1 Tti chi isin ka Jesús‑ni lhe'esi Jerusalén‑ni, gaxxaba ata re lhe'esi Betfagé lhe Betania lhe, daka ata do i'iya ata daa ka ya olivuha, nianna tti udhelha Jesús‑ni chupa ka benne rudhetinieha, 2 ree ke:

―Gwaltsia lhe'e yiesi to re arlori'i‑ni. Ganna chi uta'ale lhe'e yiesi‑na nna saxxaka ttebale nalha ttu burru to, ttu nu lanú nu chi udona kwe'eni. Gwalidhasi yienni nna gwaltá lenna. 3 Ganna nuxa innaba tisana le, gana le: “¿Beaka ridhasile yien burru to‑na?” Aní gwaligá na: “Jesús benne anke Xxanari'iha‑ba riyasanie nuní, delola nna gwetedha'an tte gee na.”

4 Nianna dia ttebake nna gwaxxakabake burru toha, nalhana ro'o nedaha, gaxxaba ro'o ttu yo'o. Nianna tti udhasike yienni.

5 Ttu chupa ka nu se'e niha nna unnaba tisakana, rákana:

―¿Bíunna ruinle? ¿Beaka ridhasile yien burru to‑na?

6 Ka benneha nna bekabibake atti tteba ra Jesús‑ni ekabike. Aníha uka nna gwa begwelhabakana ke decheke bia toha. 7 Tti besin lenke burru toha ata du Jesús‑ni, nianna utsilake ka xokeha kwe'e bia toha nna tti udoe kwe'eba. 8 Ixegaba ka benne utsilake ka xokeha lo neda ata dia Jesús‑ni ritebie nna adíke nna utitsake lo ka yaga daa niha nna utsilake lo nedaha. 9 Ka benne daneruke arloeha lhe ka benne danalhake bieha lhe, ka benneha nna ribesi'abake ráke bie:

11 Tti uta'a Jesús‑ni lhe'esi Jerusalén‑ni nna dia ttebe ata do yotuha nna bilánie abi'iba kwe'e yotuha iyá nu raka niha, ttaka kumu chi galá diora nuha, de nuha nna bedá ttebe len ka benne tsi'inu rudhetinieha (12) deyyake daka Betania.

12 Beyeki sáha, tti beriake lhe'esi Betania, ugwetti bituin Jesús‑ni. 13 Nianna tti bilánie du ttu ya higu axtaru nu reha gwa siaba lhaga geni. Lee nna dia ttebe ata du yagaha ganna gwa sia higu loni. Ttaka bi gwaxxake ni ttu higu lo nuha, sunruba lhaga geni sia, kumu labí higu chi rebia la'ania. 14 Nianna tti ree yagaha:

―¡Debá nnanna niruba attu higu a kwiaru lolu, laxkala lanúru nu gona nu xixxi gelu!

Ka benne rudhetinieha nna biyienbakanie nu reeha.

15 Tti bisinke lhe'esi Jerusalén‑ni nna uta'a tteba Jesús‑ni lali'a yotuha nna udulo ttebe bochesue iyá ka nu se'e gwetto'oha lhe ka nu yu'u ugo'oha lhe. Berixxi logabe ka mexa ge ka nu rotsea belhiha lhe ka xxila ge ka nu se'e gwetto'o ka bechaha lhe. 16 Anágaba labíru begwelhe ka benne tteke lali'a yotuha nujake yua. 17 Nianna rigixxi'anie ka benneha ree ke:

―¿Laaba ganna lo ka yetsi ge Tata Do Yebáha dia ra: “Yo'o kia‑ni ixúe kini iyá xea ka benne se'e yiesi lo yu‑ni ilhapike tisa len neti”? Ttaka lebi'i nna ttiba “belea ata yu'u ka ubanala” chi benle yotu‑ni.

18 Biyienbakin ka nu loni ge ka bixxudiha lhe ka nu rule'ekinna ka benne nu ra lo bia bennabi bodha'an Moisés‑ni nu ra Jesús‑ni, nianna tti begila lekani kini gaxasina uinkana uttikane, kumu rasibakinna gebie kumu de iyába ka benne rebanabakanie ge nu rule'enie keha. 19 Tti chi ulha sá nna beriaba Jesús‑ni Jerusalén‑ni lenie ka benne rudhetinieha deyyake.

20 Beyeki dilaha nna dia Jesús‑ni lenie ka benne rudhetinieha nna uteke gaxxaba ata du ya higuha. Nianna bilákanie yagaha, chi ubisi nuha itupa lhu‑ni.

21 Nianna tti gwadú le Pedro‑ni nna rana Jesús‑ni:

―Maestru, belanniruga ya higu utisaluha, chiba ubisina.

22 Jesús‑ni nna bekabie, ree kana:

―Gwaluxxen tsitsi lele ge Tata Do Yebáha. 23 Netiru ria, nuxaba benne ganna ttixka gabie i'iya do naa: “Ubi'etta ata dolu‑na nna ugía gwaxxudi lhe'e indatoo‑na”, benne inná aníha abittu udú chupana lebie tti innee aníha, sinuki tuttíruga tsia tsitsi lebie deki gwakaba nu reeha, la'ania nna gwakaba nu rinnabeha. 24 Laxkala de nuha nna ria le, iyába nu innabale len Tata Do Yebáha tti rinnele lenie, gwaltsia lele deki chiba uxíle nu unnabaleha, la'ania nna gwadíbale nuha, 25 lhe anágaba tti se'ele rilhapile tisa len Tata Do Yebáha, gwalidhí elha xen lasi ge ttu benne ganna ritilha lenlee, kini anágaba nna Tata gele benne do yebáha gwadígabe elha xen lasi ge ka tulha ruinle. 26 [Kumu ganna lebi'i abíba dhile elha xen lasi ge ttu benne, anágaba Tata gele do yebáha, labígaba dhie elha xen lasi ge ka tulha ruinle.]

27 Tti bedesinke Jerusalén‑ni nna laka reki Jesús‑ni ata do yotuha, nianna tti ubiga ka nu loni ge ka bixxudiha lhe ka nu rule'ekinna ka benne nu ra lo bia bennabi bodha'an Moisés‑ni lhe, anágaba ubigagaba ka benneola ge ka nu Israel‑ni, 28 nianna unnaba tisakana, rákane:

―¿Bí lo neda nuná rapalu kini ruinlu ka nu ruinlu‑na? ¿Núla betena lo neda gelu kini ruinlu nuná?

29 Jesús‑ni nna bekabie, ree kana:

―Anágaba neti innaba tisagabaa le ttu bixa. Ganna ekabile ge nu innaba tisaa le‑ni, la'ania nna neti gwagixxi'agabania le nú betena lo neda len neti kini runia ka nu runia‑ni. 30 Gwalinná sanga, ¿nú iki biria ki begadi Juan‑ni ka benne inda? ¿Si iki Tata Do Yebáha ak? ¿Iki ka benne se'e yiesi lo yu‑ni ak?

31 Lakana nna ra luesikani:

―Ganna gari'i na: “Tata Do Yebáha‑ba udhelhe benneha”, la'ania nna innána: “¿Beaka laa a ugía lele ge benneha ganna?” 32 Bittugaba aka geri'i gari'i na: “Ka benneba udhelhake benneha.”

Aníha rákana kumu rasibakinna ge ka benne kumu iyábake ria leke deki Juan‑ni gwalíga uka benneha profeta ge Tata Do Yebáha.

33 Aníha uka nna bekabikana ge Jesús‑ni, rákane:

―Labí yutu nuxa udhelhana benneha.

Lee nna bekabie gekani, ree:

―Anágaba neti bittugaba kixxi'ania le nú rutena lo neda len neti kini runia ka nu runia‑ni.