8
Canaladxi Saulo ca xpinni Cristu
1-2 Uyuula'dxi Saulo ni bi'ni cani biiti laabe que. Peru undisa caadxi hombre cha'hui laabe, bicaachi ca laabe, ne biina né ca laabe. Ne dede dxi que bizulú uzabi nanda cabe ca xpinni Cristu ndaani guidxi Jerusalén ne bireeche ndase ca', ni uyé Judea ni uyé Samaria. Ca apóstol si, qué niree. 3 Ucala'dxi Saulo nunduuxe irá ca xpinni Cristu. Uzá yoo pur yoo ulee laacabe, hombre ne gunaa, ne biseguyoo laacabe.
Ra yendá stiidxa Cristu Samaria
4 Peru cani bireeche que, irá ladu ze ca', ziyuí' ca stiidxa Cristu, 5 casi Felipe uyé ti guidxi de Samaria ne byuí' né ca binni que stiidxa Cristu. 6 Bidxiña irá binni que bicaa diaga laabe ne biiya ca ca milagru ni bi'ni be. 7 Purti nuu stale binni raqué riguite binidxaba ique ne bicaa ca binidxaba que ridxi ra biree ca'. Ne bianda stale cani ma guti galaa, ne ñee chiita. 8 Ne nabé bieche ca binni guidxi que.
9 Uyuu tobi hombre lá Simón ndaani guidxi que. Chiqué uca be magu, ne bidxagayaa ca binni neza que irá ni bi'ni be, ne gudxi be laaca nandxó' be. 10 Ne irá ca bicaa diaga ca laabe, dede cani huaxié' risaca para cani jma risaca, na ca':
―Ndi nga enda nandxó' sti Dios.
11 Bicaa diaga ca laabe purti ma xadxí caguite be laaca ne irá brujería ni runi be. 12 Peru dxi ma bini cre ca ni byuí' né Felipe laaca de enda runi mandar sti Dios ne de Jesucristu la? uyuu nisa ca', hombre ne gunaa. 13 Laca bini cre Simón ne uyuu nisa. Ne ma qué niladi ru cue' Felipe. Ne nabé bidxagayaa ra bi'ya irá seña ne milagru cayaca que.
14 Ora gunna ca apóstol ni nuu Jerusalén ma bini cre binni Samaria stiidxa Dios la? biseenda ca Pedru ne Juan ra nuu cabe. 15 Casi yendá Pedru ne Juan raqué unaba ca lu Dios udii Espíritu Santu laacabe. 16 Purti nin tobi de laacabe ca'ru icaa cabe Espíritu Santu, nin ca'ru ganna cabe pa nuu be, sínuque uyuu nisa si cabe ra bini cre cabe Cristu. 17 Ne udixhe ná Pedru ne Juan luguiá cabe para ucuaa cabe Espíritu Santu.
18 Ora bi'ya Simón quixhe ná si ca apóstol luguiá ca binni que maca zicaa ca Espíritu Santu la? ucala'dxi nudii vueltu laacabe, 19 na:
―Latané naa enda nandxó' ca, ti tutiica quixhe naya luguiá' maca zicaa Espíritu Santu.
20 Para na Pedru rabi laabe:
―Initilú neu vueltu stiu'. Nee nou' zanda sí cabe enda nandxó' sti Dios la? 21 Qué zanda chu' lu lade du ne qué zanda gu'nu dxiiña ni cayuni du ri' purti cadi jneza ni cá ique lu nezalú Dios. 22 Bisaana ni cá ique lu ca ne unaba perdón Dios tila na guni perdonar lii de ni uní' i'cu ca. 23 Purti ruuya dxá envidia ndaani ladxidó' lo' ne cá lu yaga lu ná enda ruchee.
24 Oraque na be:
―Lainaba lu Dios pur naa ti cadi gueeda irá ni na tu ca luguia'ya'.
25 Biluxe byuí' né si cabe binni irá ni bi'ya cabe bi'ni Señor la? bigueta cabe Jerusalén. Ne irá guidxi sti Samaria ra zidi'di cabe, ziyuí' cabe stiidxa Cristu.
Felipe ne ti hombre de Etiopía
26 Ti dxi na ti ángel sti Dios rabi Felipe:
―Biaa uyé guete', neza zeeda cabe de Jerusalén ze cabe Gaza, lu neza cá ndaani gui'xhi que.
27 Para biree be ze be. Neza ze be que yeugaanda be ti hombre de Etiopía, ti eunuco, tobi ni risaca lade ca xpinni reina Candace. Rapa be xpidxichi reina que. Uyé be Jerusalén, yeusisaca be Dios. 28 Yanna ma zibí' be, ze be ndaani ti carretón ziyuunda be ni bicaa profeta Isaías. 29 Ne na Espíritu Santu rabi Felipe:
―Bidxiña carretón ca.
30 Para bidxiña Felipe ne bina diaga cayuunda be ni bicaa profeta Isaías, para na rabi laabe:
―Rie'nu gou' ni cayuunda lu ca.
31 Oraque na be:
―Ximodo ndi guiene' pa iruti tu usiene naa.
Ne gudxi be Felipe quiba cui né laabe raqué.
32 Ndi nga ni na Xqui'chi Dios ra cayuunda be que:
Yené cabe laabe casi riné cabe dendxu ra chi gati,
ne casi qué ribidxiaa dendxu huiini ora ugá cabe guicha ladi,
zaqueca nin ti diidxa qué niní' be.
33 Gupa cabe laabe casi ni qué risaca
ne bidxiiba cabe donda ique be sin ñuni be gasti'.
Iruti qué zuzeete cani za de laabe
purti biluxe xpida be ndaani guidxilayú.
34 Para na eunuco que, rabi Felipe:
―Gudxi naa tu cuzeete profeta Isaías rarí', de laca laa la? o de stobi.
35 Para bizulú né Felipe ni cayuunda be que ne bisiene laabe stiidxa Cristu. 36 Neza ze cabe que, zidi'di cabe ti ra da' nisa. Para na be:
―Rarí' da' nisa. Ñee qué zanda chuaa ni'sa la?
37 Para na Felipe:
―Zanda, pa runi cre lu de idubi ladxidó' lo'.
Oraque na be:
―Rune cre Jesucristu nga Xiiñi Dios.
38 Oraque bicueza dxí be carretón que ne biete iropa cabe ndaani nisa, para uluu nisa Felipe laabe. 39 Ra biree cabe ndaani nisa ucuaa Espíritu sti Dios Felipe ziné. Ma qué ñuuya ru be laa. Oraque biree be ze be nayeche'. 40 Mala biiya Felipe ma nuu ndaani guidxi Azoto ne uzá byuí' stiidxa Cristu ndaani irá guidxi dede yendá Cesarea.