24
Ra bibani Jesús
(Mt. 28.1-10; Mr. 16.1-8; Jn. 20.1-10)
Domingo siadó' ro' ucuaa cabe irá ni gudixhe chaahui cabe que, uyé cabe ra ba', ne yené xcaadxi gunaa laacabe. Ne ora yendá cabe ma biduuba guie ye'gu ruaa ba' que. Para biuu cabe ndaani ba' que, peru ma cadi nexhe cuerpu sti Señor Jesús raqué. Raqué nuu cabe, qué idxela cabe xi guni cabe, mala biiya cabe zuhuaa chupa hombre cue' cabe, ruzaani xhaba ca'. Nabé bidxibi cabe ne bisaba ique cabe layú. Para na ca':
―Xiñee cuyubi tu ni nabani lade gue'tu'. Ma qué guinni di be rarí'. Ma bibani be. Laguietenala'dxi xi uní' be dxi nuu ru be Galilea, gudxi be laatu nexhe inaaze ca hombre malu Hombre Biseenda Dios para ucaa ca laa lu cruz, peru raguionna gubidxa zabani.
Oraque ru bietenala'dxi cabe dxandí uní' be ni. De ra ba' que biree cabe yetidxi cabe ni ca apóstol ne ca xcaadxi ni uzá né Jesús. 10 Cani yetidxi ca apóstol que nga María Magdalena ne Juana ne María jñaa Jacobo ne ca xcaadxi gunaa que. 11 Peru para laaca ruluí' enda huati si ni caní' cabe que, ne qué ñuni cre ca'.
12 Peru biasa uxooñe Pedru uyé ra ba' que, ne ora uluu lú ndaani ba' que, biiya ma lari gueela si nexhe raqué. Qué irá idxagayaa de ni uca que, biree zibí'.
Biiya chupa discípulu Jesús
(Mr. 16.12-13)
13 Dxi queca biree chupa de ca binni ni uzá né Jesús dxi canazá ru', ze ca Emaús, bia' once kilómetru de Jerusalén. 14 Ziyuí' ca irá ni uca ca dxi que. 15 Ne laga ziyuí' ca diidxa bidxiña Jesús ra nuu ca' ne ziné laaca'. 16 Peru neca biiya ca laabe, casi ñaca qué ñuuya ca', purti qué ñunibiá' ca laabe. 17 Ne na be rabi be laaca':
―Ruuya nabé triste nuu tu. Xii nga zeda yuí' tu neza.
18 Para na tobi de laaca', lá Cleofas, rabi laabe:
―Irá binni nanna xi uca ndaani guidxi Jerusalén ca dxi ri'. Ñee lii siou' lade irá ni biete raqué qué gannu ni la?
19 ―Xi laa, rabi be laaca'.
Para na ca':
―Cuze'te du ni uca Jesús de Nazaret, ti profeta nandxó' nezalú Dios ne nezalú irá binni. Rihuinni nandxó' be pur ni bi'ni be ne ni uní' be. 20 Cayuí du modo gudixhe ca xaíque sti ca sacerdote ne ca justicia stidu gati be, ne bicaa ca laabe lu cruz. 21 Laa nda du zácaxa du laabe nga chi ulá be ca binni Israel. Ne ma raca chonna gubidxa de guca irá nga, 22 peru cadi nga si nga laani purti yanna nabé cadxagayaa du pur ni gudxi caadxi gunaa laadu, laca de laadu. Nacanda ru uyé cabe ra ba' 23 ne qué nidxela cabe cuerpu stibe. Ora bigueta cabe gudxi cabe laadu biiya cabe casi ti ángel ne gudxi laacabe ma bibani be. 24 Laca uyé xcaadxi de laadu, yeguuya ra ba' que. Ne dxandí', casi na ca gunaa que zaqué nuu ni. Peru qué ñuuya ca laabe.
25 Oraque na Jesús rabi laaca':
―Aque huaxié' riene tu xa. Rindaa para guni cre tu irá ni uní' ca profeta. 26 Ñee cadi maca nexhe tidi Cristu irá nga para chu' lu enda risaca sti la?
27 Ne bisiene be laaca irá ni cá lu Xqui'chi Dios ra ruzeete ni laabe. Bizulú né be ni bicaa Moisés ne biluxe be ra birá ni bicaa ca profeta.
28 Ora yendá cabe guidxi ra ze cabe que, bi'ni be sica ni ze be jma zitu, 29 peru ucuá ca lú be guiaana be, na ca':
―Biaana né laadu rarí'. Ma huadxí ndi', ma chi guiaazi gubidxa.
Para biuu be ralidxi ca', biaana né be laaca'. 30 Ne ra zuba cabe ruaa mexa', chi to xhi cabe, ucuaa be pan ni nexhe raqué, bidii be diuxquixe Dios para undaa be ni, bidii be ni laaca'. 31 Oraque ru', sica ni bixele lú ca' binibiá' ca laabe. Peru ma qué ñaana ru be lú ca'. 32 Ne na ca':
―Ñee cadi de biniibi dxacha ladxidó' no ra zedané be laanu neza ziupa nu, ne ra bisiene be laanu xi na Xqui'chi Dios la?
33 Oraqueca biasa cabe bigueta cabe Jerusalén, biyubi cabe ra nuu once discípulu que ne cani nuu né laaca raqué. 34 Oraque na ca discípulu rabi laacabe:
―Dxandí bibani Señor. Ma biiya Simón laabe.
35 Para byuí' né cabe laaca xi uca cabe neza, ne modo binibiá' cabe laabe ora undaa be pan.
Bidxiña Jesús ra nuu ca discípulu sti'
(Mt. 28.16-20; Mr. 16.14-18; Jn. 20.19-23)
36 Cayuí' ru ca de nga, mala bizuhuaa be galahui de laaca', bigapa diuxi be laaca', na be:
―Gata dxí ladxidó' to.
37 Laaca la? bidxibi ca dede cayaca diti ca'. Zácaxa ca tentación cayuuya ca'. 38 Para rabi be laaca':
―Xiñee cadxibi tu. Xiñee cadi cayuni cre tu. 39 Laguuya bata naya ne bata ñee', guuya tu naa pia' ndi'. Laca'na guuya tu napa dxita lade' ne beela. Ti tentación la? qué gapa nga.
40 Ne laga cayabi be nga laaca la? biluí' be laaca ná be ne ñee be. 41 Peru tantu cayeche ca ne cadxagayaa ca la? dede qué ganda guni cre ca'. Para rabi be laaca':
―Ñee napa tu xiixa go binni la?
42 Oraque bidii ca laabe tindaa benda biguii lu buu ne ti campana bizu napa miel. 43 Ucuaa be ni, gudó be ni nezalú ca'. 44 Ne rabi be laaca':
―Irá ni bizaaca ri la? nga nga ni byué nia laatu que. Gudxe laatu napa xidé gaca irá ni cá lu xqui'chi Moisés, ne ni bicaa ca profeta ne ni cá lu Salmo, irá ra ruzeete ni naa.
45 Ne óraque bixhele be xquenda biaani ca para guiene ca ni cá lu Xqui'chi Dios. 46 Ne rabi be laaca':
―Zacá nga cá ni, napa Cristu xidé gati' ne ibani ra guionna gubidxa. 47 Ne óraque useenda be tu chi güí né binni naquiiñe inaba ca perdón Dios para aca perdonar ca'. Zuzulú ni Jerusalén, de racá ma ze ni irá guidxi. 48 Laatu zanda güi tu ni purti biiya pe tu irá ni. 49 Laguuya'. Zuseenda ni bidii stiidxa Bixhoze gueeda guiaana né laatu. Peru cadi ixele tu de Jerusalén de ora ma ucuaa tu enda nandxó' ni gueeda de ibá'.
Biasa Jesús ze ibá'
(Mr. 16.19-20)
50 Oraque ucuaa be laaca biree né be laaca de ndaani guidxi que, yené be laaca Betania. Ne raqué undisa ná be, uluu be ndaaya laaca'. 51 Caguu ru be ndaaya laaca', biasa be ze be ibá'. 52 Ne biluxe si bisisaca ca laabe, nabé nayeche bigueta ca Jerusalén. 53 Ne qué niree ca ndaani yu'du ro', bisisaca ca Dios ne bidii ca diuxquixe laa. Amén.