1 Tti chi ugwani dilaha nna iyába ka nu loni ge ka bixxudiha lhe ka benneola ge ka nu Israel‑ni lhe, iyábakana beda'a ro'okani deki gattiba Jesús‑ni. 2 Nianna tti bexxikakane nna chekane gwaga'akane lo Pilato nu rinnabiaha.

3 Judas nu betena Jesús‑ni lasi ná ka nu loni ge ka bixxudiha lhe lasi ná ka benneola ge ka nu Israel‑ni lhe, tti bilenna deki chiba bekinnikana Jesús‑ni ki gattie, nianna chi bodúna na ge nu bennaha nna ugía ttebana bodekina rerua (30) belhiu plata nu begwekana naha, 4 nna rana ka nuha:

―Neti tulha xxeniba nuná benia betea lasi nále ttu benne labí bi benie.

Ttaka ka nuha nna bekabilakana, rákana:

―¡Deloxa, labí yu ri'itu! ¡Naba biyú!

5 Nianna gwadelha ttebana ka belhuha lhe'e yotuha nna tti biriana diana gwalhu'u tuu yienni.

6 Ka nu loni ge ka bixxudiha nna bedigakana ka belhuha nna rákana:

―Belhiu‑ni labí ga'anna egu'uri'i nuní lhe'e ata ru'u ka úna ge yotu‑ni kumu belhiu‑ni ankana nu utixari'i kini gatti ttu benne.

7 Aníha uka nna beda'a ro'okani go'okana len belhuha xulali nu tee láni Ata Riria Ka Yedhu, kini xulaliha ixúna igatsi ka nu dittu. 8 De nuha nna axtaba nnanna beya'an lá xulaliha Xulali Nu Biyo'o Len Reni. 9 Aníha ki gwado tisa ge nu unne profeta Jeremías‑ni, tti ree: “Bedaxxubakana rerua (30) belhiu plataha. Ttanía nuha ulea ka nu Israel‑ni lidhaka benne gattiha. 10 Nianna tti betekana nuha kini biyo'o xulali ata riria ka yedhuha. Benbakana attiba raba Tata Xisiha neti”, aníha ra Jeremías‑ni.

11 Jesús‑ni nna bisin lenkane arlo Pilato nu rinnabiaha. Nuha nna unnaba tisane, rane:

―¿Si lu ankalu nu rinnabia ge ka benne Israel‑ni?

Lee nna bekabie geni, ree:

―Luba chi ra deki nuná ankaa xa.

12 Ka nu loni ge ka bixxudiha lhe ka benneola ge ka nu Israel‑ni lhe, tti se'ekana rukinnikane arlo Pilato‑ni, lee nna kwachiruba bekabie gekani. 13 Nianna tti ra Pilato‑nie:

―¿Si gwa riyieninlu? Ttaníli nu rusiakana ikilu.

14 Ttaka Jesús‑ni nna niba ttu tisa laa bekabie. De nuha nna nu rinnabiaha rugía ya'abana de labí rekabie geni.

15 Kua risiaba laní Pascua, Pilato nu rinnabiaha labinna rodilána ttu ka nu tee lisiyya. Rebeabana nu rakaba le yiesiha eria. 16 La'ania nuha yaya ttu nubiyú lisiyya. Iyába ka benne yuke ge nu benna. Nubiyúha lána Barrabás. 17 Tti chi tupa ka benne niha, nna unnaba tisa Pilato‑ni kana, rana:

―¿Nú raka lele odiláya? ¿Si odiláya Barrabás‑ni ak? ¿Odiláya Jesús nu tee láni Cristu‑ni ak?

18 Aníha ra Pilato‑ni kumu chiba yuna deki de ritisibakinna Jesús‑ni nna gwaga'akane loni.

19 Laka do Pilato‑ni ata rinnabianaha nna udhelha nuila geniha ttu rresona geni, rana na: “Bittu uga'a nálu len nubiyú‑na. Labí bixa ben nuná. Kumu de lana nna neti yalhá elha disa biyúa bitsiati ttu ela.”

20 Ttaka ka nu loni ge ka bixxudiha lhe ka benneola ge ka nu Israel‑ni lhe, biri'aba lenkana uxí yiekana ka nu saa niha kini ka nuha nna unnabakana kini olhána Barrabás‑ni nna Jesús‑ni nna unnabakana kini gattie. 21 Nu rinnabiaha nna unnaba tisana kana attu libe, rana kana:

―Delo ixpa ka nuní, ¿nú ka nuní raka lele odiláya?

Lakana nna rákana:

―Barrabás‑na bodilaa.

22 Pilato‑ni nna rana kana:

―Jesús nu rale Cristu‑ni nna, ¿bíla anka nu unia len nuní ganna?

Iyábakana bekabikana, rákana:

―¡Betá nuná lo ya kurusi!

23 Nianna ra Pilato‑ni kana:

―¿Beaka? ¿Bí nu satsa ben nuní?

Ttaka lakana nna adíla idisa ribesi'akana, rákana:

―¡Betá nuná lo ya kurusi!

24 Tti ute den Pilato‑ni deki labí dhaana lo ka nuha, kumu adíla rigiyyakana, nianna tti bedaxxuna inda nna utí náni arlokani nna rana kana:

―Labí udelhale kwe'a elhutti ge nubiyú‑ni. ¡Naba gwaluyú!

25 Iyábakana bekabikana, rákana:

―Kwe'ebatu lhe kwe'e ka xi'intu‑niba tsia elhutti ge nuná.

26 Nianna bolhába Pilato‑ni Barrabás‑ni. Jesús‑ni nna udhelhana ki bekulhakane, nianna tti botene lasi ná ka nu utákane lo ya kurusiha.

27 Ka soldadu ge Pilato nu rinnabiaha chekana Jesús‑ni lhe'e guskadu ata ridona ruinna elhuxtisiha. Nianna tti bottupakana adí ka soldaduha abi'iba kwe'e Jesús‑ni. 28 Uleakana ka xoeha nna begukukane ttu lari xiná. 29 Nianna tti benkana ttu corona yetsi nna ulu'ukana nuha ikie nna begwekane ttiba ttu vara ge nu rinnabia den ná benbie, nianna tti bedú xibikani arloe ruxisikana gebie, rákane:

―¡Xxeni ra lelu xa nu rinnabia ge ka nu Israel!

30 Nianna tti ruttuttu xxenkani loe nna rudaxxukana vara denieha nna riginkana nuha ikie. 31 Iki de chi bedhakakane aníha, nianna tti utuakana lari xiná nukueha nna bogukukane ka xoeha, nianna tti chekane kini utákane lo ya kurusiha.

32 Tti biriakana dia lenkana Jesús‑ni, nianna beti'akana ttu benne lhe'esi Cirene lábie Simón. Benneha bedo doelhakane ki bije kurusi ge Jesús‑ni. 33 Nianna tti bisinkana ttu latti ata tee láni Gólgota. (Gólgota dienna innána Bega Iki Nu Yatti.) 34 Niha begwekana Jesús‑ni vinu nu dia kuana ilhá ikini ki i'iye, ttaka iki de chi bennixxie nuha nna birua uka lebie i'iye nuha.

35 Iki de chi betákane lo ya kurusiha, nianna bedelhakana suerti kini elha'akana ka xoeha, kini ula'ana nupaxakana galhakana edíkana ka nuha. [Aníha ki gwado tisa ge nu unne benne uke profeta ge Tata Do Yebáha, tti ree: “Belha'abakana ka xoaha nna bedelhakana suerti ge ka nuha.”] 36 Nianna tti use'ekana biyú tsitsibakane. 37 Daka xekie betákana ttu breta dia letra loni ata rigixxi'a bí ge taabie lo ya kurusiha. Lo bretaha dia ra: “Nuní ankana Jesús nu rinnabia ge ka benne Israel‑ni.”

38 Betákana Jesús‑ni lhe betágabakana a chupa ka ubana lo ka ya kurusi, ttúna daka ná banie nna attúna nna daka ná yattie. 39 Ka nu rite ata taabieha nna ruttába ikikani rulisa xxattakane, 40 rákana:

―Lu ralu deki ottampalu yotu‑na nna delo tsunna ubisaba chi elhidhalu na. ¡Ganna si gwalíginlu ankalu Xi'in Tata Do Yebáha, titúbalu benchu ki lhaalu lo ya kurusi‑na nna beyadichu!

41 Aníha‑gaba ruin ka nu loni ge ka bixxudiha lhe ka nu rule'ekinna ka benne nu ra lo bia bennabi bodha'an Moisés‑ni lhe aníha‑gaba ruin ka fariseo‑ni lhe ka benneola ge ka nu Israel‑ni lhe; ruxisigabakana gebie, rákana:

42 ―¡Ka benne subi gwa bodilána, ttaka lana nna a raka geni elaa titúbana lo ya kurusi‑na! ¡Ganna gwalíginna ankana nu rinnabia ge ka nu Israel‑ni, eyadichuna lo ya kurusi‑na, la'ania nna ri'itu gweyya letu geni! 43 Bexxen leni ge Tata Do Yebáha, nnanna nna odiláchue na ganna gwalíga rakanie geni. Kumu rana: Neti ankaa Xi'in Tata Do Yebáha.

44 Anágaba ka ubanaha, ka nu taagabakana lenie lo ka ya kurusiha, rulisagabakane.

45 Itúba yiesi lo yu‑ni udulo bechulha, udulo bechulha retin tsi'inu (12) nna axtaliba retin tsunnaha beyani. 46 La uraha‑gaba nuha, uresi'a Jesús‑ni itú lebie, ree:

―Elí, Elí, ¿lama sabactani? ―Tisa‑ni dienna innána: Tata Do Yebaa kia, Tata Do Yebaa kia, ¿beaka rudhá ikilu neti?

47 Tti biyienini ttu chupa ka nu se'e niha nu reeha, nianna ra luesikani:

―Profeta Elías‑niba nuná raxina.

48 Looraha nna ttu ka soldadu du niha biresu ttebana gwaxxína ttu xunu nna bodibidhana nuha len vinu idí. Nianna tti bexxikana nuha lo ttu iyyaxtila nna bedona nuha ro'o Jesús‑ni kini i'iye nuha. 49 Adí ka nu se'e niha nna rákana:

―Naa la taachuna si gwetedilaa Elías‑ni na lo ya kurusi‑na.

50 Ttaka Jesús‑ni nna uresi'e attu libe idisa, nianna tti bechú lebie.

51 Looraha tteba nna bireda lari daa lhe'e yotuha, chubaa tíba ukana, udulona xekini nna axtaba xani'ani bireda. Yiesi lo yu‑ni nna bixú. Ka íyya bartoha nna bila'a lhe'ekani. 52 Biyaligaba ka yieru baa nna beyaka ben ixeru ka benne chi uttiha, delába ka benne chi ulesi Tata Do Yebáha ki akake gebie. 53 Ka benneha beriake lhe'e ka yieru baaha nna iki de chi beyaka ben Jesús‑ni lo elhuttiha, la'ania nna beta'a ka benne beyaka baniha lhe'e yiesi le'aha, delába Jerusalén‑ni, nna niha bele'e loke len ixe ka benne.

54 Soldadu nu baninna adí ka soldaduha, du lenna attu chupa ka soldadu ruyúkana Jesús‑ni. Ka soldaduha tti bilákinna chi rixúha lhe iyá nu chi ukaha lhe, nianna usi xxattakinna nna rákana:

―Benne‑niligaba nna gwalí anke Xi'in Tata Do Yebáha.

55 Ixeba ka benne nuila, delába ka benne danalhake Jesús‑ni desdeba Galilea‑ni kini bete náke lenbie, ka benneha idittuliba se'eke gwelanni. 56 Lhe'e ka benneha sela María Magdalena lhe María nan ge Jacobo‑ni lhe José‑ni lhe; niha‑gaba sela nan ge ka xi'in Zebedeo‑ni lhe.

57 Tti chi ulha sáha nna bisin ttu benne biyú tee gebie. Benneha lábie José. Lee anke benne lhe'esi Arimatea. Benneha ukagabe ttu ka benne bedhetini Jesús‑ni. 58 José‑ni ugíe arlo Pilato‑ni nna bennabe Jesús‑ni ki ukatsie benneha. Pilatuha nna udhelha ttebana kini botekana benneha len José‑ni. 59 José‑ni nna bedíbe Jesús‑ni nna tti bottesie benneha ttu lari nari xú. 60 Nianna bekatsie Jesús‑ni lhe'e yieru baa kubi geeha. Yieru baaha uche'enie na lhe'e ttu íyya daa niha. Nianna iki de chi bekatsie Jesús‑ni nna tti bottulhue ttu íyya xeni kini bedheabie ro'o yieru baaha, nianna tti deyye. 61 Ata bigatsi Jesús‑ni re María Magdalena‑ni lhe attu María‑ni lhe; se'eke daka arlo yieru baaha.

62 Beyeki sáha, la sá tti reyaka le ka benne Israel‑ni, ka nu loni ge ka bixxudiha lhe ka fariseo‑ni lhe bisinkana lo Pilato‑ni 63 rákana na:

―Tata xisi to, ri'itu rexxa letu ge nu ruin leniha tti sa anka bennaha, rana: “Ganna chi uka tsunna ubisa uttiaha, iki de nuha nna eyaka benbaa attu libe.” 64 De nuha nna rinnabatu len kwinalu kini idhelhalu ka nu tse'e tsitsikana ki uyúkana ro'o yieru baaha axtaliba ganna chi beyonna ubisaha, la'anialiba nna ebi'ettakana kumu ni kina tsia ka nu bedhetinaha nna salea sigákana nu yattiha. Nianna tti tsekikana gákana ka benne deki beyaka benba nuha lagwi ge ka benne chi uttiha. La'ania nna adírula xeni aka gwen lasi inne ka nuha attichula gwen lasi unne nuha sisi'a tteha.

65 Pilato‑ni nna rana kana:

―Naba se'e ka soldadu ka nu uyúkana ro'o yieru baaha. Gwaliche kana nna gwaludhea tsitsi ro'o yieru baaha. Gwaluinba ttiba rudhakaba lele kini tsaya tsitsi ro'oni.

66 Aníha uka nna diakana gwadhea tsitsikana íyya nu yaya ro'o yieru baaha nna bese'ekana ka soldaduha ki uyú tsitsikana ro'o nuha.