19
Ka benne se'e yebáha rulhake ge Tata Do Yebáha
1 Iki de nuha nna tti biyienti tsi'i ixe juisiru ka benne se'eke yebáha, rinneke idisa, ráke:
¡Aleluya!
Tata Do Yebaa getu, kwinalu rodilálu ri'itu lhe ra xxeni lelu lhe,
anágaba ankalu benne ra tsitsi lelu lhe.
2 Lu ruinlu elhuxtisi ttiba ankaba geni lhe nu ankaba gwalí lhe,
kumu chiba berixxi bekinnilu nuila ra xxeni leni nu rutto'o latiniha, delába yiesi Babiloniaha.
Lana len nu satsa bennaha bennittina ka benne se'e yiesi lo yuha, delába bele'enna ke ki bedhá ikike lu nna bedú xibike arlo ka diosi ka nu subi subi,
lhe chigaba bokixalu na reni ge ka benne bixúke lo sina geluha, delába ka benne bettinaha.
3 Nianna tti bedennee ka benne se'e yebáha attu libe, ráke:
―¡Aleluya! Yiesiha ttu dia liiba dho seni geni itena.
4 Ttaperua ka benneolaha lhe ttapa ka nu anka baniha, delába ka nu rula'a ttiba rule'e ka nimalaha, ka benneha lhe ka nuha lhe bettudhi loke lo yu nna betsá loke arlo Tata Do Yebaa benne dobie lo xxila ata rinnabieha, nianna ráke:
―¡Amén! ¡Aleluya!
5 Nianna ata du xxila rido Tata Do Yebáha rinnabie, niha biria tsi'i ttu benne rinnebie ree:
Iyále ka benne rixúle lo sina ge Tata Do Yebaa geri'i‑ni,
lhe iyále ka nu tee elha rasi gele lenie lhe,
sila ankale nu ra xxeni leni lhe sila ankale nu abittu ra xxeni leni lhe,
gwalinne gwalinná: ¡Xxeni ra le Tata Do Yebaa geri'i‑ni!
6 Biyiengabati tsi'i attu benne unnebie. Riyien tsi'ibie attiba riyieni tti rinne ixe juisiru ka benne lhe ttiba riyieni tti riginni idila inda lo ttu benunni lhe. Anágaba riyiengaba tsi'e ttiba riyieni tti ru'u be tti ratsa xxatta. Benne unneeha, ree:
¡Aleluya!
Kumu Tata Do Yebaa geri'i‑ni, benne‑ni ra tsitsi xxatta lebie lhe benne‑ni anke Xxanari'i lhe,
benne‑ni chi rinnabie.
7 Odú itta leri'i lhe edeakinri'i lhe, anágaba innágabari'i: “Xxeni ra le Tata Do Yebaa geri'i‑ni”,
kumu chiba bisia sá utsá ná benne anke Neru to‑ni.
Nuila dhieha chiba du tse nuha.
8 Chiba uxí nuha lo neda kini ukuna ttu xo tseru,
lhe ttu nu raka galha loni lhe ttu nu nari xú lhe.
Xo sibi uku nuilaha raxxína na len nu tse ruin ka benne chi ankake ge Tata Do Yebaa geri'i‑ni.
9 Nianna tti ra anjeliha neti:
―Ben lo yetsi uná: “Karubáru ka benne biyaxike ki goke elho tse tee lo dha'a ge benne anke Neru to‑ni.”
Nianna raru anjeliha neti:
―Ka tisa rigixxi'iaya‑ni gwalíga ankake ge Tata Do Yebáha.
10 Nianna tti bedú xibia arloe ki utsá loa bie, ttaka benneha nna ree neti:
―¡Bittu uinlu aná! Arlo Tata Do Yebáha‑la bedú xibilu, kumu neti ankagabaa benne rixúa lo sina ge Tata Do Yebáha ttiba lu lhe ttiba adíru ka benne raka betsi to geluha lhe, delába ka benne rudaxxu tsitsike nu utixxi'a Jesús‑ni. Kumu ka tisa utixxi'a Jesús‑ni, ka benneha nuha rudaxxu ni'a ka benne kini rigixxi'ake nu ra Tata Do Yebáha.
Benne doe kwe'e kwayu sitsiha
11 Nianna tti biláti du yali yebáha nna bela'ati uka xxe du ttu kwayu sitsi. Benne doe kwe'e nuha tee lábie Benne Abittu Runnitti Tisa Gebie lhe Benne Runi Nu Anka Gwalí lhe. Benneha ritilhe attiba ankaba geni lhe runie elhuxtisi attiba ankaba geni lhe. 12 Ka iyya loeha ankakana ttiba belha ge gi nna ikie nna yu'u ixe ka corona. Lo xeabie nna dia lá ttu benne, ttu lá nu lanú nu yuna bixa dien nuha innána, sunruba labie gwa yue. 13 Ka xo nuku benneha anka xxattakana reni nna tee lábie Tisa Ge Tata Do Yebáha. 14 Ka benne se'e yebáha nna danalhake benneha siake kwe'e ka kwayu sitsi, diake ttiba ka nu dia utilha. Ka lari nuku ka benneha ankakana tseru lhe sitsi tú lhe nari xú lhe. 15 Ro'o benne do kwe'e kwayuha riria ttu espada ria tutsa ro'oni, kini len nuha unie gwe ka benne se'e lhe'e ka yiesi se'e itúba yiesi lo yu‑ni nna tsitsiba innabie kana. Benneha udhake kana attiba ttu nu ridhí uva lhe'e xieru ata ridí ka uva, delába ugwebie kana elha disa tsitsi. Elha disa ugwebie kanaha ankana elha rise'iki ge Tata Do Yebaa benne ra tsitsi xxatta leha. 16 Lo lari nukueha nna daka lo xiche dia ra: “Nu Loni Ge Iyá Ka Nu Rinnabia lhe Xxana Ka Nu Ra Xxeni Lekani lhe.” Ka tisa‑ni nuní anka lábie.
17 Nianna tti bela'ati ttu anjeli dubie lo tatubisa‑na nna unnebie idisa uxie iyába ka nu sia xxilakani reki gwetsá ka nu rokana bela. Ree ka nuha:
―¡Gwaltá, gwalitupa ki gole elho tse rute Tata Do Yebáha! 18 Gwaltá kini gole bela ge ka nu rinnabia‑na lhe bela ge ka nu rineru arlo adí ka soldadu‑na lhe. Gwaltá ki gole bela ge ka nu ra tsitsi lekinna lhe bela ge ka kwayu‑na lhe anágaba bela ge ka nu ribiakana kwe'e ka nuná lhe. Gwaltá kini gole bela ge iyába ka benne: sila ka benne to'oke lo sina ge ka xxanake o sila ankake benne reki lhaa lhe sila ankake ka nu abittu ra xxeni lekani lhe sila ankake ka nu ra xxeni lekani lhe.
19 Nianna tti bela'ati nimala biria lhe'e indatooha lhe ka nu rinnabia se'e yiesi lo yu‑ni se'ekana len ka soldadu gekaniha. Ka nuha chi tupakana ki itilha lenkana benne doe kwe'e kwayuha lhe ka benne geeha lhe. 20 Ttaka nimala biria lhe'e indatooha biyaxxubana itupa lenna nimala biria lhi'u yuha, delába nimala nu labí liinna ankana profeta ge Tata Do Yebáha, nu bengabana ixe loo ka milagru arlo nimala biria lhe'e indatooha. Len ka milagru ben nimala biria lhi'u yuha uxí yiena ka benne ki uxielhake uyu'u lo xeake seña ge nimala biria lhe'e indatooha lhe uxí yiena ke kini bedú xibike arlo mentu ge nimala biria lhe'e indatooha lhe. Ixpaba ka nimalaha anka benbakana biru'unakana lo gi bartoha ata rite azufreha. 21 Adí ka benne danalhake nimala biria lhe'e indatooha uttibake len espada riria ro'o benne doe kwe'e kwayuha nna ka nu sia xxilakani reki gwetsáha nna beyiela súbakinna utokana bela ge ka benne betti benneha len espada geeha.