'ele udú xibile arlo Tataha. Labíru raka doelha itale iki i'iya‑ni, nigaba tsiale Jerusalén‑ni ki udú xibile arloe. 22 Lebi'i labí yule núnna rudú xibile arloni, ri'itu nna gwa yutu nú arlo rudú xibitu. Kumu ri'itu ka benne Israel‑ni, lagwi getu iria benne odilábie ka benne ki esinke len Tata Do Yebáha. 23 Ttaka gwasia ura, nnanna nuha chi bisia uraha, ka benne ka nu gwalíga ankake ka nu rudú xibike arlo Tataha, ka benneha nuha gwalíga udú xibike arloe tti tte ra Espíritu geeha, kumu Tataha luesi ka benneha rigile ki udú xibike arloe. 24 Tata Do Yebáha anke Espíritu, delába anke benne labí rilenri'e, laxkala ka benne rudú xibike arlobie, teeki uinke nuha gwalíga tti tte ra Espíritu geeha.

25 Nianna ra nuilaha Jesús‑ni:

―Neti gwa yubaa deki isia Mesías, delába benne anke Cristuha. Ganna chi isia benneha, la'ania nna kixxi'anie ri'i iyá tte.

26 Jesús‑ni nna rabie na:

―Neti nuní ankaa benneha xa, delába benne rinne lenlu‑ni.

27 Nuha‑ba raka nna chi besia ka benne rudhetinieha nna bebanabakanie tti bilákanie rinne lanie nuilaha; ttaka nna ni ttúke labí unnaba tisake innáke: “¿Bíunna rinnaba tisalu nuila‑na?” o, “¿bí ge nuná rinne lenlu nuná?” 28 Nuilaha nna bedú bixxibana re'e geniha nna deyyana lhe'esiha, gwagunana ka benne, rana ke:

29 ―¡Gwaltáruga, gwalulanni ttu nubiyú chi utixxi'ana ge iyába nu chi benia! ¿Si laaba nubiyúha‑ba nuha anka Cristu benne chi ga'anani Tata Do Yebáha idhelhe?

30 Nianna tti biria tteba ka benne lhe'esiha nna bisinke ata du Jesús‑ni. 31 Laka raka nuha nna ka benne rudhetini Jesús‑ni nna ráke bie:

―Uto yetta xa maestru.

32 Ttaka labie nna rabie ke:

―Neti teela ttu elho kia goa, lebi'i labí yule bixa elho nuha.

33 Nianna tti ra luesi ka benne rudhetinieha:

―¿Si nuxa chi betedha'ana nu gobie ak?

34 Jesús‑ni nna rabie ka benneha:

―Elho kia ankana, unia nu raka le benne udhelhe netiha nna ulhuxaa sina geeha. 35 ¿Laaba lebi'i rale: “Sa riyasaba ttapa beo tti isia gwetselaha”? Neti ria le: Gwalodeki lole nna gwalulanni ka xuxtila se'e naa. Chiba rigatsi ka nuná ki eyatsakana. 36 Ttu benne riben gwetsela ridíba lhiaxa benneha, nna lena ruttupeha nna ankana ka benne raxie lo neda ge Tata Do Yebáha kini satíaba aka benke, kini anáchu benne rudelhe xuaha lhe benne rottupe benneha lhe, ixpabake tse'e ittake ge sina benkeha. 37 Nii rado tisa ge nu rari'i: Ttu benne subi rudelhe xuaha nna attu benne subila redíe benneha. 38 Neti ridhelhaa le kini egitsale xua bedelha ka benne subi, nu labí gwatele bedelhale. Nnanna nna lebi'ila chi redí baale ge sina ben ka benneha.

39 Ixe ka benne lhe'esi Sicar, (Sicar babana Samaria), ixe ka benneha ugía leke ge Jesús‑ni de nu utixxi'en nuilaha ke tti rana: “Benne‑ni chi utixxi'e ge iyá nu chi benia.” 40 Laxkala tti chi bisin ka benneha ata du Jesús‑ni nna unnabake lenie, ráke bie:

―¡Ga innálu beya'anchi len ri'itu!

Nianna beya'ane udoe lenke chupa ubisa 41 nna adírula ixe ka benne ugía leke tti biyienkanie nu ra kwinaga labie. 42 Nianna tti ráke nuilaha:

―A laa suna ge nu utixxi'enlu ri'ituha‑ruga ria letu, nnanna chi ria letu kumu kwinaga ri'itu chi biyienintu nu rinne benne‑ni. De nuha nna chi yutu deki gwalíga benne‑ni anke Cristu; labie odilábie ka benne se'e yiesi lo yu‑ni.

43 Iki de chi gwadona chupa ubisaha, biria Jesús‑ni lo yu ge Samaria‑ni nna die daka Galilea, 44 kumu kwinaba labie ree deki ttu benne anke profeta, labí rugwekana lidhaka benneha lhe'esi gebie. 45 Tti besine daka Galilea, tseba belabi ka benne Galilea‑nie kumu de chiba bilákanie iyá nu benie lhe'esi Jerusalén‑ni tti raka laní Pascuaha, kumu ka benneha ugíagabake laníha.

46 Nianna beyeki Jesús‑ni attu libe lhe'esi Caná. Yiesiha rena daka Galilea ata beyonie indaha vinu. Lhe'esi Capernaum‑ni do ttu nu rinnabia nu duna kwe'e nu rinnabia xeniha. Nuha do ttu xi'in biyúni ranina. 47 Tti bina nuha deki chi bedá Jesús‑ni daka Judea‑ni nna besiabie daka Galilea, nianna tti ugíana nna gwannabana lenie, rane:

―¡Utáchi xa tata, ki eyoinlu nu kwiti kiaha. Bichisilá chi tteba gattibi!

48 Jesús‑ni nna bekabie geni, ree:

―Lebi'i labí tsia lele ganna abíba ilenle aka ka milagru lhe ka nu dika ebaninle geni lhe.

49 Ttaka nubiyúha nna rane:

―Tata xisi to, uyáxxiruga ttiru lani gatti nu kwiti kiaha.

50 Jesús‑ni nna ree na:

―Beyya lisiluha. Xi'in biyúluha chiba beyaka nuha.

Nubiyúha nna gwa ugíaba leni ge nu ra Jesús‑ni na, nianna deyya ttebana. 51 Tti chi deyyana esinna lisiniha nna biria ka nu riben sina lhe'e yo'o geniha nna gwatsákana na, nianna rákana na:

―Gwanka benba nu kwiti geluha.

52 Nianna tti unnaba tisana ka nuha, rana kana:

―¿Bí ura beyaka nu kwiti kiaha?

Ka nuha nna rákana na:

―Nnayaha ttiba retin ttú beria xilháha latibi.

53 Niala nna tti gwadú le xxudi nu kwitiha deki uraha‑gaba nuha tti ra Jesús‑ni na: “Chiba beyaka xi'in biyúluha”, nianna tti ugía leni ge Jesús‑ni lhe ugíagaba le iyába ka benne se'e lhe'e lisiniha lhe. 54 Nuní berupa milagru ben Jesús‑ni iki de chi bedábie daka Judea‑ni nna besine daka Galilea‑ni.