1 Tti beyadi Jesús‑ni lati i'iyaha dedee, ixeru ka benne danalhake bie. 2 Nianna tti ubiga ttu benne raka yiesu latie. Yiesuha tee láni lepra. Benne raka yiesu latieha nna bedú xibie arlo Jesús‑ni nna ree benneha:

―¡Tata xisi to, ganna lu aka lelu, gwadaabalu eyoinlu neti!

3 Jesús‑ni nna belhí nábie utane lati benneha nna ree:

―Gwaka galá lasia. ¡Nnanna, chinka beyaka!

Looraha tteba nna betúa yiesuha lati benneha. 4 Nianna ra Jesús‑nie:

―Anuttu nu galu. Sinuki ugíala nna gwatso du lo bixxudiha nna bete úna nu daa lolu utelu ge Tata Do Yebáha. Beni attiba chi ga'anna lo bia bennabi bodha'an Moisés‑ni. Aníha kini uyú lokani deki chiba betúa isagwe‑na latilu.

5 Tti uta'a Jesús‑ni lhe'esi Capernaum‑ni, ttu soldadu baninna ttu gayua (100) ka soldadu ge Roma‑ni, nuha bisinna nna rinnaba ditibana lo Jesús‑ni, rane:

6 ―Tata xisi to, nubiyú riben lo sina kiaha ttu tsaba tena lhe'e lisiaha daa yatti latini nna juisia ratena len isagwe geniha.

7 Jesús‑ni nna bekabie geni, ree:

―Neti gwaya'abaa eyonia nuha.

8 Soldaduha nna bekabina, rane:

―Tata xisi to, neti labí elha ralhaa ga'a kwinalu lhe'e lisiaha. Niiliba dulu unne nna gweyakaba nubiyú riben sina kiaha. 9 Kumu neti ankagabaa nu rudoa tisa ge ka nu ra xxeniru lekani tti neti lhe anágaba nna rinnabiagabaa adíru ka soldadu. Laxkala tti upeya ttu ka nuha: “Ugía niha”, nuha nna gwa riabana nna tti rodopeya attu ka nuha: “Utá nii”, nuha nna gwa ritabana nna tti odopeya benne riben lo sina kiaha: “Ben nu tee‑ni.” Benneha nna gwa ruinbe nu xpeyeha.

10 Tti biyienin Jesús‑ni nu ra nu banina ka soldaduha, labie nna bebanabanie. Nianna tti ree ka benne danalhake bieha:

―Netiru ria, niru ttú ka benne Israel‑ni lanú chi gwaxxakaa ria tsitsi leke tti ria le nubiyú‑ni. 11 Neti ria le, ixe ka benne dittu daa daka ta riria ubisa‑na lhe daa daka ata rito ubisa‑na lhe, ka benneha isiake ata rinnabia Tata Do Yebáha, tse'eke ro'o mexa goke yetta len Abraham‑ni lhe len Isaac‑ni lhe len Jacob‑ni lhe. 12 Ttaka ka nu Israel, ka nu chi ga'anna deki innabia Tata Do Yebáha kana, ka nuha de abittu ugía lekani, de nuha nna irialakana iru'unakana tsiakana ata anka chulhaha. Lhe'e chulhaha‑liba tse'ekana kwesikana lhe goniba lo layakani lhe.

13 Nianna tti ree soldadu nu baninna adí ka soldaduha:

―Chinka beyya. Gweyakaba nu kwitiha. Gwakaba attiba chi ugía lelu.

Looraha tteba nna beyaka nu kwiti riben lo sina ge soldaduha.

14 Jesús‑ni diabie bisine lisi Pedro‑ni. Tti chi bisine niha nna gwaxxake nan ge nuila geniha teba benneha yu'e xilhaa. 15 Nianna tti utane kwe'e ná benneha nna beria tteba xilháha lati benneha nna ugwadha ttebe, benie nu uto Jesús‑ni.

16 Tti chi dia ralhaha nna bisin lenkana ixeru ka nu yu'u espíritu xxegwi latikani ata du Jesús‑ni. Labie nna ukare'aba ttu unnebie nna bebeabie ka espíritu xxegwi yu'u lati ka nuha nna beyonie iyába ka nu raniha. 17 Aníha uka ki gwado tisa ge nu unne Isaías benne uke profeta ge Tata Do Yebáha, tti ree: “Benneha bedelha kwe'ebie ka isagwe geri'iha lhe bedelha kwe'ebie iyába nu rateri'i lhe iyába nu ridakari'i lhe.”

18 Tti bilani Jesús‑ni ixe juisiru ka benne chi bebi'ike abi'iba kwe'ebie, nianna tti bedhane ree ka benne rudhetinieha:

―Tsiari'i ilhári'i lo indatoo‑ni ki iriari'i ro'oni daka nu reha.

19 Nianna tti ubiga ttu ka nu rule'ekinna ka benne nu ra lo bia bennabi bodha'an Moisés‑ni nna rane:

―Maestru, neti gwetenalhabaa kwinalu gaxaba tsialu.

20 Jesús‑ni nna bekabie geni, ree:

―Ka beda‑na siaba lisi ka nuná ata reta'akana lhe anágaba ka nu sia xxilakani reki lo be‑na, siagaba lixxu'in ka nuná ata rebiakana, ttaka neti benne daya yebáha labí do gaxa kixxa ikia.

21 Attu benne rudhetinieha nna redenee:

―Tata xisi to, begwelhaxa eya'aya takatsia tata kiaha. Iki deliba nuha nna tti itaa etenalhaa lu.

22 Ttaka Jesús‑ni nna bekabie ge benneha, ree:

―Begwelha ka nu yattiha ukatsikana ka nu yatti gekaniha. Lu nna utá betenalha neti.

23 Nianna ugwapi tteba Jesús‑ni lo barcuha nna aníha‑ba danalha ka benne rudhetinieha nna biriake diake. 24 Lo indatooha‑ba diake, ttiruba chi biria ttu iyya be idí, nna bedhú liina lo indatooha, axtaba iki barcuha ratsu'u indaha. Ttaka Jesús‑ni nna teba benneha te'adhie. 25 Ka benne rudhetinieha nna gwadibenke bie, ráke bie:

―¡Tata xisi to, bodiláttu ri'itu! ¡Karubá tsapiri'i inda‑ni nna gattiri'i!

26 Labie nna bekabie geke, ree:

―Aalexa benne abittu ria tsitsi leni, ¿beaka rasi xxattinle?

Nianna tti ugwadhe nna bedhaka dise beha lhe indatooha lhe, nianna siiba beyaka lo indatooha. 27 Ka benneha nna bebanabakanie, ra luesike:

―¿Nú anka benne‑ni nna axtaba be‑ni lhe indatoo‑ni lhe rudokana tisa gebie?

28 Tti chi biria Jesús‑ni ro'o indatooha nna bisine daka lo yu ge ka benne Gadara. Niha biria chupa ka nubiyú ata se'e ka baa ge ka benne yattiha yu'u espíritu xxegwi latikani nna betetsákana Jesús‑ni. Ka nuha yalhá satsa ruinkana, laxkala lanú kwenta retena lo neda tee niha. 29 Nianna tti uresi'akana, rákana:

―Lu, Xi'in Tata Do Yebáha, ¿bí raka lelu udhakalu ri'itu? ¿Si dáchilu kini ugwelu ri'itu elha disa? Ki labí chi bisia ura dhitu elha disa ralhatu.

30 Gaxxa gaaba niha yu'u ixeru ka kuchi, ka nuha yu'ukana go. 31 Ka espíritu xxegwi yu'u lati ka nubiyúha nna unnabakana len Jesús‑ni rákane:

―Ganna ebealu ri'itu nna bedhelha ri'itu kini eta'atu lati ka kuchi yu'u‑na.

32 Labie nna ree ka espíritu xxegwiha:

―Gwaleria gwaleyya ganna.

Nianna beria ttebakana lati ka nubiyúha nna gwata'akana lati ka kuchiha. Ka kuchiha nna biria resu ttebakana diakana nna bisinkana ro'o ttu íyya daa niha, nianna biginnikana lhe'e indaha nna uttibakana.

33 Ka nu se'e lo ka kuchiha nna boxunni ttebakana deyyakana lhe'esiha nna iyába utixxi'akana. Utixxi'agabakana nu gwate ka nubiyú uyu'u espíritu xxegwiha latikani. 34 Nianna iyába ka benne lhe'esiha biriake gwatsáke Jesús‑ni. Tti bilákanie bie nna unnaba ditibake lenie kini eriabie lo yu gekeha nna eyye attu ta subi.