1 A chupa ubisaba riyasa isia laní Pascua tti ro ka benne Israel‑ni yettaxtila nu abittu kua dii sela lhe'eni. Ka nu loni ge ka bixxudiha lhe ka nu rule'ekinna ka benne nu ra lo bia bennabi bodha'an Moisés‑ni, ka nuha regila lekani bixa ibixxini Jesús‑ni innee kini aníha‑chu nna tee ro'okani udaxxukane nna uttikane. 2 Ttaka lakana nna ra luesikani:

―Bittu uinri'i nuha tti raka laníha kini ka utsatsari'i ka benne.

3 Jesús‑ni doe lhe'esi Betania lhe'e lisi Simón nu uka latini yiesu nu tee láni lepra. Tti doe go yettaha bisin ttu nuila denna ttu re'e to ankana ge íyya ragalha. Íyya ragalhaha tee láni alabastro. Lhe'e re'e toha ta'a seti nu rure ixixxi nu raka xxatta yaxi. Setiha ankana taga'a ge ttu yaga tee láni nardo. Nuilaha nna ulha'ana re'e toha nna bedo ttattana seti ta'a lhe'e nuha iki Jesús‑ni. 4 Ttu chupa ka nu se'e niha, nna bisa'akinna nna ra luesikani:

―¿Beaka kwentaba bedelha lattibana seti‑na? 5 A bito'ochila nuná gwate tsunna gayua (300) denario. Belhuha nna dhi ka benne dii ata abittu tee geke.

Nianna rinnekana ge nuilaha.

6 Jesús‑ni nna ree kana:

―Naa la rena. Bittu innele geni, kumu ttu nu tse nuní chi benna len neti. 7 Ka benne dii abittu geke tee satíaba tse'e ka benne‑na len lebi'i nna gwakaba gele ute nále len ka benne‑na tti aka lele, ttaka neti labí satía dhoa len lebi'i. 8 Nuila‑ni benba nuní nu ukaba geni; chi begu'u gaana seti rure ixixxi‑ni latia kini igatsia ganna chi uttiaha. 9 Netiru ria, itúba yiesi lo yu‑ni gaxaba lhe'e ka yiesi ata kixxi'a ka benne ka tisa kia‑ni, kixxi'agabake ge nuila‑ni. Aníha kini sadú le ka benne ge nu benna‑ni.

10 Judas Iscariote, ttu ka benne tsi'inu rudhetini Jesús‑ni (12), ugíana gwanne lenna ka nu loni ge ka bixxudiha kini utena Jesús‑ni lasi nákani. 11 Lakana nna bedeakabakinna ge nu rana kanaha, nianna bisia ro'okani ugwekana na belhiu. Lana nna udulo ttebana begila leni ki gaxasina utena Jesús‑ni lasi nákani.

12 Sá neru ge laní Pascua tti ro ka benne Israel‑ni yettaxtila nu abittu kua dii dia ikiniha lhe la'aniagaba nuha ruttike ka neru re'eni to roke laníha, nianna tti unnaba tisa ka benne rudhetini Jesús‑ni, ráke bie:

―¿Gá raka lelu tsiatu sentu irse ki gori'i laní Pascua‑ni?

13 Lee nna udhelhe chupa ka benne rudhetinieha nna ree ke:

―Gwaltsia lhe'e yiesi‑na. Naa eti'ale ttu nubiyú dedána denojana ttu re'e inda nna gwaltsia gwasanalha na. 14 Ata eta'anaha, niha gwaligasi xxana yo'oha: “Aní ra maestruha: ¿Gon‑na do ttu cuartu ata go irse lania ka benne rudhetinia‑ni irse ge laní Pascua?” 15 Xxana yo'oha nna ule'enna le yo'o nu do berupa kuaha. Niha chi do tse ttu cuartu xeni. Lhe'e nuha gwaluin irse ki gori'i.

16 Ka benne rudhetinieha nna dia ttebake uta'ake lhe'esiha nna gwaxxakabake iyába atti tteba chi ree keha. Niha benke irse ge laní Pascua.

17 Tti chi ralhaha nna bisin Jesús‑ni len ka benne tsi'inu rudhetinieha (12). 18 Tti chi se'eke ro'o mexaha go irse, nianna tti ree:

―Netiru ria, delo iyále se'ele go len neti ro'o mexa‑ni nuxa ttúle nuní utele neti lasi ná ka nu uttikana neti.

19 Lake nna bedú si'i ttebana leke nna ttu ttubake unnaba tisake Jesús‑ni, ráke:

―¿Si bittuba neti nuná xa tata?

20 Lee nna bekabie, ree ke:

―Delo iyá tsi'inule (12) se'ele nii, ttúle nu rugutule lhe'e ttúba ye'ena‑ni len neti, lana nuha utena neti lasi ná ka nu uttikana netiha. 21 Neti benne daya yebáha eya'abaa attiba chi ga'anna lo ka yetsi ge Tata Do Yebáha. Ttaka gwalíchiru le nu utena neti lasi ná ka nu uttikana neti. Tserula saríana na ganna abittu ulina, a laa kila ulina.

22 Laka se'eke goha nna bedaxxu Jesús‑ni yettaxtilaha nna begwebie Tata Do Yebáha ixkixaru. Nianna tti ulha'abie lhe'e benneha nna begwebie ka benne rudhetinieha nna ree ke:

―Gwaligo yettaxtila‑ni. Benne‑ni anke bela latia.

23 Iki de nuha nna tti bedaxxue xiga ta'a vinuha nna begwebie ixkixaru Tata Do Yebáha, nianna tti begwebie ka benneha nna iyábake u'uyake vinuha. 24 Nianna tti ree ke:

―Nuní ankana reni kia rugwena lidhaka tisa chi bodha'an Tata Do Yebáha len ka benne. Reni‑ni ilalina kini odilána ixe ka benne. 25 Netiru ria, debá nnannaba ri'iya vinu‑ni, labíru i'iyaa na, gannaliba chi besinaa ata rinnabia Tata Do Yebáha, la'anialiba nna ede'eyaa vinu kubi attu libe.

26 Iki de chi bilhake ttu le'a to, nianna tti biriake diake iki i'iya ata daa ka ya olivuha.

27 Tti chi se'eke iki i'iyaha, nianna ra Jesús‑ni ka benne rudhetinieha:

―Nnolha iyábale isatsale udhá ikile neti. Akaba attiba chi unne Tata Do Yebáha lo ka yetsi geeha, tti ree: “Neti uttibaa nu reki lo ka neruha nna ka neruha nna isatsa ttebakana.”

28 Rágaba Jesús‑ni:

―Ttaka iki de chi beyaka bania lo elhuttiha, la'ania nna eya'a gaaya enerua lole esinaa daka Galilea‑ni, delola nna esiale.

29 Pedro‑ni nna rane:

―Meskiba adí ka nuní udhá ikikani lu, neti labí udhá ikia lu.

30 Jesús‑ni nna rabie na:

―Netiru ria, nnolha tti lanila kwesi chinkaha chupa libe, lu tsunna libela chi bedhea lelu abittu ridí ro'olu deki ankabienlu neti.

31 Ttaka Pedro‑ni nna ttu dúbana rana:

―Meskiba gattia lenlu, labí innía deki labí ankabiati lu.

Aníha‑gaba ra adí ka benneha.

32 Nianna dia Jesús‑ni len ka benne rudhetinieha ttu latti ata tee láni Getsemaní, nianna ree ka benneha:

―Nii gwaltse'e, laka neti tanne lania Tata Do Yebáha.

33 Chebe Pedro‑ni lhe Jacobo‑ni lhe Juan‑ni lhe, nianna tti uduloe bedú si'ina lebie lhe bedú xxattane lhe. 34 Nianna tti ree kana:

―Yalhá si'i du lasia. Gwanalu chiba gattia rakati. Nii gwaltse'e nna bittu ga'adhile.

35 Lee nna biru'une attu latti daka aná nna bedú xibie bere loe lo yu, nianna tti unnabe len Tata Do Yebáha kini gaa godilábe bie lo nu sateeha. 36 Nianna ree:

―Tata to kia, nu diru innálu, benchi kini abittu uyúa elha disa‑ni, kumu lu gwakaba gelu uinlu iyá. Ttaka labí nu innía aka, sinuki nu innába kwinalu aka.

37 Tti beyekie ata se'e ka benne tsunnaha nna gwaxxake ke te'adhilake. Nianna tti ree Pedro‑ni:

―Simón Pedro, ¿si te'adhibalu? ¿Si bi gwa udaalu dho tennálu kwadiba ttu ura? 38 Gwaltse'e tenná lhe gwalinnaba len Tata Do Yebáha kini abittu dhi yie nu xxegwiha le nna eyadi gaale. Gwalí galá, lebi'i gwa rakabinle tse'e tennále, ttaka bela latile‑na labí ridaana uchíana.

39 Nianna tti bedeyekie attu libe nna gwadinne lenbie Tata Do Yebáha, bodeki adakabe ka tisa nu chi ree benneha. 40 Tti bedeyekie besine ata se'e ka benneha attu libe nna gwadixxakagabe ke dedete'adhigabake kumu de ta'a xxatta loke bisiela nna abígaba yuke bixa ekabike gebie. 41 Tti beyekie besine ata se'e ka benneha nu beyonna libeha, nianna tti redeabie ke:

―¿Si sa tebale te'adhile? ¡Ttanába! Chinka gwaleyadha, kumu neti benne daya yebáha chiba bisia ura nuní utekana neti lasi ná ka nu runi tulha. 42 ¡Chinka gwaleyadha nna gwaleyaa! ¡Ne nu utena neti lasi ná ka nu uttikana netiha, chi daa naa!

43 Sa dula Jesús‑ni gwenne, ttiru chi bisin Judas nu selana lhe'e ka benne tsi'inu (12) rudhetinieha, dia lenna ixe ka nu denkana yaga lhe espada lhe. Ka nuha udhelha ka nu loni ge ka bixxudiha lhe ka nu rule'ekinna ka benne nu ra lo bia bennabi bodha'an Moisés‑ni lhe, anágaba diagaba ka benneola ge ka nu Israel‑ni. 44 Judas nu utena Jesús‑ni lasi ná ka nu udaxxukaneha nna chi rana ka nuha:

―Nu ibigaa goa xxaganiha, lana nuha. Gwaludaxxu na nna gwaluxxika na kini abittu elána.

45 Aníoka nna tti bisin Judas‑ni ata du Jesús‑ni nna tti ubigana nna rane:

―Maestru.

Nianna tti utona xxage. 46 Ka nuha nna bedaxxu ttebakane nna dechekane. 47 Ttaka ttu ka benne du len Jesús‑ni nna ulea ttebe espada geeha nna uchúe naga nu riben lo sina ge bixxudi xeniha. 48 Nianna ra Jesús‑ni kana:

―¿Beaka ttiba nu daa gwedaxxu ubana dale gwedaxxu neti denle espada lhe yaga lhe? 49 Ki ttu ttu sába dua len lebi'i rule'enia le ka tisa ro'o yotu‑na nna abí chiga bedaxxule neti. Ttaka teeki aka aní kini saxxína nu ra lo ka yetsi ge Tata Do Yebáha.

50 Looraha nna iyába ka benne rudhetinieha ttúbe bedúke nna bexunnilake. 51 Sunruba ttu nu kwiti diana danalhana Jesús‑ni, nukuna ttu lari nna lariha‑ba biyaxxukinna. 52 Ttaka lana nna belhá bixxina lari nukunaha nna tuntubana bexunnina.

53 Nianna bisin lenkana Jesús‑ni arlo bixxudi xeniha nna betupa tteba iyába ka nu loni ge ka bixxudiha lhe ka benneola ge ka nu Israel‑ni lhe anágaba ka nu rule'ekinna ka benne nu ra lo bia bennabi bodha'an Moisés‑ni lhe. 54 Pedro‑ni nna idittuliba danalhana Jesús‑ni bisinna lali'a yo'o ata do bixxudi xeniha, nna niha‑ba urena len ka nu rise'e gweyú ro'o lisi bixxudi xeniha rutsa'ana ro'o tee.

55 Ka nu loni ge ka bixxudiha lhe iyába ka nu runi elhuxtisi ge ka nu Israel‑ni, yu'ukana regila lekani bixa usiakana iki Jesús‑ni kini anáchu tee ro'okani uttikane, ttaka labí raxxakakana ttu bixa. 56 Kumu ixe ka nu ruin lekani rusiakana ikie, rákana deki runie ttu bixa, ttaka labí turo'o raxxína nu rinnekanaha. 57 Ttu chupakana udú liikana nna rusiakana ikie nu labí lii nna rákana:

58 ―Ri'itu biyienintu rana: “Neti uttampaa yotu‑ni, yotu nu ben ka benne se'e yiesi lo yu‑ni. Nianna delo tsunna ubisaba nna chi elhidhaa attu yotu nu labí uin ka benne se'e yiesi lo yu‑ni.”

59 Ttaka nigaba aníha nna labí raxxína turo'o len nu rinnekanaha.

60 Nianna tti udú lii bixxudi xeniha lagwi ge ka benne tupa niha nna rana Jesús‑ni:

―¿Bíunni rusia ka nuní ikilu? ¿Si lagwa gwekabilu ge nu rákana‑ni?

61 Ttaka Jesús‑ni siiba uke, labí bekabie geni. Nianna tti bedennaba tisa bixxudi xeniha bie attu libe, rane:

―¿Si lu ankalu Cristu Xi'in benne anke le'aha?

62 Lee nna bekabie geni, ree:

―Ila, neti galá. Lebi'i gwalábinle neti benne daya yebáha dhoa daka ná bani ge benne ra tsitsi xxatta leeha lhe ilágabinle neti dedáya yebáha lhe'e bea.

63 Tti biyienin bixxudi xeniha nu ra Jesús‑ni nna ucheda bixxiba xoni kini ula'a deki rise'enna, nianna tti rana:

―Nuruala riyasinri'i nuxa kixxi'ana bixa ben nuní. 64 Ki kwinaba lebi'i chi biyienin nagale rorexxa gaalana Tata Do Yebáha. Lebi'i nna, ¿bí rakinle?

Nianna iyábakana beda'a ro'okani rákana deki ralhaba Jesús‑ni gattie.

65 Attu chupakana nna udulokana bettuttu xxenkani lo Jesús‑ni lhe bettokana loe lhe rudhenkane lhe. Nianna tti rákane:

―Unne ya'achu, ¿núnni rudhenna lu?

Lhe anágaba ka nu rise'e gweyú ro'o yotuha ribeagabakana gi ro'e.

66 Pedro‑ni nna duna rre lali'a yo'o ge bixxudi xeniha, nianna tti ute ttu ka nuila riben sina lhe'e yo'oha, 67 nna tti bilen nuha Pedro‑ni dona kwe'e giha rutsa'ana, nianna belanni tseaxabana loni nna tti rana na:

―Iyágabalu danalhalu Jesús ge Nazaret‑ni.

68 Pedro‑ni nna labí uxí ro'oni nna rálana nuilaha:

―Deloxa, labí yua bí ge nuná rinnelu.

Nianna tti deyya Pedro‑ni eriana ro'o yo'oha [nna uresi tteba chinkaha].

69 Tti bedeláni nuilaha na attu libe, nianna redeana ka nu se'e niha:

―Nubiyú du nii, ttu ka nu danalhakana Jesús‑niba nuní.

70 Ttaka lana nna attu libe, labí bededí ro'oni. Nianna attu sattiruba nna ka nu se'e niha nna redeakana Pedro‑ni:

―Gwalíba lu ankalu ttu ka nu selalu nuná, kumu lu ankalu ge Galilea.

71 Lana nna rana:

―Gwalígatixa, labí ankabiati nubiyú rale‑na. Tata Do Yebáha ugwebie neti elha disa ganna abíba liiti.

72 Looraha nna bedebesi chinkaha attu libe. Nianna tti gwadú le Pedro‑ni nu ra Jesús‑ni na tti ree na: “Lanila kwesi chinkaha chupa libe, lu beyonna libela chi bedhea lelu abittu ridí ro'olu deki ankabienlu neti.” Nianna tti uresi tteba Pedro‑ni.