1 La sá tti bedú ni'a xumanuha, delába duminku, dila tteba gwankaru chulha ugía María Magdalena‑ni gwalannina lo baaha. Tti bilenna chi bitua íyya yaya ro'o yieru baaha, 2 nianna ruxunnibana beyekina besinna ata do Simón Pedro‑ni lhe attu ka benne bedhetini Jesús‑ni, delába benne ukarunie geha, nianna tti utixxi'enna ka benneha, rana ke:

―Chiba bebeakana Tata Xisiha lhe'e yieru baaha nna labí yutu gá gwattixxakane.

3 Pedro‑ni lhe attu benneha nna bexunni ttebake diake ata do yieru baaha. 4 Tu tulapaba diake ruxunnike, ttaka attu benneha nna unerube lo Pedro‑ni, laxkala benneha bisine lade'a tte ro'o yieru baaha. 5 Tti bisine ro'o yieru baaha nna biyette beká loe lhi'u, niha‑ba bilánie ka lari bitesi benneha, ttaka labí uta'abie lhi'u. 6 Tti chi bisin Simón Pedro‑ni nna uta'a ttebe lhe'e yieru baaha nna bilánie ka lari bitesi benneha se'ekana niha. 7 Lari nu bitesi iki Jesús‑ni nna labí re nuha ata se'e adí ka lariha, ta subila tesi nuha rena. 8 Nianna tti uta'agaba benne bisin lade'a tte ro'o yieru baaha. Tti ute'eha nna bilánie iyá nu chi ukaha, nianna tti ugía lebie. 9 Kumu lake labí chi ute dákanie nu dia lo ka yetsi ge Tata Do Yebáha ata ra deki teeki eyadha ben benneha lagwi ge ka benne chi uttiha. 10 Nianna tti beyekike besinke lhe'e yo'o ata reya'ankeha.

11 María‑ni nna sa dube ro'o yieru baaha ribesie. Laka due ribesie nna biyette beká loe lhe'e yieru baaha. 12 Nianna bilánie chupa ka anjeli ge Tata Do Yebáha se'eke ata utta Jesús‑ni, nukuke xo sitsi. Ttúbie re daka ata utta ikieha nna attubie re daka ata use'e ka ni'eha. 13 Nianna tti belisake María‑ni, ráke bie:

―¿Beaka ribesilu xa nuila?

Lee nna ree ka benneha:

―Ribesia kumu bebeabakana Tata Xisi to kia nna labí yua gá gwattixxakane.

14 Nuha‑ba ree nna tti bodeki loe daka kwe'ebie, nianna bilánie Jesús‑ni due niha, ttaka labí yue deki Jesús‑niba nuha. 15 Jesús‑ni nna ree bie:

―¿Beaka ribesilu xa nuila? ¿Nú regilalu?

María‑ni nna ukanie ganna nu ruyúna lo yu ata yada ka ya xixxiha‑ba nuha. De nuha nna ree nuha:

―Ganna luba dechelu benneha xa tata, utixxi'a gá gwattixxalue kini echea bie.

16 Jesús‑ni nna ree:

―María.

María‑ni nna bodeki loe unnebie tisa arameo, ree:

―¡Raboni! (“Raboni” dienna innána maestru.)

17 Jesús‑ni nna rabie María‑ni:

―Bittu udaxxulu neti kumu labí chi beyapia ata do Tata kiaha. Beyyala nna usi ka betsi to kiaha, delába ka benne bedhetiniaha, usi ke: “Chiba eya'aya ata do Tata kiaha, benne ankagabe Tata geleha. Benneha anke Diosi kia nna ankagabe Diosi gele.”

18 Nianna tti deyya María Magdalena‑ni kini kixxi'anie ka benne bedhetini Tata Xisiha deki chi bilánie benneha lhe utixxi'agabanie ka benneha iyá nu ra Tata Xisiha bie lhe.

19 Tti chi ulha sá bedú ni'a xumanuha, ka benne rudhetini Jesús‑ni yayabakanie yo'o ata tupakeha de rasikanie ge ka nu loni ge ka nu Israel‑ni. Nianna tti uka xxe Jesús‑ni nna udúbie lagwi geke nna rabie ke:

―¡Bittu gasinle! ¡Xen su lasi gwaltse'e!

20 Nuha‑ba ree nna tti bele'enie ke ka neeha lhe bele'enie ke lhitteha lhe. Ka benne rudhetinieha nna ittaba bedú leke tti bilákanie Tata Xisiha. 21 Nianna tti redea Jesús‑ni ke attu libe:

―¡Xen su lasi gwaltse'e! Kumu anába attiba udhelha Tataha neti, anágaba neti idhelhaa le kini kixxi'ale ka tisa kia‑ni.

22 Nuha‑ba rabie nna tti belubie ikike nna rabie ke:

―Gwalidhí Espíritu ge Tata Do Yebáha. 23 Ka benne dhile elha xen lasi ge ka tulha ruinke, gwadígaba Tata Do Yebáha elha xen lasi ge ka benneha nna ka benne abittu dhile elha xen lasi geke, anágaba Tata Do Yebáha labígaba dhibie elha xen lasi ge ka benneha.

24 Ttu ka benne tsi'inu (12) rudhetini Jesús‑ni, benne tee lábie Tomás, benne rágabake Kwachi, benneha lanúbie tee tti bele'e lo Jesús‑ni len adí ka benneha. 25 Delola nna adí ka benneha utixxi'akanie Tomás‑ni, ráke bie:

―Chi bilentu Tata Xisiha.

Ttaka Tomás‑ni nna bekabie geke, ree:

―Ganna abíba iláti ka lasi nábie ata biyada ka clavuha lhe ganna abíba uga'a xubenáya ata biyada ka nuha lhe anágaba ganna abíba uga'a xubenáya lhe'e yieru do lhitteha, la'ania nna labí tsia lasia gele.

26 Xxunu (8) ubisa chi ute tti uka nuha, nianna dedetupa ka benne rudhetini Jesús‑ni lhe'e yo'oha. La'ania nna gwa duba Tomás‑ni lenke. Dedeyayabakanie yo'oha, ttaka Jesús‑ni uka xxebie nna udúbie lagwi geke nna begwebie ke padiuxi nna ree ke:

―¡Xen su lasi gwaltse'e!

27 Nianna tti rabie Tomás‑ni:

―Belanni ka lasi náya‑ni lhe kwittaa‑ni lhe. Belhí nálu nna bega'a xubenálu lo ka gwe kia‑ni nna ugía lelu, bittu akalu nu a ria leni.

28 Tomás‑ni nna bekabie ge Jesús‑ni, ree bie:

―Lu baninlu neti lhe ankalu Diosi kia lhe.

29 Jesús‑ni nna ree Tomás‑ni:

―Ria lelu kumu de chi bilenlu neti, ttaka karubáru ka benne bittu chi bilákanie neti nna gwa riaba leke.

30 Ixeeru ka milagru ben Jesús‑ni arlo ka benne rudhetinieha, ka nu labí diakana lo yetsi‑ni, 31 ttaka ka nu chi dia lo yetsi‑ni, ukakana lo yetsi‑ni kini lebi'i tsia lele deki Jesús Xi'in Tata Do Yebáha anke Cristu lhe kini de tsia lele ge benneha nna gwaka benbale ttu dia lii arlo Tata Do Yebáha.