1 ’Bittu udú xxattana le, gwaluxxen lele ge Tata Do Yebáha lhe gwaluxxengaba lele kia lhe. 2 Lhe'e lisi Tata kiaha ixe ka yo'o sia ata tse'e ka benne. Ganna ttixka abíba sia, la'ania nna abittula xpeya le ten tsea ata tse'ele. 3 Ganna chi eya'aya ten tsea ata tse'ele, la'ania nna dedáya attu libe nna echea le len neti kini ata dhoaha, niha‑gaba tse'ele. 4 Lebi'i chiba ankabienle neda deyya ata eya'ayaha.

5 Tomás‑ni nna rane:

―Labí yutu gá eyyalu xa tata. Laxkala, ¿gasina uinbiatu nedaha?

6 Jesús‑ni nna bekabie, ree na:

―Netiba nuha ankaa nedaha lhe netiba nuha ankaa benne rigixxi'aya ge nu anka gwalí lhe ankaa benne runia ki satíaba raka ben ka benne lhe. Lanú nu aka geni tsiana ata do Tataha ganna abíba neti echea na. 7 Ganna ttixka lebi'i chi yule nuxa gwalíga ankaa, la'ania nna chigaba yule nuxa anka Tata kiaha nna nnannali chi ankabienle benneha lhe chi bilenlee lhe.

8 Nianna tti unne Felipe‑ni, rana:

―Tata Xisi to, bele'en ri'itu Tataha nna ukare'aba ilentue nna eyaka xen letu.

9 Jesús‑ni nna bekabie, ree:

―Ki isába chi reki lenia le xa Felipe, ¿si itua ttu nna a ruinbiale neti? Benne chi bilánie neti, chigaba bilen benneha Tataha. ¿Gasina nuha nna rálalu: “Bele'en ri'itu Tataha”? 10 ¿Si lagwa gwa ria lelu deki neti ttúba benne ankaa len Tataha nna Tataha nna ttúba benne anke len neti? Ka tisa rinnea‑ni nna labí nu anka kia ka nuní rinnea; sinuki nu anka ge Tataha benne doe lhe'e lastoa‑niba nuní rinnea. Labe runie iyá nu runia‑ni. 11 Gwaltsia lele deki neti ttúba benne ankaa len Tataha nna Tataha ttúba benne anke len neti. Ganna abíba ria lele kia, kwadi ge ka nu rilenle runia‑ni gwaltsia lele. 12 Netiru ria, nu gweyya leni netiha gwingaba nuha ka nu runia‑ni nna xxenirula anka ka nu uin nuha, kumu neti eya'abaa ata do Tataha. 13 Lhe anágaba iyába nu innabale len Tataha tti udettile neti, neti nna gwinbaa nu innabaleha kini anáchu de neti benne ankaa Xi'inieha, de neti nna inná xxeni le Tataha. 14 Bixaba innabale ganna udettile neti, neti nna gwinbaa nu innabaleha.

15 ’Ganna lebi'i rakinle kia, la'ania nna gudobale tisa ge nu runia mandadu. 16 Neti nna innabaa len Tataha ki idhelhe attu benne aka lenie le kini benneha nna dhoe lenle ttu dia lii, 17 delába idhelhe Espíritu benne kixxi'abie ge nu anka gwalí. Ka nu labí ria lekani, labí ulabikana Espírituha, kumu de labí chi bilákinne, nigaba a yúkana nuxa anke. Ttaka lebi'i chiba yule nuxa anka benneha kumu labie nuní doe len lebi'i lhe dhobie lhe'e lastole lhe.

18 ’Labí odha'anaa le ttiba ttu bidabi, gwesiaba neti dhoa len lebi'i attu libe. 19 Ka benne abí ria leke kia, attu sattitoruba ilákanie neti, lengwa nna labíru edelákanie neti, ttaka lebi'i nna gwalábinle neti. Kumu neti anka benbaa, anágaba lebi'i gwaka bengabale. 20 Tti isia sá esiayaha, la'ania nna tte denle deki neti ankaa ttúba benne lenia Tata kiaha; lebi'i nna akale ttúba benne len neti, neti nna akaa ttúba benne len lebi'i. 21 Benne chi biyieninie nu runia mandadu nna rudoe tisa geni, benneha nuha gwalíganie rakanie kia nna benne rakanie kia nna gwakagabani Tata kiaha gebie. Anágaba neti akagabati gebie lhe ule'egabanie nu gwalíga ankaa lhe.

22 Nianna tti ra Judas‑ni (labí Judas nu rákana Iscariote) rane:

―Tata Xisi to, ¿beakala len ri'itu ule'elu nu ankalu nna a ule'elu nu ankalu‑na len adíru ka benne?

23 Jesús‑ni nna bekabie geni, ree:

―Benne akanie kia, gudoba benneha tisa ge nu chi rigixxi'anie. Tata kiaha nna gwakagabanie ge benneha, la'ania nna ri'itu isiatu ki tse'etu lhe'e lastoe. 24 Nu abí rakinna kiaha, nuha labí rudona tisa ge nu rigixxi'ania na. Ka tisa chi riyieninle‑ni nna labí nu anka kia ka nuní rinnea, sinuki ankaba ka nuní ge Tataha, benne udhelhe netiha.

25 ’Iyá nuní rinnea rigixxi'ania le nnanna laka sadoa len lebi'i, 26 ttaka Espíritu benne ite ki aka lenie leha, benneha idhelha Tataha bie kini innebie kwenta kia. Labie ule'enie le iyá tte lhe odhúbie lele iyá nu chi utixxi'ania le lhe.

27 ’Neti unia kini tse'ele xen su lasi. Elha xen lasi nu rutea len lebi'i labí anka nuná luesi nu rute ka benne se'e yiesi lo yu‑ni. Bittu udúna le lhe nigaba a gasinle lhe. 28 Lebi'i chiba biyieninle ria: “Eya'abaa, delola nna gwedesiabaa len lebi'i.” Ganna si gwalíginle rakinle kia, la'ania nna gwedeakabinle de eya'aya ata do Tataha, kumu Tataha xxenirula ra le benneha tti neti. 29 Nnannali chi rigixxi'ania le nuní, kini ganna chi deya'ayaha, la'ania nna tsia lele kia.

30 ’Labíru isá innea len lebi'i, kumu chiba daa nu xxegwi rinnabiana yiesi lo yu‑ni, neti niru latti labí dhaa nuha innabiana neti. 31 Ttaka aní teeki aka kini tte dani ka benne deki neti gwa rakabati ge Tataha, lhe gwa ruinbaa nu chi bedha'ane unia lhe.

’Nnanna nna gwaledú lii kini chi diari'i.