1 Tti chi uluxani Jesús‑ni unnebie nu reeha, nianna beriabie Galilea‑ni nna diabie daka Judea, daka attu ladu ge yoo Jordán‑ni. 2 Ixe juisiru ka benne danalhake bie, niha beyonie ka benne rani.

3 Ttu chupa ka fariseo‑ni nna ubigakana ata dueha, ruinkana kini ku'ukane prueba. De nuha nna unnaba tisakane, rákane:

―¿Si gwakaba udhá iki ttu nubiyú nuila geniha meskiba ttu bixaru ge?

4 Lee nna bekabie gekani, ree:

―¿Si lagwa chi belabale lo ka yetsi ge Tata Do Yebáha, ata dia ra deki lee, tti sisi'a tte benie ka benne, “nuila lhe nubiyúba benie ke”? 5 Rágabe: “De nuha nna teeki udhan nubiyúha ka tata nan geniha nna utsá náni len nuila geniha. La'ania nna ixpabakana akakana ttisidiba ttúba benne.” 6 Laxkala labíru anka ka nuha chupa benne, sinuki ttúba benne chi anka ka nuha. Laxkala ka nu chi beketi Tata Do Yebáha, labí dika etsila ttu benne ka nuha.

7 Nianna ra ka fariseo‑nie:

―¿Beakala lo bia bennabi bodha'an Moisés‑ni dia ra deki ttu nubiyú gwakaba ilhidhana ttu yetsi ata inná lo yetsiha deki gwakaba ela'ana len nuila geniha?

8 Jesús‑ni nna ree kana:

―Moisés‑ni begwelha galána ela'ale len ka nuila gele‑na kumu de ankale nu a riyienini. Ttaka tti sisi'a tteha, labí aná ga'anna aka. 9 Neti ria le, ttu nubiyú ganna kwentaba ela'ana len nuila geniha, ganna abittuba delo ni'a ge de bisá nuilaha attu nu subi, nianna ganna nubiyúha edína attu nuila subi, la'ania nna satsaba nuha chi ruin nubiyúha. Anágaba nubiyú edína nuila chi bedhá ikikaniha, satsagaba nuha chi uin nubiyúha de edína nuilaha.

10 Nianna tti ra ka benne rudhetinieha:

―Ganna ralu anála rate ttu nubiyú lenna nuila geni, ganna aníha nna tserula abittu utsá ná ttu benne.

11 Jesús‑ni nna bekabie geke, ree:

―Labí iyá ka benne ankake nu dika tte dákanie nu ria‑ni, sinuki sunruba ka benne chi begwelha Tata Do Yebáha ke ki tte dákanie, ka benneha‑ruba nuha gwate dákanie nuní. 12 Se'e ka nubiyú labí rutsá nákani, kumu lhe'e tata nan gelikani chi ankakana deki labí dho lenkana nuila. Se'e adí ka nubiyú nna labí rutsá nákani, kumu ka benne se'e yiesi lo yu‑niba riguake ata do ridá lekani nuila. Anágaba nna se'egaba ka benne biyú titúbake rokinni ikike ráke: “Ri'itu labí tse'etu len nuila.” Aníha ki tse'eke udo leke uinke nu raka le Tata Do Yebáha. Laxkala benne dhielhe unie nu ra ka tisa‑ni nna unie na.

13 Nianna bisin len ka benne ttu chupa ka nuto arlo Jesús‑ni ki ixxua nábie ikikani lhe innabe gekani len Tata Do Yebáha lhe, ttaka ka benne rudhetinieha nna rudhaka disalake ka benne cheke ka nutoha. 14 Nianna tti ra Jesús‑ni ke:

―Gwalugwelha ka binto‑na itakabi len neti, bittu usunale, kumu ka benne runi tti ruin ka binto‑na, luesi ka benne‑na nuná ralhake akake ka benne innabia Tata Do Yebáha ke.

15 Iki de chi uxxua nábie iki ka bintoha, nna bedábie ata dueha nna deyye.

16 Ttu nu kwiti ubigana ata du Jesús‑ni nna unnaba tisane, rana:

―Maestru, lu ankalu benne tse. Unáchu, ¿bí nu tse unia ki satíaba aka bania arlo Tata Do Yebáha?

17 Jesús‑ni nna bekabie geni, ree na:

―¿Beaka ralu deki ankaa benne tse? Sunruba ttu benne do anke benne tse, delába Tata Do Yebáha. Ganna raka lelu aka benlu ttu dia lii, bedo tisa ge nu bodha'ane uinri'i ganna xa.

18 Nubiyúha nna rana:

―¿Nú ka tisa bodha'aneha udorua tisa geni?

Lee nna ree:

―Bittu akalu nu runi elhutti lhe bittu dho lenlu nu abittu anka latselalu lhe bittu lhanalu lhe bittu kwentaba usialu iki ttu benne deki benie ttu bixa. 19 Anágaba nna tsia lelu ka tata nan gelu, lhe akinlu ge attu benne atti tteba rakabin gelu.

20 Nu kwitiha nna rana:

―[Attili ankaa nutoha], chi rudoa tisa ge iyába nu bodha'an benneha. ¿Bíruala riyasaa unia ganna?

21 Jesús‑ni nna ree na:

―Ganna raka lelu akalu benne runi itá su, beyya nna betto'o iyá nu tee gelu nna belhiu ge nuha nna begwe ka benne abittu geke tee. Ganna aníha uinlu, la'ania nna gwattaba elha tse gelu yebáha. La'anialigaba nna chinka utá tenalha neti.

22 Tti biyienin nu kwitiha nu rabie naha, nianna si'iba bedúna leni deyyana kumu de tee xxatta geni.

23 Jesús‑ni nna ree ka benne rudhetinieha:

―Netiru ria, tsitsiba anka ki isin ttu nu tee geni akana nu innabia Tata Do Yebáha na. 24 Rinnea attu libe ria: adírula satti ga'a ttu camellu lhe'e yieru do xan ttu yoxa attichula ga'a ttu nu tee geni, kini akana nu innabia Tata Do Yebáha na.

25 Tti biyienin ka benne rudhetinieha nu reeha, yalhá bebanakanie nna ráke:

―Ganna aníha nna, ¿nú dhaana esinna len Tata Do Yebáha?

26 Jesús‑ni nna rugíabe loke nna rabie ke:

―Len ka benne se'e yiesi lo yu‑ni, abittu galá aka, ttaka len Tata Do Yebáha iyába gwakaba.

27 Nianna unnaba tisa Pedruha, rane:

―Ri'itu bedhába ikitu iyá nu tee getu nna danalhatu lu. ¿Bíla ralhatu dhitu ganna?

28 Jesús‑ni nna ree ke:

―Netiru ria, atti isia sá ekubi yiesi lo yu‑ni lhe iyá nu se'e loni lhe, la'ania neti benne daya yebáha dhoa lo xxila nu rapi edha linníha ata innabiaya. Anágaba lebi'i ka nu danalhale neti ebiagabale lo tsi'inu (12) ka xxila ata tse'ele innabiale kini uinle elhuxtisi ge ka benne tsi'inu (12) dhi datiake benne tee lábie Israel. 29 Lhe anágaba nuxaba benne ganna si de danalhe neti nna bedhá ikie lisieha lhe ka betsieha lhe ka daneha lhe ka xxudi ixnábie lhe ka xi'inie lhe o si ka lo yu geeha, la'ania nna gayua (100) libe tteba luesi nu bennittieha edíe. Anágaba nna ralhagabe aka benbie ttu dia lii. 30 Ttaka ixe ka nu ra xxeni lekani nnanna, eyakakana ka nu abittu ra xxeni lekani la'ania, nna ixe ka nu abittu ra xxeni lekani nnanna, ka nuha‑la eyakakana ka nu inná xxeni lekani la'ania.