10
Xi na Jesús de enda rilaa né xheela'
(Mt. 19.1-12; Lc. 16.18)
Biree Jesús Capernaum uyé neza Judea ne laca uyé cherica guiigu Jordán. Raqué nuu be gurí zisi binni laabe sti tiru, ne bizulú bisiidi be laaca casi runi be. Ne óraque bidxiña caadxi fariseu ra nuu be, cuyubi ca modo usaba ca laabe pur ni iní' be. Gunaba diidxa ca laabe pa jneza ilaa né ti hombre xheela'. Para rabi be laaca':
―Xi bisaana Moisés guni tu.
Oraque na ca':
―Na Moisés zaa usaana cabe xheela cabe peru gaca divorciar né cabe laa.
Oraque na Jesús rabi laacabe:
―Gudxi Moisés laatu guni tu zacá purti naguidxi ladxidó' to. Peru dxi bizulú bizá' Dios irá xixé cosa la? “bizá' be hombre ne gunaa”. “Pur nga runi zusaana hombre bixhoze ne jñaa ne zadxaaga xheela'.” Ne zacá zeda gaca cabe tobi si, ma cadi chupa cabe sínuque tobi si laacabe. Nga runi cadi indaa binni ni ma bichaaga Dios.
10 Biuu si cabe yoo, gunaba ca discípulu laabe gusiene be laaca xii ngue gudxi be ca binni que. 11 Para rabi be laaca':
―Ora ilaa né ti hombre xheela' ne ichaganá adxé gunaa la? cuchee né xheela'. 12 Ne pa usaana ti gunaa xheela' ne ichaganá stobi la? laca cuchee ne xheela'.
Uluu Jesús ndaaya caadxi ba'du'
(Mt. 19.13-15; Lc. 18.15-17)
13 Ti dxi bedané cabe caadxi ba'du ra nuu Jesús para quixhe ná luguiá ca'. Peru udinde né ca discípulu que cani bedané laacabe que. 14 Ne ora bi'ya Jesús xi cayaca la? bidxiichi, ne na:
―Cadi ucueeza tu ca ba'du ca. Zaa gueeda cabe ra nuaa' purti stícabe irá ni napa Dios ladxi ná', laacabe ne irá casi laacabe ca. 15 Ne iruti qué ziuu ra runi mandar Dios pa qué guni cre Dios casi runi cre ti ba'du'.
16 Oraque ucuaa be ca ba'du que, uluu be laaca ndaani ná be ne udixhe ná be luguiá ca', uluu be ndaaya laaca'.
Ra uni' né ti ricu Jesús
(Mt. 19.16-30; Lc. 18.18-30)
17 Ma chi iree Jesús che sti guidxi ora zeda uxooñe ti hombre ne bizuxibi xañee be na rabi laabe:
―Maistru cha'hui', xi naquiiñe gune para gapa enda nabani ni qué zaluxe.
18 Para rabi be laa:
―Xiñee ra'bu naa maistru cha'hui'. Iruti ru nacha'hui jma que tobi lucha Dios. 19 Ma nannu xi na ca mandamientu: “Cadi chu' neu ni cadi xheelu', cadi guuti lu binni, cadi cuana lu', cadi cueeu falsu luguiá stobi, cadi usiguii lu', gunaxhii bixho'zo ne jñoou'.”
20 Para na hombre que:
―Irá nga huayune dede dxi nahuiine, Maistru.
21 Biiya dxí Jesús laabe ne gunaxhii laabe ne rabi laabe:
―Tobi si riaadxa lii. Guyé bitoo irá ni napu', bidii ca pobre, ne zapu stale ni risaca ibá'. Ne ma cadi lica guiá lu xpida lu', ne dananda naa.
22 Peru ora bina diaga be xi na Jesús la? ucaná ladxidó' be purti nabé napa be bidxichi, ne triste biree be ze be.
23 Oraque biiya dxí Jesús irá ladu ne na rabi ca discípulu:
―Aque nagana raca para ca ricu udii ca lugar guni mandar Dios laaca'.
24 Bidxagayaa ca discípulu ni uní' be que. Peru bigueta rabi be laaca':
―Xiiñe ca', aque nagana na tobi ni nadxii bidxichi guni mandar Dios laa xa. 25 Jma qué igana tidi ti camellu xa'na ti aguxa' para gudii ti ricu lugar guni mandar Dios laa.
26 Jma rusi bidxagayaa ca discípulu óraque, ne unaba diidxa saa ca':
―Tu zanda ilá pue.
27 Para biiya dxí be laaca' ne rabi be laaca':
―Binni la? qué zanda guni ni peru Dios zanda, purti gasti ni nagana para Dios.
28 Oraque bizulú Pedru na rabi laabe:
―Laadu ya', bisaana du irá ni napa du ne canananda du lii.
29 Para na be:
―Ma nanna'. Ne tutiica usaana lidxi o bi'chi o biza'na o bixhoze o jñaa o xheela o xiiñi o layú sti pur naa ne pur stiidxa Dios la? 30 zacaa ti gayuaa tantu de ni bisaana que: yoo, bi'chi', biza'na', jñaa, xiiñi' ne layú, neca zadi'di stale ni nagana. Ne dxi usulú guidxilayú cubi la? zapa ti enda nabani ni qué zaluxe. 31 Peru stale de cani za niru ziaana atrá, ne stale de cani za atrá zazá niru.
Ra bigueta bizeete Jesús zati
(Mt. 20.17-19; Lc. 18.31-34)
32 Ti dxi ze Jesús Jerusalén, laa ne cani rizá né laa. Peru za niru be lú ca'. Bidxagayaa ca discípulu ze be Jerusalén, ne zaqueca nanda xcaadxi binni atrá, zeda dxibi ca'. Oraque guridxi be idubi doce discípulu stibe que ti ladu, ne bizulú byui' né be laaca xi chi aca be. 33 Rabi be laaca':
―Laguuya mayaca guiu' nu Jerusalén, ne ma chi naaze cabe naa. Naa nga Hombre Biseenda Dios. Zutoo cabe naa lu xaíque sti ca sacerdote ne ca maistru de ley, ne zaguixhe ca gate' ne zutiidi ca naa lu ná cani cadi judíu, 34 ne zuni burla ca ngue naa. Zuniná ca naa ne zuchá xhinni ca lade' ne zuuti ca naa. Peru lu chonna gubidxa de biiti cabe naa zabane'.
Ra bidxiña ca xiiñi Zebedeu ra nuu Jesús
(Mt. 20.20-28)
35 Oraque bidxiña Jacobo ne Juan xiiñi Zebedeu ra nuu Jesús ne na ca rabi ca laabe:
―Maistru, rinaba du gu'nu ni chi naba du lii ri'.
36 Para rabi be laaca':
―Xi racala'dxi tu gune para laatu ya'.
37 Oraque rabi ca laabe:
―Ora ma zuba lu de rey ne ma cayuni mandar lu irá la? udiiu lugar cui du cue' lu', tobi ladu derechu, stobi ladu biga'.
38 Para rabi be laaca':
―Nin qué ganna tu xi canaba tu. Ñee zanda gacaná tu casi chi gacana'ya', ne tidi tu ni chi tide ri la?
39 Para na ca':
―Zanda.
Oraque rabi be laaca':
―Dxandí zacaná tu ne zadi'di tu casi ni chi tide ri'. 40 peru para cui tu cuee', ladu derechu ne ladu biga la? cadi nexhe di nga ladxi naya para gudiee tuuxa, sínuque maca nexhe tuu nga icaa ni.
41 Ora bina diaga xhii discípulu que xi na cabe la? bidxiichi né ca laacabe. 42 Peru guridxi Jesús irá cabe ne rabi laacabe:
―Laatu nanna tu ximodo runi cani runi mandar ndaani guidxilayú, runi stica irá binni ni runi mandar ca'. Ne cani risaca lade cabe la? laca racala'dxi ca guni mandar ca'. 43 Peru laatu, cadi guni tu zacá lade tu, sínuque tu gacala'dxi isaca jma la? napa xidé gaca casi jmozo ca xcaadxi. 44 Ne zaqueca guni tutiica gacala'dxi sa niru, 45 casi huayune lade tu. Naa nga Hombre Biseenda Dios ne benda cadi para gacané cabe naa sínuque para gacaniá laacabe ne para gudiee xpida ti ganda ilá stale binni.
Ra bisianda Jesús Bartimeu
(Mt. 20.29-34; Lc. 18.35-43)
46 Oraque yendá cabe ndaani guidxi Jericó ne ra biree Jesús de ndaani guidxi que biree né ca discípulu sti', ne nanda stale binni laaca'. Ne uriá neza ra zidi'di cabe que zuba ti hombre nacheepa lú, lá Bartimeu, xiiñi Timeu, canaba guna. 47 Ne ora bina diaga be Jesús de Nazaret ngue zidi'di raqué la? bizulú be bicaa be ridxi:
―¡Jesús, Xiiñi David, biá la' naa!
48 Stale binni udinde né laabe para nigani be, peru laga jma rusi bicaa be ridxi:
―¡Biá naa, Xiiñi David!
49 Oraque bizuhuaa dxí Jesús ne na:
―Lacuidxi laabe.
Para uyé tobi na rabi laabe:
―Cadi idxibi lu', bizuhuaa, cabidxi be lii.
50 Oraque bilaa be xhaba be layú ne biasa guxooñe be bidxiña be ra nuu Jesús. 51 Para na Jesús rabi laabe:
―Xi racala'dxu gune para lii.
Para na be:
―Maistru, racaladxe inaya'.
52 Oraque na Jesús rabi laabe:
―Ma zanda che lu'. Ma bianda lu' purti bini cre lu'.
Ne oraqueca ma gunda uná be, ne yenanda be Jesús neza ze'.