9
Tata Do Yebáha uxie ka benne Israel‑ni
1 Neti kumu de ria lasia Cristuha, de nuha nna rinnebaa nu ankaba gwalí; labí ruin lasia. Anágaba Espíritu ge Tata Do Yebáha rágabe neti deki gwa rinnebaa nu ankaba gwalí. 2 Neti yalhá si'i du lasia lhe satíaba rudúna neti 3 ge ka benne kia, delába ka benne Israel‑ni, axtala rakati meskila neti ibixxi iginnia arlo Tata Do Yebáha lhe meskila iriesia Cristuha ganna ttixka, kini aníha nna ni kina gaa gwalába ka benne kia. 4 Kumu lake nuha bedí Tata Do Yebáha ke kini akake xi'inie
lhe lake nuha bela'anie nu xxeni ra leeha lhe.
Anágaba len lagabake nuha bodha'ane tisa rabie ke deki unie kini saría tsena ke,
lhe lagabake nuha begwebie ke bia bennabi geeha lhe.
Anágaba len lagabake nuha bodha'ane kini ulhake gebie,
lhe lagabake nuha ree ke deki ugwebie ke ttu nu tse.
5 Anágaba lagabake nuha datiake ka benneola getu use'e itú ttuha, delába ka benne ukake xuttotuha
lhe anágaba Cristuha, atti ulie yiesi lo yu‑ni, ka nu Israel‑nigaba nuha datiabie.
Cristuha ankagabe Diosi rinnabie iyá tte nu se'e lhe satíaba ra xxeni lebie lhe. Amén.
6 Nianna, ¿si innári'i deki labíru uin Tata Do Yebáha nu chi rabie ka nu Israel‑ni deki unie? ¡Ko'o! Gwin galábie nu chi reeha. Deba nna labí iyá ka benne datiake benne uka xuttotuha, delába benne utta lábie Israel, labí gwalíga iyá ka benneha ankake nu Israel, delába labí iyáke ankake ge Tata Do Yebáha. 7 Nigaba laa de datiagake Abraham‑ni nna innári'i deki iyáke gwankake xi'ini Abraham‑ni, sinuki sunruba ka benne bija Isaac‑ni nuha gwankake xi'inie. Kumu Tata Do Yebáha ree Abraham‑ni: “Isaac‑ni ujana ka benne udaxxuke tialu.” 8 Laxkala ka benne datiake Abraham‑ni, labí de datiake benneha nna innári'i deki chi ankake xi'in Tata Do Yebáha. ¡Ko'o! Sunruba ka benne selake lhe'e nu chi ra Tata Do Yebáha deki utebie ge Abraham‑ni, sunruba ka benneha gwakake xi'inie. 9 Kumu Tata Do Yebáha tti bodha'an tsitsi tisa gebie len Abraham‑ni, la'ania rabie na: “Attu ida ttinná edetaa attu libe, la'ania nna Sara‑na chi tee xi'inni.”
10 Anágaba laa sunruga nuha uka, sinuki anágaba Rebeca‑ni bijagabana kwachi, delába ka xi'in Isaac benne uka xuttotuha. 11-13 La'ania atti lanila gali ka nutoha lhe atti lanila uin ka nuha nu tse lhe nu satsa lhe, la'aniali chi unne Tata Do Yebáha rabie Rebeca‑ni: “Nu xxeni‑na ixúna lo sina ge nu gwexxa‑na.” Ukaba attiba raba lo ka yetsi ge Tata Do Yebáha tti ree: “Jacob‑ni ukati geni nna Esaú‑ni nna labí ukati geni.” Aníha uka ki gwado tisa deki Tata Do Yebáha raxie lo neda gebie ka benne rakaba lebie gaxie. Labí raxie ke de chi benke bixa nu tse, sinuki de redába lebie nna raxie ke.
14 Nianna, ¿bíla anka nu innári'i ganna? ¿Si innábari'i deki labí nu dika ixú anka nu ruin Tata Do Yebáha? ¡Ko'o! Labí dika innári'i aná. 15 Kumu Tata Do Yebáha rabie Moisés‑ni: “Neti satuaba lasia benne rakaba lasia satua lasia lhe esi'ibati benne rakaba lasia esi'iti lhe.” 16 De nuha nna labí de ri'i raka leri'i nna gwa ratua le Tata Do Yebáha ri'i, nigaba labí de ri'i ruinri'i doelha nna gwa ratua lebie ri'i, sinuki labe redá lebie kini ratua lebie ri'i. 17 Kumu Tata Do Yebáha lo ka yetsi geeha unnebie ree Faraón‑ni, delába Faraón nu unnabiana Egipto‑ni ttuha. La'ania rabie na: “Neti bodúa lu kini akalu nu rinnabia. Ixúti lu kini ule'elu nu xxeni ra lasia. Aníha kini iyá ka benne se'e yiesi lo yu‑ni uinbiake nuxa ankaa.” 18 De nuha nna Tata Do Yebáha ratuaba lebie ka benne rakaba lebie satua lebie nna ka nu raka lebie uin tsitsie lastokani kini abittu tsia lekanie, ka nuha nna ruin tsitsibe lastokani.
19 Ttaka lebi'i nna innaba tisale neti, innále: “Ki ganna abittuba bixa aka geri'i gari'i Tata Do Yebáha, ganna aníha nna, ¿beakala sa rudelhabe yua kwe'eri'i ge nu ruinri'i ganna?” 20 Neti nna upeya le xa lena kia, ¿nú ankale nna lebi'ila gale Tata Do Yebáha bixa anka nu unie? Kumu ttibanka yedhu yuha, laa gwakaga geni gana nu benna naha: “¿Beaka aníla benlu neti?” 21 Kumu nu ruin yedhuha, gwakaba geni uinna len yunaha nu rakaba leni. Gwakaba geni la len yunaha‑ba uinna ttu lo irsina nu ule'e latsitoru, anágaba nna gwakagaba geni uinna attu nu abittu anka latsitoru. 22 Anágaba Tata Do Yebáha, ganna ttixka uka lebie gwa ukaba gebie bele'enie ka benne elha rise'iki geeha lhe gwa ukagaba gebie bele'enie ke nu tsitsi ra leeha lhe. De nuha nna gwa betto bechíabe abittu bi bedhake ka nu ralhakana tse'e lookana 23 nna ka benne chi gwatua leeha, delába ka benne chi ga'ananie deki edí baake nu tse uteeha, ka benneha nna gwa bela'abanie ke nu xxeni ra leeha, 24 delába ka benneha nuní ankari'i, kumu laa suna ka nu Israel‑niga uxie, anágaba uxigabe ka benne abittu ankake nu Israel. 25 Benbe attiba rabie lo yetsi bodha'ana profeta Oseas‑ni. Lo yetsiha ree:
Ka nu abittula ankakana nu lhe'esi kiaha, ka nuha‑la upeya kana: “Lebi'i ankale nu lhe'esi kia”
nna ka nu abittula rakati gekaniha nna ka nuha‑la upeya kana: “Lebi'i rakati gele”
26 nna ka nu se'e lo yu ata rabie kana: “Lebi'i labí ankale nu lhe'esi kia”,
niha‑gaba nuha gabie kana: “Lebi'ila gatta lále xi'ini Tata Do Yebaa benne anka baniha.”
27 Ka nu Israel‑ni nna utixxi'agaba Isaías‑ni gekani, rana: “Meskiba ixe juisiru ka nu Israel‑ni raka, meskiba rakakana ixe juisiru ttiba yuxi re ro'o indatoo, ttaka sunruba ttu chupakana godilaa Tata Xisiha, 28 kumu benneha labíru kwede, chi tteba unie elhuxtisi ge ka nu se'e yiesi lo yu‑ni.” 29 Aníha‑gaba unne Isaías‑ni ttuha, rana:
Ganna ttixka Tata Xisiha benne ra tsitsi leeha,
ganna ttixka benneha abíba bodha'ane ttu chupa ka benneola geri'i,
la'ania nna bise'e loobari'i ttiba bise'e loo lhe'esi Sodoma‑ni lhe Gomorra‑ni lhe.
Ka benne Israel‑ni labí ugía leke Cristuha
30 Nianna, ¿bíla anka nu innári'i ganna? ¿Laaba ganna ka nu abittu ankakana nu Israel, delába ka nu labí regu'elha lekani uinkana kini abitturu yua ujakana ge nu ruinkana, laaba ganna ka nuha‑la nuha de ugíaba lekani ge Tata Do Yebáha, de nuha‑ba nna benie kini abitturu yua ujakana ge nu ruinkana? 31 Ttaka ka nu Israel‑ni nna ukalakinna deki de udobakana tisa ge bia bennabi bodha'an Tata Do Yebáha len Moisés‑ni, de nuha‑ba nna abitturu yua ujakana ge nu ruinkana, ttaka nna labí udaakana. 32 Nianna, ¿beakala a udaakana ganna? Labí udaakana kumu de labí bexxen lekani deki Tata Do Yebáha kuabie yua kwe'ekani, sinuki bexxenla lekani deki de uinbakana latsiru, de nuha‑ba nna gwadaakana abitturu yua ujakana ge nu ruinkana. De nuha nna bichekubakana iki íyya nu berixxina kanaha. 33 Gwatebakana attiba raba lo ka yetsi ge Tata Do Yebáha tti ugwettinie unnebie ge Cristuha ree:
Lhe'esi Sión‑ni udoa ttu íyya.
Nuha uinna kini icheku ka benne ikini nna urixxina ke.
Ttaka benne guxxenba lebie ge íyyaha, benneha labí elhittu ugwe íyyaha bie.