1 Nianna tti bela'ati benne anke Neru toha due iki i'iya nu tee láni Sión. Du lenie ttu gayua chua bixxi ttapa mili ka benne, delába ka benne dia lábie lo xeake lhe dia lá Tata geeha lhe. 2 Nianna tti biyienti tsi'i ttu benne unnebie yebáha, riyien tsi'e ttiba riyieni tti riginni idila inda lo ttu benunni lhe ttiba riyieni ata ru'u be tti ratsa idisa. Tsi'i biyientiha ankana ttiba riyien tsi'i ka arpa tti rudhesi ka benne loni. 3 Ka benneha rulhake ttu le'a kubi arlo xxila ata do benne rinnabieha lhe arlo ttapa ka nu anka baniha, delába ka nu rula'a ttiba rule'e ka nimalaha lhe arlo ka benneolaha lhe. Le'a rulhakeha, ni ttú benne labí aka gebie udhetie ulhe nuha, sunruba ka benne ttu gayua chua bixxi ttapa miliha (144,000), sunruba ka benneha gwaka geke ulhake le'aha, delába ka benne chi bodilaa Tata Do Yebáha lagwi ge ka benne se'e yiesi lo yu‑ni. 4 Ka benneha nuha lanú nuila use'e lenke. De nuha nna ankake nari xú. Lake nuha danalhake benne anke Neru toha gaxaba die. Ka benne‑ni nuha chi uláke lagwi ge ka benne se'e yiesi lo yu‑ni. Lake ankake attiba ttu úna sisi'a tte uxí Tata Do Yebáha lhe uxí benne anke Neru toha lhe. 5 Labí gwen lasi unneke lhe labí tulha dáke arlo Tata Do Yebáha lhe.

6 Nianna tti bela'ati attu anjeli diabie ridúe gwetsáli, chebie ka tisa tse, delába ka tisa ka nu ttu dia liiba ixú nu ráke. Chebie ka tisaha kini kixxi'anie iyá looba ka benne se'e lhe'e iyába ka yiesi se'e yiesi lo yu‑ni lhe ka benne rinneke iyá looba tisa lhe. 7 Anjeliha rinnebie idisa, ree:

―Gwaltsia lele Tata Do Yebáha lhe gwaluni kini inná xxeni lebie kumu nnanna chiba bisia sá unie elhuxtisi. Gwaludú xibile arloe. Benneha benie yebáha lhe yiesi lo yu‑ni lhe, bengabe indatooha lhe ka dina ata sia ka inda‑na lhe.

8 Nianna danalha anjeli berupaha nna ree:

―Chiba use'e loo Babilonia nu ra xxeni leniha, kumu lana nuha beketina nu satsa ruinnaha ka benne se'e lhe'e iyába ka yiesi se'e yiesi lo yu‑ni, delába bele'enna ke bedhá ikike Tata Do Yebáha nna bedú xibike arlo ka diosi, ka nu subi subi.

9 Nianna danalha anjeli beyonnaha nna unnebie idisa, ree:

―Ganna nuxa udú xibini arlo nimala biria lhe'e indatooha lhe arlo mentu geniha lhe, anágaba nna ganna dhielhana tsu'u seña ge nuha lo xeani o si náni, 10 nuha dhígabana elha disa tsitsi ugwe Tata Do Yebáha na kumu de risa'a xxattanie, delába sate xxattana xxuana lo giha lhe xxuana lo azufreha itena arlo ka anjeli banani Tata Do Yebáha lhe arlo benne anke Neru toha lhe. 11 Ka nu udú xibikani arlo nimalaha lhe arlo mentu geniha lhe iyába ka nu tsu'u seña ge lániha latikani, ka nuha ttu dia liiba tsapi seni gekani de ritekana. Labí edí lekani, rela resába uyúkana elha disa tsitsi.

12 Laxkala ka benne chi ankake ge Tata Do Yebáha; delába ka benne rudoke tisa ge nu rabie ke uinke lhe abittu rudhanke ria leke Jesús‑ni lhe, ka benneha teeki tse'e tsitsike lo neda geeha.

13 Nianna tti biyienti tsi'i ttu benne unnebie yebáha, ree:

―Ben lo yetsi‑na: “Debá nnanna lhe nu si daa lhe, karubáru ka benne se'e lenke Jesucristuha ganna chi uttikeha.”

Espíritu ge Tata Do Yebáha nna bekabie ree:

―Gwalí galá karubáruke, kini eyaka leke ge sina chi benke kumu nu tse benkeha nuha runna liina gasina uka elha ruin geke.

14 Nianna tti bela'ati ttu bea sitsi túba ankana. Iki beaha nna do ttu benne rule'ebie ttiba rule'e benne daa yebáha, yu'u ttu corona ge oru ikie lhe denie ttu iyyarsela ria tutsa ro'oni. 15 Lhe'e yotu do yebáha nna biria ttu anjeli unnebie idisa ree benne do iki beaha:

―Bedaxxu iyyarsela gelu‑na nna uta'a gwetsela kumu chiba bisia ura eyatsa xuaha, kumu lena tee yiesi lo yuha chiba anka ge benneha exúe.

16 Benne dobie iki beaha nna bega'abie iyyarsela geeha yiesi lo yuha nna bedíbie lena tee loni.

17 Nianna tti bederia attu anjeli lhe'e yotu do yebáha, dengabe ttu iyyarsela ria tutsa ro'oni 18 nna biriagaba attu anjeli lo bekúha, delába benne bananie gi re lo bekuha. Benneha unnebie idisa ree benne den iyyarsela ro'o tutsaha:

―Bedaxxu iyyarsela tutsa gelu‑na nna uchú nu xixxi ge ka ya uva daa yiesi lo yuha kumu ka uvaha chiba raa ka nuha.

19 Nianna bega'a anjeliha iyyarsela geeha yiesi lo yu‑ni nna uchúbie nu xixxi ge ka ya uva daa loniha. Nianna tti bedelhe ka nuha lhe'e ttu xieru xeni ata idí ka uvaha. Nu benieha raxxína na len elha disa tsitsi ugwe Tata Do Yebáha ka benne ben satsa. 20 Ka uvaha bidíkana ro'o yiesiha nna lhe'e xieru ata bidíkanaha nna biria reni axtaba ttu yoo xeni ukana. Debá ata ru'u frenu ro'o ka kwayu‑na risia reni ge yooha nna de biria idila reniha nna axtaba tsunna gayua (300) kilómetru bexunnina.