4
Juan‑ni bela'anie yebáha nna bilánie ka benne rudú xibike arlo Tata Do Yebáha
1 Iki de nuha nna tti bela'ati ttu puerta yebáha du yali‑na lhe biyienti tsi'i benne unnebie len neti sisi'a tteha. Idisaba biyienti tsi'e attiba riyieni ge ttu trompeta, benneha rabie neti:
―Ugwapi nii kini neti nna ule'enia lu iyá nu chi dabiga aka.
2 Looraha tteba nna bisia Espíritu ge Tata Do Yebáha latia. Tti yu'u Espírituha latia nna bela'ati xxila du yebáha do ttu benne rinnabie loni. 3 Benne dobie lo xxilaha raka galhabe ttiba raka íyya ragalha nu tee láni jaspe o nu tee láni cornalina, nna abi'iba ata doeha yeki ttu yetti lhaa raka galhabana ttiba íyya nu tee láni esmeralda. 4 Abi'iba ata do benne rinnabiaha se'e a ttaperua (24) ka xxila. Lo ka xxilaha nna sia ttaperua (24) ka benne benneola rinnabiagabake. Ka benneha nukuke xo sitsi nna yu'u ikike ka corona ge oru. 5 Ata du xxila do benne rinnabiaha, rapi edha lhe ru'u be lhe ratsa lhe. Arlo xxila ata doeha nna ralha iki gasi ka ya nalha gi. Ka ya nalha giha ankakana gasi ka espíritu rixúke lo sina ge Tata Do Yebáha. 6 Arlo ata doeha re ttiba ttu indatoo, iyya gwanaba raka loni de anka xxattana yaa.
Chubaa ata du xxila do benne rinnabiaha, abi'iba kwe'e xxilaha se'e ttapa ka nu anka bani. Lo kwe'ebakani sia xxatta iyya lokani. 7 Nu du sisi'a tteha ankana ttiba ttu beesi, nu berupaha nna ankana ttiba ttu gwirri, nu beyonnaha nna anka loni ttiba lo ttu benne, nu betapaha nna ankana attiba ttu bedhía diana lo be. 8 Iyába ttapa ka nuha, ttu ttukana sia xxupa xxupa xxilakani. Lo kwe'eba ka xxilakaniha sia xxatta iyya lokani nna bittuba rudú siikana, rela resába rinnekana rákana:
Tata Do Yebaa benne ankalu Xxanatu lhe benne ra tsitsi xxatta lelu lhe,
lu ankalu benne le'a lhe benne nari xú, labí tulha ruinlu lhe ankalu benne chi riesi lhe.
Lu ankalu benne dolu ttuha‑li lhe benne dolu nnanna lhe.
Anágaba ankagabalu benne dholu nu si daa lhe.
9 Ka nu anka bani ka nu rula'a ttiba rule'e ka nimalaha nna rugwekana ixkixaru benne doe lo xxila ata rinnabieha, delába benne dobie ttu dia liiha, nianna rákane: “¡Xxeniba ra lelu!” 10 Kua rábakana aníha, ttaperua (24) ka benneolaha nna riyetta ttebake rudú xibike arlo benne do ttu dia liiha nna rutsá loke bie. Nianna tti ribeake ka corona gekeha nna rudelhake ka nuha arlo benneha nna ráke bie:
11 Tata, benne ankalu Xxanatu lhe ankalu Xxudi do yebáha getu lhe,
lu ralhalu inná xxeni lelu,
lhe udú xibi ka benne arlolu lhe.
Anágaba ralhalu akalu benne inná tsitsi lelu lhe,
kumu kwinalu benlu iyá tte nu se'e,
lhe kwinalu uka lelu kini se'ekana lhe uka xxekana lhe.