1 Jesús‑ni nna diabie daka iki i'iya ata daa ka ya olivuha. 2 Attu dilaha nna beyekie besinbie ro'o yotuha nna iyába ka benne bedetupake kwe'ebie. Lee nna ure ttebe nna rule'enie ke. 3 Ka nu rule'ekinna ka benne nu ra lo bia bennabi boka'an Moisés‑ni, lenkana ka fariseo‑ni bisinkana chekana ttu nuila beyaxxukinna na len ttu nubiyú. Nianna bedúkana nuilaha lagwi ge ka benne se'e niha, 4 nna rákane:

―Maestru, nuila du‑ni bexuintu na len ttu nubiyú. Lo dana ruinna nuha bexuintu na. 5 Lo bia bennabi bodha'an Tata Do Yebáha len Moisés‑ni ra deki ka nuila ruinkana aní teeki usiari'i kana íyya kini gattikana. Lu nna, ¿bíla ralu?

6 Rákane aníha kumu de ruinkana ibixxinie bixa innábie, kini aníha‑chu nna tee ro'okani bixa usiakana ikie. Ttaka Jesús‑ni biyettalee nna len xubenábe runie letra lo yu. 7 Ttaka kumu de doelhaba ruinkana rinnaba tisakane, nianna tti bedú liie nna ree kana:

―Nuxa ttúle abittu bi tulha chi benle, lebi'i nuha lade'a tte udaxxule íyya use'ele nuila‑ni.

8 Nianna tti bedeyetta adakabe attu libe nna redeonie letra lo yu. 9 Lakana nna tti biyienkinna nu reeha, ttu ttubakana udulokana bedákana. Lade'axa bedá ka benneolaha, nianna tti bedá ka nu kwitiha, axtaliba ki beya'an a sun Jesús‑niba, nuilaha nna duna arloe. 10 Nianna tti beyadhe nna rabie nuilaha:

―Xa nuila, ¿nála ka nu rusiakana ikiluha? ¿Si niba ttúkana a beyaxakinna ukinnikana lu?

11 Nuilaha nna bekabina, rana:

―Niba ttúkana xa tata.

Nianna ra Jesús‑ni nuilaha:

―Anágaba neti labí ukinnia lu. Beyya lisiluha nna debá nnanna bitturu uinlu tulha.]

12 Jesús‑ni nna rodolise ka benne attu libe nna redeabie ke:

―Neti ankaa xiani ge ka benne se'e yiesi lo yu‑ni. Benne etenalhe neti, labí tseki benneha lhe'e chulha, sinuki tsekilee lhe'e xianiha, xiani nu uinna kini satíaba aka benbie arlo Tata Do Yebáha.

13 Tti biyienkin fariseo‑ni nu reeha, nianna rákane:

―La kwinabalu rigixxi'alu nuxa ankalu. Lanú attu nuxa benne rigixxi'ana gelu. De nuha nna labí daka nu rigixxi'alu‑na.

14 Jesús‑ni nna bekabie gekani, ree:

―Meskiba kwinaba neti rigixxi'aya kia, ttaka gwa dakaba nu rinnea‑ni kumu neti gwa yubaa gaxa biriaya daya lhe gaxa daka diaya lhe, ttaka lebi'i labí yule gá biriaya daya lhe gá daka diaya lhe. 15 Lebi'i ruinbale elhuxtisi ge ttu benne attiba ruinba ka benne se'e yiesi lo yu‑ni. Neti labí runia elhuxtisi ge nuxa benne. 16 Ganna unia elhuxtisi nna uinbaa na attiba ankaba geni, kumu labí ttú neti nuha unia elhuxtisiha, uingaba Tata kia benne udhelhe netiha. 17 Lo bia bennabi gele‑na dia ra deki ganna chupa ka benne rinneke turo'o rigixxi'ake ge nu bilákanie, la'ania nna gwa dakaba nu rinne ka benneha. 18 Anágaba neti, la kwinaba neti rigixxi'aya kia lhe Tata kia benne udhelhe netiha, benneha nuha ankagabe attu benne rigixxi'abie kia.

19 Lakana nna unnaba tisakane, rákana:

―¿Ná tata gelu?

Jesús‑ni nna bekabie gekani, ree:

―Lebi'i labí gwalí ankabienle neti, nigaba ankabienle Tata kiaha. Gannala ttixka ankabienle neti, la'ania nna gwankabialinle Tata kiaha.

20 Iyá nuní ra Jesús‑ni tti doe rule'enie ka benne ro'o yotuha gaxxaba ata sia ka nu rigu'uke belhiu lhe'ekaniha nna ni ttúkana labí bedaxxukane kumu labí chi bisia ura gebie.

21 Nianna redea Jesús‑ni ka benneha attu libe:

―Neti eya'abaa, lebi'i nna egilale neti. Ttaka ata eya'ayaha, lebi'i labí aka esiale niha, nna lo ka tulha gele‑naba gattile.

22 Nianna ra ka nu loni ge ka benne Israel‑ni:

―¿Si la labana uin geni ki gattina, de nuha nna rana: “Ata eya'ayaha, lebi'i labí aka esiale niha”?

23 Jesús‑ni nna ree kana:

―Lebi'i ankabale ge yiesi lo yu‑ni, neti nna ankabaa ge yebáha. Labí ankaa ge yiesi lo yu‑ni. 24 De nuha nna ria le: “Gattibale lo ka tulha gele‑na.” Kumu ganna abíba ria lele deki neti ankaa nu chi ria le deki ankaa, la'ania nna gattibale lo ka tulha gele‑na.

25 Nianna unnaba tisakane, rákane:

―Lu nna, ¿nú ankalu?

Lee nna ree kana:

―Neti ankabaa benne chi xpeya le sisi'a tteha xa. 26 Ixeba nu teeti upeya le lhe ge ixeba nu ukinnia le lhe, ttaka labí unia aníha. Kumu sunruba rigixxi'ania ka benne se'e yiesi lo yu‑ni nu biyienti ra benne udhelhe netiha. Benneha rinnebe nu ankaba gwalí.

27 Ttaka lakana nna labí ute dákinna deki ge Tata geeha‑ba nuha rinnebie, delába benne do yebáha. 28 De nuha nna ra Jesús‑ni kana:

―Neti benne daya yebáha, gannaliba chi ulhidhale neti betále lo ya kurusiha, la'anialiba nna tte denle deki neti nuha ankaa nu chi ria le deki ankaa lhe anágaba tte dágabinle deki labí runia nu anka kia, sinuki attiba bele'eni Tata kiaha neti, aníha‑ba rinnea. 29 Tata kia benne udhelhe netiha gwa duba benneha len neti. Labí chi bedú benneha neti suna ttúbaa, kumu satíaba runia nu ru'u lebie.

30 Tti ra Jesús‑ni aníha, ixeba ka benne ugía leke gebie.

31 Nianna tti ra Jesús‑ni ka benne Israel, ka benne chi ugía leke geeha:

―Ganna lebi'i udole tisa ge nu rinnea‑ni, la'anialigaba nna chi akale benne gwalíga rudhetinia. 32 La'anialigaba nna chi tte denle nu anka gwalí nna nu anka gwalíha nna uinna ki ese'e lhaale.

33 Ka benneha nna bekabike, ráke:

―Ri'itu ankatu benne datiatu Abraham‑ni nna ni tsa labí chi bito'o ri'itu lo sina ge attu benne subi. ¿Gasina nuha nna innálu deki nu anka gwalíha uinna kini ese'e lhaatu?

34 Jesús‑ni nna bekabie ge ka benneha, ree:

―Netiru ria, iyába ka nu ruin tulha, to'obakana lo tulha ruinkanaha. 35 Kumu ttu nu to'ona lo sinaha labí aka dho nuha satía lisi xxananiha; xi'in biyú xxana nu to'o lo sinaha‑ligaba nna gwa ralhana dhona satía lisi xxudiniha kumu de ankana xi'in biyúni. 36 Laxkala ganna neti benne ankaa Xi'in Tata Do Yebáha odiláya le lo ka tulha ruinle‑na, la'anialigaba nna gwalíga chi ese'e lhaale. 37 Neti yua deki lebi'i ankale benne datiale Abraham‑ni, ttaka ruinlale uttile neti kumu de labí rulabile ka tisa rule'a‑ni. 38 Neti rinnebaa ge nu bilábati tti doa len Tata kia do yebáha; lebi'i nna ruinbale nu rule'ebin xxudileha le.

39 Lake nna bekabike ráke:

―Abraham‑niba anka xxudi ri'itu.

Ttaka Jesús‑ni nna rabie ke:

―Gannala ttixka gwalíga datiale Abraham‑ni, la'ania nna gwa ruinlale nu ben benneha. 40 Ttaka de rigixxi'aya nu ankaba gwalí nu biyienbati ge Tata Do Yebáha, lebi'i nna ruinlale uttile neti. Abraham‑ni labí ben benneha tti ruinle‑na. 41 Lebi'i ruinbale nu ruin xxudileha.

Lake nna ráke bie:

―Ri'itu labí uka ri'itu lo neda; doba ttu xxudi ri'itu, delába Tata Do Yebáha.

42 Jesús‑ni nna rabie ke:

―Gannala gwalíga Tata Do Yebáha anke xxudile, la'ania nna lebi'i gwa rakalinle kia, kumu neti ata do Tata Do Yebáha‑ba biriaya daya nna dua nii. Labí nu yu'u iki neti benia ki daya; labe udhelhe neti. 43 ¿Beaka a rite denle ge nu rinnea‑ni? Labí rite denle kumu labí raka lele iyieninle nu ria‑ni. 44 Nu xxegwiha‑ba anka xxudile nna nu raka le nuha‑ba ruinle. Nuha attili sisi'a tteha ankana ttu nu runi elhutti lhe labí ridú tsitsina lo nu anka gwalíha lhe, kumu labí rinnena nu anka gwalí. Tti rinnena nna rinnebana nu ankabana, kumu ruinba leni lhe ankabana xxudi ka nu ruin lekani lhe. 45 Neti nna de rinnea nu anka gwalí, de nuha nna lebi'i labí ria lele kia. 46 Ni ttúle labí aka gele usiale ikia deki ankaa benne ruin tulha. Kumu ganna neti rinnebaa nu ankaba gwalí, ¿beakala nna a ria lele kia ganna? 47 Benne anke ge Tata Do Yebáha, ka tisa ge Tata Do Yebáha‑ba rudo naga benneha. Ttaka lebi'i, kumu de labí ankale ge Tata Do Yebáha, de nuha nna labí rudo nagale gebie.

48 Ka nu Israel‑ni nna bekabikana, rákana Jesús‑ni:

―Gwalíbintu ratu nu Samariaba ankalu nna nu xxegwiba yu'u latilu.

49 Jesús‑ni nna bekabie gekani, ree:

―Lanú nu xxegwi yu'u lati neti. Neti gwa rugwebaa lidhaka Tata kiaha, ttaka lebi'i labí rugwele lidhakaa. 50 Neti labí runia kini akaa benne ra xxeni lasia. Ttaka Tata Do Yebáha‑ba raka lebie akaa benne ra xxeni lasia nna labe inná nú ri'i gwalínri'i. 51 Netiru ria, benne rudobie tisa ge nu ria‑ni, labí gatti benneha.

52 Ka nu Israel‑ni nna rákane:

―Nnannaligaba chi yutu deki nu xxegwiha‑ba yu'u latilu. Abraham‑ni lhe ka profetaha lhe, uttiba ka benneha. Lu nna ralu: “Nu udona tisa ge nu rinnea‑ni, labí gattina.” 53 Lu, ¿si xxenirula ra lelu atti tata getu Abraham‑ni? Benneha uttibe, anágaba ka profeta ge Tata Do Yebáha uttigaba ka benneha. Lu nna, ¿nú rakinlu deki ankalu?

54 Jesús‑ni nna bekabie, ree kana:

―Ganna kwinaba neti runia ki ra xxeni lasia, la'ania nna nu ra xxeni lasiaha labí daka nuha; sinuki Tata kiaha nuha runie kini ra xxeni lasia. Benneha‑gaba nuha rale deki anke Diosi gele. 55 Ttaka lebi'i labí ankabienle benneha; neti nna gwankabiabatie. Kumu ganna innía labí ankabiatie, la'ania nna ruingaba lasia attiba ruinle. Ttaka neti gwankabiabati benneha lhe gwa rudobaa tisa ge nu rabie neti lhe. 56 Abraham benne uka xuttoleha bedeakanie kumu chiba yue ilánie la sá isiayaha nna gwa bilábanie la sáha nna yalhá bedeakanie.

57 Nianna ra ka nu Israel‑nie:

―Ki nila tsieyona (50) ida abí chi ankinlu, delo nna ralu deki chi bilenlu Abraham‑ni.

58 Lee nna ree kana:

―Netiru ria, attili lani gali Abraham‑ni, neti chila doa la'ania.

59 Nianna tti bedaxxukana íyya ruinkana use'ekane, ttaka Jesús‑ni bekatsi tteba loe lagwi ge ka benne saa niha nna beriabie ro'o yotuha deyye.