1 Nianna bela'ati attu anjeli ra xxeni lebie ugwadie dabie yebáha. Abi'ibe rilhi bea nna daa ttu yetti lhaa ikie. Lobie nna raka galhaba ttiba raka lo tatubisa‑na nna ka ni'abie nna ankakana ttiba belha ge gi. 2 Den nábie ttu yetsi chika'a to du yali loni. Benneha bedú ni'a benbie lo indatooha nna ni'a yattie nna bedúe na lo yu bisiha. 3 Nianna tti uresi'abie idisa, betuxxue ttiba rutuxxu ttu beesi. Tti uresi'eha nna biyieni utsa gasi libe. 4 Iki de chi beyaka utsa gasi libeha, neti nna chi bedo tsea kini unia lo yetsi nu ra nu uyu'u beha. Nianna biyienti tsi'i ttu benne yebáha, ree:

―Ulu'uba lelu nu biyieninlu‑na, bittu udolu na lo yetsi.

5 Anjeli benne bela'ati du ttu lha'a ni'abie lo yuha lhe lo indatooha lhe, benneha ulhidha ná benbie yebáha 6 nna bedettie lá benne do ttu dia liiha, delába benne benie yiesi lo yu‑ni lhe yebáha lhe indatooha lhe iyá tte nu se'e lokani lhe. Benne do ttu dia liiha nuha bedetti anjeliha, tti ree:

―Eru Tata Do Yebáha, labíru isá riyasa chi tte aka nu teeki aka. 7 Ganna chi bisia sá iyieni tsi'i trompeta ukwesi anjeli benne gasiha, la'ania nna uin Tata Do Yebáha nu chi ga'ananie aka nu labí yu ka benne. Uinbe ttiba chi utixxi'anie ka benne bixúke lo sina geeha, delába ka profetaha.

8 Nianna tti bedeyienti tsi'i benne unne yebáha attu libe, rabie neti:

―Ugía nna bedaxxu yetsi yali loni nu den anjeli du ni'e lo indatooha lhe lo yu bisiha lhe.

9 Neti nna ugía ttebaa ata du anjeliha nna xpeye:

―Bete yetsi to‑na len neti.

Benneha nna rabie:

―Bedaxxu na nna uto na. Lhe'e tu'elu‑na tsanninlu sachena ilhá, ttaka ro'olu nna eyo'ona ixixxi tú ttiba nu xixxi ge biasera.

10 Nianna bedaxxua yetsi to yu'u lasi ná anjeliha nna tti utoa na, ixixxi túba beyo'ona ro'a ttiba nu xixxi ge biasera, ttaka iki de chi utoa nuha, ilhá túba gwachena lhe'e tu'ea. 11 Nianna rabie neti:

―Teeki kixxi'alu attu libe nu chi ga'anna sate ixe ka benne, delába nu sate iyá loo ka benne se'e lhe'e iyába ka yiesi se'e yiesi lo yu‑ni lhe ka benne rinneke iyá looba tisa lhe ka nu rinnabia ge yiesi lo yu‑ni lhe.