STIIDXA JESUCRISTU NI BICAA SAN LUCAS
1
Xiñee ucuá gui'chi ri'
Stale tu huacaa irá ni uca lade du, irá ni bi'ni Jesús. Laadu qué nidu'ya du ni, peru cani byui' né ni laadu la? biiya ca dede dxi bizulú Jesús xhiiña', ne ucané ca bireeche stiidxa be. Naa laca huanaba diidxa chaahue dede ra bizulú ni, ne zuluá' galán ucaa ni lú lu, Teófilo xhamigua', ti guiene chaahui lu ni ma bisiidi cabe lii.
Ra uni' né ti ángel Zacarías
Dxi naca Herodes rey de Judea nuu ti sacerdote lá Zacarías, nuu be lade grupu sti Abías. Elisabet lá xheela be, ne laa laca za de xfamilia sacerdote Aarón. Iropa cabe nacha'hui cabe nezalú Dios, ne ruzuuba pe cabe stiidxa'. Ma nagola cabe ne qué gapa cabe nin ti xiiñi cabe, purti qué ñanda ñapa Elisabet ba'du'.
Ti dxi guca caber grupu sti Zacarías guni dxiiña nezalú Dios. Costumbre sti ca sacerdote la? tu guiaba suerte luguiá ngue nga cu' gu'xhu ndaani yu'du ro'. Bia'si pe luguiá Zacarías biaba ni dxi que. 10 Ne laga caguu be gu'xhu ndaani yu'du que, rí jma binni fuera, caní' né Dios. 11 Ndaani yu'du que nuu be, mala bizuhuaa ti ángel sti Dios ladu derechu sti altar ra riuu gu'xhu que. 12 Nabé bidxibi be ora bi'ya be ángel que dede qué idxela be xi guni be.
13 Peru na ángel que, rabi laabe:
―Zacarías, cadi idxibi lu', purti ma bigaanda stiidxa lu lu Dios. Yanna chi gapa Elisabet xheela lu ti xiiñi', ne cuee lá lu badu huiini que Juan. 14 Zadxá tipa ladxidó' lo de enda nayeche', ne stale tu zieche ora gale be. 15 Nabé nandxó' zaca be nezalú Dios, ne qué zagaa ruaa be vinu ne nin ti clase nisa dxu'ni'. Dede ante gale be maca dxá ladxidó' be de Espíritu Santu. 16 Zudxigueta be stale judíu ra nuu Señor Dios sti ca'. 17 Zazá niru be lú Señor, ne laabe zeda aca be casi Elías purti zapa be Espíritu sti Dios casi gupa Elías ne laca zaca be nandxó' casi uca Elías. Zaguu né be binni xiiñi tobi si, ne zucuudxi be ladxidó' cani naguidxi ladxidó' para uzuuba ca diidxa'. Zacá nga quixhe chaahui be binni para dxi gueeda Señor.
18 Oraque na Zacarías rabi ángel que:
―Ximodo ganna dxandí zaca ni caya'bu naa ri ya', purti ma nayooxhua' ne xheela laca ma nayooxho'.
19 Para na ángel que:
―Naa nga Gabriel, rune xhiiña Dios. Laa biseenda naa gueda tidxe lii ca diidxa sicarú ri'. 20 Yanna zieegu ruaa lu', ne qué zanda iní' lu dede ora ma gule badu huiini que, purti qué ñuni cre lu ni gudxe lii ca. Peru zaca ni, ganda si xhi ni.
21 Cadxagayaa ca binni rí fuera que xiñee nabé candaa Zacarías ndaani yu'du'. 22 Ora biree be bidxiña be ra nuu ca binni que, qué ñanda niní' né be laaca', sínuque puru seña bi'ni be lú ca' purti ma biaana be mudu. Oraque bidii ca cuenta biluí' Dios laabe xiixa ndaani yu'du que.
23 Bizaa si dxi nexhe guni be dxiiña ndaani yu'du', biree be zibí' be. 24 Qué nindaa de ngue uca xiiñi Elisabet ne biaana ndaani yoo gaayu beeu, ne na:
25 ―Bi'ni Dios ndi naa ti ma cadi iní' binni naa.
Bidxiña ti ángel ra nuu María
26 Lu xhoopa beeu de naca xiiñi Elisabet biseenda Dios ángel Gabriel ndaani ti guidxi lá Nazaret de Galilea, 27 ra nuu ti badu dxaapa lá María ni ma yenaba ti hombre lá José laa para ichaganá'. Za José de lade xfamilia David. 28 Ora biuu ángel que ra nuu be bigapa diuxi laabe ne na:
―Ma ulí Dios lii, María. Dichosa lii lade irá xixé gunaa.
29 Nabé bidxagayaa be ni gudxi ángel que laabe, ne candaa ique né be xiñee bigapa diuxi laabe zaqué. 30 Para na ángel que:
―Cadi idxibi lu, María. Ma uluu Dios ndaaya lii. 31 Chi aca xiiñi lu' ne zapu ti badu huiini'. Cuee lá lu laabe Jesús. 32 Zaca be nandxó' ne zabí cabe laabe Xiiñi Dios ni nuu ibá'. Ne zucuí Dios laabe de rey ra gurí bixhoze gola be David. 33 Zaca be rey sti irá cani za de Israel, ne qué ziuu dxi guiasa be. Qué ziuu dxi guiaana dxí be de guni mandar be.
34 Para na María rabi ángel que:
―Ximodo zanda gaca ndi ya', purti binni dxaapa naa.
35 Oraque na ángel que rabi laabe:
―Zeeda Espíritu Santu luguiá lu' ne zutaagu enda nandxó' sti Dios lii. Nga runi zaree chu badu huiini ca para Dios, ne zabi cabe laa Xiiñi Dios. 36 Laca ma naca xiiñi Elisabet lisaa lu', neca ma nagola. Na nda cabe qué zanda gapa be ba'du', peru ma ze be xhoopa beeu de naca xiiñi be. 37 Purti para Dios gasti ni nagana.
38 Oraque na María:
―Rarí nuaa para gune ni na Dios. Zaa gaca casi nou' ca.
Nga si bina diaga ángel que, biree ze'.
Ra yeganna María Elisabet
39 Ca dxi queca nagueenda biree María uyé ti guidxi huiini de Judea, nuu lade dani. 40 Ora yendá be ralidxi Zacarías biuu be, bigapa diuxi be Elisabet. 41 Casi bina diaga Elisabet stiuxi be biniibi dxacha badu huiini que ndaani', ne bidxá ladxidó' Elisabet de Espíritu Santu. 42 Ne bicaa ridxi:
―Dichosa lii lade irá xixé gunaa ne dichoso badu huiini naca xiiñi lu ca. 43 Paraa biree razón gueda ganna jñaa Señor stinne naa. 44 Purti casi bina dia'ga stiuxi lu' biniibi badu huiini ri ndaane de enda nayeche'. 45 Dichosa lii ti bini cre lu', purti zaca ni gudxi Dios lii.
46 Oraque na María:
De idubi xhialma rusisaca Dios.
47 Ne rieche né ladxiduá' Dios ni beda ulá naa.
48 Nuaa para gune xhiiña be, ne qué risaca dia',
peru bilabi be naa.
Dede yanadxí irá xixé binni ibani ndaani guidxilayú zabi naa dichosa.
49 Purti cadi ni guiete chupa chonna gubidxa si
ndi ni bi'ni be luguia'ya'.
Nandxó' Dios, ne iruti ru casi laa.
50 Qué ziuu dxi guiaana dxí be de ilasela'dxi be cani ridxibi laabe.
51 Biiya pabiá' nandxó' ni bi'ni be:
Bicheche ndase be cani rudxiiba laca laa.
52 Undisa be cani ma naca tuuxa de ra zuba,
ne bidxiiba be cani qué rudxiiba laca laa.
53 Bichá tipa be ná cani candaana.
Bidxigueta be cani napa bidxichi nisi ná'.
54 Ucané be cani za de Israel, ca xpinni be,
ne bilasela'dxi be laaca',
55 casi bidii stiidxa be ca bixhoze gola canu, Abraham ne ca xiiñi',
ne irá xixé ni za de laa.
56 Zacá nga bisisaca María Dios, ne biaana né Elisabet bia' chonna beeu. Oraque ru bigueta ralidxi.
Ra gule Juan Bautista
57 Bizaa si xpeeu Elisabet beda gapa ti ba'du'. 58 Ora gunna ca xpecinu be ne ca lisaa be modo bilasela'dxi Dios laabe la? yeizaca ca laabe, ne bieche né ca laabe. 59 Lu xhono gubidxa guluu cabe seña sti Dios badu huiini que, ne ucala'dxi cabe nibee lá cabe laa Zacarías, lá bixhoze. 60 Peru na jñaa be co', iree lá be Juan.
61 Para rabi cabe laa:
―Xiñee, purti iruti lá Juan lade ca lisaa lu'.
62 Oraque bi'ni cabe seña bixhoze be tu racala'dxi cuee lá laabe. 63 Para unaba bixhoze be ti tabla ne bicaa: “Iree lá be Juan.” Bidxagayaa ca binni que. 64 Ne casi pe biluxe bicaa Zacarías nga, ma gunda uní' sti tiru ne bizulú bidii diuxquixe Dios. 65 Nabé bidxibi ca xpecinu cabe ora bi'ya ca ni uca que. Ne yendá diidxa que irá ca guidxi nuu lade dani de Judea. 66 Ne irá ni gunna ni, undaa ique né ni, na:
―Tu nda gueda aca badu huiini ri ya'.
Purti rihuinni dxichi nuu né Dios laabe.
Ni udixhe Zacarías
67 Oraque bidxá ladxidó' Zacarías bixhoze be de Espíritu Santu ne uní' ni gudxi Dios laa, 68 na:
Diuxquixe Señor, Dios sti ca binni Israel
saca beda ulá ca xpinni.
69 De lade cani za de David ni bi'ni xhiiña be,
ulee be tobi ni nandxó' para ulá laanu.
70 Ma xadxí bidii stiidxa be guseenda be laa.
Uní' be ni de ruaa ca profeta stibe ni uyuu chiqué.
71 Na be zulá be laanu de lu ná
cani nanala'dxi laanu ne cani cuxhii laanu.
72 Ne ziá be ca bixhoze gola nu,
ne zietenala'dxi be ni gudxi be laaca zuni be.
73 Nga nga ni gudxi be bixhoze gola nu Abraham zuni be.
74 Ne laca gudxi be laa zulá be laanu lu ná cani nanala'dxi laanu
ti ganda guni nu ni na be sin idxibi nu laaca',
75 ne ti ganda ibani nu nayá,
ne guiaana nu para laasi be bia' tiica dxi ibani nu.
76 Ne lii la? xiiñe huiine',
zaree lá lu profeta sti Dios ni nandxó',
purti zazá niru lu lu Señor,
ne zuni chaahui lu neza tidi'.
77 Zusiidi lu binni Israel ximodo ilá ca'
ne modo aca perdonar irá ni huachee ca'.
78 Purti nabé nadxii Dios laanu, riá laanu.
Nga runi zuseenda Xiiñi
casi ñaca nindani gubidxa para laanu,
79 para uzaani irá ni canazá lu guelacahui
ne ni nuu lu ná enda guti,
ne para udxii lú nu neza ra gata dxí ladxidó' no.
Nga nga ni bisiní' Espíritu Santu Zacarías.
80 Ze dxi jma ziniisi ba'du que ne jma zihuiini napa Espíritu sti Dios. Ndaani gui'xhi uleza be dede bidxiña dxi guni be xhiiña be lade ca binni Israel.