1 ’Tata Do Yebáha tti rinnabie ka benne, elha rinnabia geeha raxxína na len nu gwate tsii ka nuila ribani biriakana denkana ka kinke ge seti nna gwaledakana nubiyú utsá nániha. 2 Gayu ka nuilaha ankakana ka nu se'e xulha nna a gayukana nna ankakana ka nu gwa se'e dhina. 3 Ka nu se'e xulhaha nna gwa denbakana ka kinke gekaniha, ttaka labí seti denkana kini ega'akana ge ka nuha. 4 Ka nu se'e dhinaha nna gwa nujaba ka nuha bega ta'a seti lhe chegabakana ka kinke gekaniha lhe. 5 Ttaka kumu risába nubiyú utsá nániha anúna risina, aníoka nna bedaxxuba bisielaha iyába ka nuilaha nna bixuinba lekani. 6 Tti chi ugwena riluelaha nna biyien tsi'i ttu benne uresi'e, ree: “¡Ne nubiyú utsá nániha chi daha! ¡Gwaliria nna gwatatsá na!” 7 Nianna iyába ka nuila ribaniha bebenkana nna bose'e tse ttebakana ka kinke gekaniha. 8 Ka nu se'e xulhaha nna rákana ka nu se'e dhinaha: “Gwalute latti seti gele‑na ki ega'atu lhe'e ka kinke getu‑ni kini reyolaba ka nuní.” 9 Ka nu se'e dhinaha nna rákana: “Labí ute ri'itu, gasi ni kina ebisi seti getu‑ni, la'ania nna iyasagaba getu lhe iyasagaba gele lhe. Tserula gwaltsia ata rito'o seti gwatayo'o gele.” 10 Ttaka laka dia ka nuha ugo'o setiha nna bisin nubiyú utsá nániha. Ka nuila se'e dhinaha nna uta'aba lenkana nubiyú utsá nániha lo dha'aha, nianna beto tteba yo'oha. 11 Deloliba nna tti besin adí ka nuila ribaniha nna rinnekana ro'o yo'oha, rákana: “¡Tata xisi to, udhalichi kini ga'atu!” 12 Ttaka nubiyúha nna bekabina, rana kana: “Labí idhalia gele kumu labí ankabiati le.”

13 Nianna tti ra Jesús‑ni:

―Laxkala lebi'i gwaltse'e ubeda, kumu labí yule bittiga ura lhe bittiga sá esiaya, neti benne daya yebáha.

14 ’Tata Do Yebáha tti rinnabie, elha rinnabia geeha raxxína na len nu ben ttu nubiyú biriana diana idittu. Nianna tti uxina ka nu ren sina geniha nna bodha'anna len ka nuha belhiu nu tee geniha. 15 Ttu ka nuha begwena na gayu mili, attuna nna chupa mili, nu beyonnaha nna begwena na ttu mili. Kua ttu ttubakana begwena kana attiba bedhaka leni dhaakana udhákana belhiu geniha. Nianna tti biriana diana. 16 Nu uxí gayu miliha nna ugweki ttebana gwerixxi len belhuha nna gwa bedienbana iki nuha a gayu mili. 17 Aníha‑gaba ben nu uxí chupa miliha, gwa bediengabana a chupa mili iki nuha. 18 Ttaka nu uxí ttu miliha nna ugíalana gwache'enna lhi'u yu nna bekatsilana belhiu ge xxananiha.

19 ’Isáliba uka nna tti beyeki xxanakaniha besinna. Nianna uxina kana kini kixxi'akana ttixa dia rani belhuha. 20 Nu uxí gayu miliha nna besia lenna a gayu mili, nianna rana: “Tata xisi to, gayu mili nuha bete kwinalu len neti. Biyúruga, ne a gayu mili tee nii chi bedienia iki nuní.” 21 Xxananiha nna bekabina, rana na: “Tseba anka nu benlu. Lu ankalu ttu benne ruin tse sina lhe ttu benne rudo tsitsiba tisa lhe. Kumu ttu latti belhiu betea len luha, gwa biyú tsitsibalu na, nnanna nna uxxenrula lasia lu kini udhálu ixeniru belhiu. De nuha nna utá len neti kini tse'e ittari'i.” 22 Bisingaba nu uxína chupa miliha nna rana: “Tata xisi to, kwinalu betelu chupa mili len neti. Nnanna nna, ne a chupa mili tee nii chi bedienia iki nuní.” 23 Xxananiha nna bekabina, rana na: “Tseba anka nu benlu. Lu ankalu ttu benne ruin tse sina lhe ttu benne rudo tsitsiba tisa lhe. Kumu ttu latti belhiu betea len luha, gwa biyú tsitsibalu na, nnanna nna uxxenrula lasia lu udhálu ixeniru belhiu. De nuha nna utá len neti kini tse'e ittari'i.” 24 Ttaka tti bisin nu uxí ttu miliha, nianna rana xxananiha: “Tata xisi to, neti yubaa deki lu ankalu ttu benne labí ratua lelu, kumu lu relapalu ata labí ulu'ulu lhe redílu ata labí bedelhalu lhe. 25 De nuha nna usibati lu nna ugíalaa gwakatsia belhiu gelu‑ni lhi'u yu. Nnanna nna ne belhiu geluha tee nii.” 26 Xxananiha nna bekabina geni, rana na: “¡Aaluxa nu ren sina re satsa leni lhe nu lea lhe! Ki ganna gwa yúbalu deki neti relapaa ata labí ulu'a lhe redía ata labí bedelhaa lhe, 27 ¿beakala nna a gwattixxabalu belhiu kia‑ni lhe'e banku kini nnanna besiaya nna edía belhiu‑na itupa len xi'inni?” 28 Nianna tti rana ka nu se'e niha: “Gwalegua belhiu‑na lo ná nuní nna gwalute belhiu‑na len nu chi den tsii mili‑na. 29 Kumu benne gwa ruyú tsitsie nu ridíeha, dhi chiettirula benneha nna exxa tamarula gebie nna nu abittu ruyú tsitsina nu ridínaha, nuha axtala nu ttu latti chi tee geniha etua. 30 Nubiyú du nii nu abittu gwakana uinna sina‑ni, gwalikwea na nna gwaludelha na ata anka chulhaha. Niha kwesina lhe goniba lo layani lhe.”

31 ’Atti esiaya neti benne daya yebáha, dedáya lhe'e xiani kiaha lenia ka anjeli ge Tata Do Yebáha, nianna tti dhoa lo xxila nu raka lhalha ata innabiayaha. 32 La'ania nna iyá xeaba ka benne se'e yiesi lo yu‑ni etupake arloa. Neti nna ebesia lhe'e luesike attiba runi nu reki lo ka neruha rebesina ka chivaha lhe'e ka neruha. 33 Use'a ka benne ruin tseha daka ná bania nna ka nu ruin satsaha nna use'a kana daka ná yattia. 34 La'ania nna neti benne ankaa nu rinnabiaha, upeya ka benne se'e daka ná baniha: “Lebi'i chiba uka len Tata kiaha le. Gwaltáxxi kini dhile nu tse chi ga'ananie dhi ka benne rinnabie; delába nu chi ga'ananie dhile attili lani kwe yiesi lo yu‑niha. 35 Kumu neti tti bituniaha, lebi'i nna gwa betebale nu utoa nna tti bebisia indaha, lebi'i nna gwa betebale inda u'uyaa nna tti rekia ankaa attiba ttu benne dittu, lebi'i nna gwa beyaxibale neti lisile. 36 Anágaba tti biyasati xoa, lebi'i nna gwa betebale nu bikua nna tti úniaha, lebi'i nna gwa biyúbale neti. Anágaba tti uttaa lisiyyaha, lebi'i nna gwa bitabale betegíale neti.” 37 Ka benne ruin tseha nna ekabike kia, innáke: “Tata Xisi to, ¿nuka bilentu lu rituinlu nna gwa bennabatu nu utolu lhe nuka bilentu lu rebisilu inda nna gwa betebatu inda u'uyalu? 38 Lhe anágaba, ¿nuka bilentu lu rekilu attiba ttu benne dittu nna gwa beyaxibatu lu lisitu? Lhe ¿nuka biyasinlu xolu nna gwa betebatu nu bikulu? 39 Anágaba lhe ¿nuka bilentu lu ranilu o telu lisiyya nna gwa bitabatu betegíatu lu?” 40 Neti benne ankaa nu rinnabiaha nna ekabia geke, upeya ke: “Netiru ria, atti bete nále len ttu ka betsi to geri'i, ka benne labí ra xxeni leke, attisidiba len netiba nuha bete nále.” 41 Nianna tti upeya ka nu se'e daka ná yattiha: “¡Lebi'i ka nu ralhale urixxi ukinni Tata Do Yebáha, gwalibietta kwe'a nna gwaltsia lo gi nu satíaba rite loniha, delába gi nu chi re tse kini tsia nu xxegwiha loni itupa lenna ka anjeli geniha! 42 Kumu neti tti bituniaha, lebi'i nna labí betele nu goa nna tti bebisia indaha, lebi'i nna labí betele inda i'iyaa. 43 Anágaba tti rekia ankaa attiba ttu benne dittu, lebi'i nna labí betele ata eya'anaa nna tti biyasati xoa, lebi'i nna labí betele nu ukua. Anágaba tti úniaha lhe tti uttaa lisiyyaha lhe, lebi'i nna labí betegíale neti.” 44 La'ania nna ekabikana kia, innákana: “Tata Xisi to, ¿nuka bilentu lu rituinlu lhe rebisilu inda lhe? ¿Nuka bilentu lu rekilu attiba ttu benne dittu o si rekilu riyasinlu xolu? Lhe anágaba, ¿nuka bilentu lu ranilu o telu lisiyya, ri'itu nna a bete nátu len kwinalu?” 45 La'ania nna ekabia gekani, upeya kana: “Netiru ria: tti abittu bete nále len ttu ka betsi to geri'i‑ni, ka benne abittu ra xxeni leke, len neti nuha abittu bete nále.”

46 Nianna tti ra Jesús‑ni:

―Luesi ka nu ruin satsa‑ni, tsiaba ka nuní ata uyúkana elha disa ttu dia liiha; ka nu ruin tseha nna eyyabakana ata aka benkana ttu dia liiha.