15
Nu satsa ruinri'i, nuná rutsigana ri'i arlo Tata Do Yebáha
(Mr. 7:1-23)
Nianna tti ubiga ttu chupa ka nu rule'ekinna ka benne nu ra lo bia bennabi bodha'an Moisés‑ni lhe attu chupa ka fariseo‑ni lhe, ubigakana ata du Jesús‑ni. Ka nuha lhe'esi Jerusalén‑nili udákana dákana nna rákane:
―Ka nu rudhetinlu‑na, ¿beakala a ruin ka nuná nu chi bodha'an ka benneola geri'iha uinri'i? Kumu ka nuná labí rigí nákani atti lanila gokana yetta.
Jesús‑ni nna bekabie gekani, ree:
―¿Beakala lebi'i, de rudole tisa ge nu bodha'an ka benneola geri'iha, de nuha nna rigu'ula ni'ale nu bodha'an Tata Do Yebáha uinri'i? Kumu Tata Do Yebáha ree: “Tsia lele ka tata nan gele” nna “Nu kena iki ka tata nan geniha, nuha ralhaba nuha gattina.” Ttaka lebi'i nna rálale: “Gwakaba geri'i gari'i ka tata nan geri'iha, labí aka utea nu tee kia len lebi'i kumu iyába nu tee kia, ge Tata Do Yebáha‑ba chi ga'anati utea nuní.” Lebi'i ukare'aba innále: “Labí aka utea nu tee kia len lebi'i”, la'ania nna labíru daa lole utele nu tee geleha len ka tata nan geleha. ¿Laaba ganna, de rudole tisa ge nu bodda'an ka benneola geri'iha, aníha tte nuha nna chi rigu'u ni'ale nu bodda'an Tata Do Yebáha? Lebi'i labí liinle. Delo tisaba ruinle deki ankale benne tse. Gwalíbani profeta Isaías‑ni atti utixxi'ana gele lo ka yetsi ge Tata Do Yebáha. Lo ka yetsiha unne Tata Do Yebáha, ree:
Ka nuní, len ro'oruba ka nuní rákana deki ria lekani neti,
ttaka labí gwalíkinna rakakinna kia.
Kwentaruba nuná rudú xibikani arloa,
kumu nu anka ge benne se'e yiesi lo yu‑niba nuná rule'ekinna ka benne;
labí nu anka kia nuná rule'ekana.
10 Nianna tti uxi Jesús‑ni ka benne tupa niha nna ree ke:
―Gwaludo nagale kia nna gwalutte da nu innea‑ni. 11 Labí nu rori'i rutsigana ri'i arlo Tata Do Yebáha, sinuki nu ririala ro'ori'i rinneri'i, nunála nu rutsigana ri'i arloe.
12 Nianna tti ubiga ka benne rudhetinieha nna ráke bie:
―¿Si gwa yulu xa tata, ka fariseo‑ni bituxxulakinna tti biyienkinna nu ralu‑na?
13 Lee nna bekabie ge ka benneha, ree ke:
―Iyába ka yaga ka nu abittu beyada Tata kia do yebáha, ka nuha ilupibakana nna iru'unakana. 14 De nuha nna ka fariseo‑na naala se'e ka nuná. Ka nuná ankabakana ttiba ka nu xua lokani, rinnerukana arlo adí ka luesi lo xuakani. Kumu ganna ttu nu xua loni rineruna lo attu luesi lo xua‑ni, la'ania nna ixpabakana satsettikana lhe'e ttu yieru.
15 Pedro‑ni nna rane:
―Utixxi'en ri'itu, ¿bí diani nu ralu‑na?
16 Jesús‑ni nna bekabie, ree kana:
―¿Si nigaba lebi'i bittugaba rite denle nu ria‑ni? 17 ¿Si lagwa gwa rite denle deki iyába nu rori'i, lhe'e tu'ebari'i dia nuná? Delola nna rebeabari'i nuná. 18 Ttaka nu riria ro'ori'i tti rinneri'i, nuná ankana nu ririana lhe'e lastori'i, nunonna rutsigana ri'i arlo Tata Do Yebáha. 19 Kumu lhe'e lastori'i nuná riria iyába nu satsa rulaba leri'i, lhe nágaba nuná riria nu rixegwiri'i ki ruinri'i elhutti, lhe lhe'e lastogabari'i nuná riria tti risári'i nu labí anka latselari'i, lhe ruinri'i nu satsa leni nuxaba benne lhe. Anágaba lhe'e lastogabari'i riria nu reta leri'i rilanari'i, lhe rinneri'i gwen lasi lhe anágaba rinne satsa ge luesiri'i lhe. 20 Iyá ka nunonna runi kini reya'anri'i tsiga arlo Tata Do Yebáha. Laa de abíga kí nári'i tti gori'i yetta, laa de nuha‑ga nna eya'anri'i tsiga arlo benneha.
Jesús‑ni beyonie xi'iniunná ttu benne nuila abittu anke nu Israel
(Mr. 7:24-30)
21 Bedába Jesús‑ni ata dueha nna die daka Tiro lhe Sidón lhe. 22 Niha biria ttu benne nuila anke ge Canaán nna ubige kwe'e Jesús‑ni, ribesi'abe, ree:
―¡Benne datia David, gwatuachi lelu neti xa tata! Xi'iniunnayáha yalhá elha disa ruyúbi yu'u ttu espíritu xxegwi latibi.
23 Ttaka Jesús‑ni nna labí bekabie ge benne nuilaha. Nianna tti ubiga ka benne rudhetinieha nna unnabake len Jesús‑ni, ráke bie:
―Bedhelha nuila‑na eyyana, kini ribesi'abana danalhana ri'i.
24 Lee nna bekabie, ree:
―Tata Do Yebáha labí udhelhe neti len ka nu dittu‑na; suna len ka benne Israel ka benne chi bedhanke neda gebie, suna len ka benne‑niba udhelhe neti.
25 Ttaka benne nuilaha nna ubige bedú xibie arlo Jesús‑ni nna ree bie:
―¡Tata xisi to, akachi lenlu neti!
26 Jesús‑ni nna bekabie ge benneha, ree:
―Ttaka labí anka tse udaxxua yettaxtila nu dika go ka xi'inia‑ni nna udelhaa na lo ka beku to‑na.
27 Benne nuilaha nna bekabie, ree:
―Gwalí galenlu xa tata; ttaka yulu axta ka beku to‑na redigakana ka yettaxtila ro'o yuya riginni xan mexa ge ka xxanakaniha.
28 Jesús‑ni nna bekabie, ree benne nuilaha:
―¡Ga ttiparuba tsitsi ria lelu xa nuila! Gwakaba nu rinnabalu‑na.
Looraha tteba nna beyaka tteba xi'iniunná benne nuilaha.
Jesús‑ni begobie ttapa mili ka benne
(Mr. 8:1-10)
29 Jesús‑ni nna bedábe daka Tiro lhe Sidón lhe nna besine gaxxaba ro'o indatoo ge Galilea‑ni. Nianna tti ugwapie iki ttu i'iya do niha nna udoe. 30 Nianna tti ubiga ixe juisiru ka benne ata doeha, cheke ka benne ridá natsa lhe ka benne xua loke lhe ka benne ankake biría, lhe anágaba ka benne akaa ttu lha'a ni'ake o náke lhe ixeru ka benne rani lhe. Nianna tti bese'eke ka benneha arloe, lee nna gwa beyoinbe ka benneha. 31 Laxkala ka benne tupa niha rebanabakanie tti rilákanie ka benne anka biríaha chi renneke, lhe ka benne riyasa ttu lha'a ni'ake o nákeha chi reyakake ida'a, lhe anágaba ka benne ridá natsaha chi redá tseke lhe ka benne xua lokeha chi relákanie lhe. Nianna tti ráke:
―¡Xxeniba ra le Diosi ge ka benne Israel‑ni!
32 Nianna tti uxi Jesús‑ni ka benne rudhetinieha nna ree ke:
―Neti ratua chiba lasia ka benne se'e‑ni, kumu chiba uka tsunna ubisa‑ni se'eke nii len neti nna birula bi tee bixa goke. Labí raka lasia edhelhaa ke abittu chi utoke, kumu ni kina satú leke lo neda.
33 Ka benne rudhetinieha nna ráke bie:
―¿Gála saxxíri'i nu go ttaníli ka benne‑ni? Ki lo yu bisiba nuní se'eri'i ata lanú benne se'e.
34 Jesús‑ni nna ree ke:
―¿Balha yettaxtila chele?
Ka benneha nna ráke:
―Ne gasiruba ka yettaxtila chetu nna attu chupa ka belha to nna.
35 Nianna tti ree ka benne tupa niha:
―Gwalese'e lo yu.
36 Nianna tti bedaxxue gasi ka yettaxtilaha lhe ka belhaha lhe, nna iki de chi begwebie ixkixaru len Tata Do Yebáha, nianna tti ulha'abie lhe'e ka benneha nna begwebie ka benne rudhetinieha. Ka benne rudhetinieha nna begweke ka benne chi bese'e lo yuha. 37 Iyábake utoke nna axtaliba beyielakanie. Iki de nuha nna bottuparula ka benne rudhetinieha a gasi sumi ka benne ro'o salha'a bexxaha. 38 Ttiba tu ttapa mili ka benne biyúha utoke, sunrula ka benne biyúha bibaba. Bittula bibaba ka benne nuilaha lhe ka nutoha lhe. 39 Iki de chi uchú tisa Jesús‑ni ka benneha, nianna beyapie lo barcuha nna deyye daka Magdala.